10. Sajjhāyasuttavaṇṇanā
230. Dasame yaṃ sudan ti nipātamattaṃ .
Sajjhāyabahuloti nissaraṇapariyattivasena sajjhāyanato bahutaraṃ kālaṃ sajjhāyanto .
So kira ācariyassa divāṭṭhānaṃ sammajjitvā ācariyaṃ udikkhanto tiṭṭhati .
Atha naṃ āgacchantaṃ disvāva paccuggantvā pattacīvaraṃ paṭiggahetvā paññattāsane nisinnassa tālavaṇṭavātaṃ datvā pānīyaṃ āpucchitvā pāde dhovitvā telaṃ makkhetvā vanditvā ṭhito uddesaṃ gahetvā yāva sūriyatthaṅgamā sajjhāyaṃ karoti .
So nhānakoṭṭhake udakaṃ upaṭṭhapetvā aṅgārakapalle aggiṃ karoti .
Ācariyassa nhatvā āgatassa pādesu udakaṃ puñchitvā piṭṭhiparikammaṃ katvā vanditvā uddesaṃ gahetvā paṭhamayāme sajjhāyaṃ katvā majjhimayāme sarīraṃ samassāsetvā pacchimayāme uddesaṃ gahetvā yāva aruṇuggamanā sajjhāyaṃ katvā niruddhasaddaṃ khayato sammasati .
Tato sesaṃ upādāyarūpaṃ bhūtarūpaṃ nāmarūpanti pañcasu khandhesu vipassanaṃ vaḍḍhetvā arahattaṃ pāpuṇi .
Appossukkoti uddesaggahaṇe ca sajjhāyakaraṇīye ca nirussukko .
Saṅkasāyatīti yassa dāni atthāya ahaṃ sajjhāyaṃ kareyyaṃ , so me attho matthakaṃ
M1.271 patto .
Kiṃ me idāni sajjhāyenāti phalasamāpattisukhena kālaṃ ativatteti .Ajjhabhāsīti ,‘‘ kiṃ nu kho assa therassa aphāsukaṃ jātaṃ , udāhussa ācariyassa ?
Kena nu kho kāraṇena pubbe viya madhurassarena na sajjhāyatī ’’ ti ?
Āgantvā santike ṭhitā abhāsi .
Dhammapadānīti idha sabbampi buddhavacanaṃ adhippetaṃ
P1.297 .
Nādhīyasīti na sajjhāyasi .
Nādiyasīti vā pāṭho , na gaṇhāsīti attho .Pasaṃsan ti dhammabhāṇako pasaṃsaṃ labhati , ābhidhammiko
V1.261 suttantiko vinayadharotissa pasaṃsitā bhavanti .Virāgenāti ariyamaggena .
Aññāyāti jānitvā .
Nikkhepanan ti tassa diṭṭhasutādino vissajjanaṃ santo vadantīti dīpeti , na buddhavacanassa .
Ettāvatā ‘‘ thero buddhavacanaṃ na vissajjāpetī ’’ ti na niccakālaṃ sajjhāyanteneva bhavitabbaṃ , sajjhāyitvā pana –
‘‘ ettakassāhaṃ atthassa vā dhammassa vā ādhāro bhavituṃ samattho ’’ ti ñatvā vaṭṭadukkhassa antakiriyāya paṭipajjitabbaṃ .