1. Sattisuttavaṇṇanā
21. Sattivaggassa paṭhame
P1.48 sattiyāti desanāsīsametaṃ .
Ekatokhārādinā satthenāti attho .
Omaṭṭhoti pahato .
Cattāro hi pahārā omaṭṭho ummaṭṭho maṭṭho vimaṭṭhoti .
Tattha upari ṭhatvā adhomukhaṃ dinnapahāro omaṭṭho nāma ;
heṭṭhā ṭhatvā uddhaṃmukhaṃ dinno ummaṭṭho nāma ;
aggaḷasūci viya vinivijjhitvā gato maṭṭho nāma ;
seso sabbopi vimaṭṭho nāma .
Imasmiṃ pana ṭhāne omaṭṭho gahito .
So hi sabbadāruṇo duruddharasallo duttikiccho antodoso antopubbalohitova hotiV1.45 , pubbalohitaṃ anikkhamitvā vaṇamukhaṃ pariyonandhitvā tiṭṭhati .
PubbalohitaṃM1.47 niharitukāmehi mañcena saddhiṃ bandhitvā adhosiro kātabbo hoti , maraṇaṃ vā maraṇamattaṃ vā dukkhaṃ pāpuṇāti .
Paribbajeti vihareyya .
Imāya gāthāya kiṃ katheti ?
Yathā sattiyā omaṭṭho puriso sallubbahana-vaṇatikicchanānaṃ atthāya vīriyaṃ ārabhati , payogaṃ karoti parakkamati .
Yathā ca ḍayhamāno matthake ādittasīso tassa nibbāpanatthāya vīriyaṃ ārabhati , payogaṃ karoti parakkamati , evameva bhikkhu kāmarāgaṃ pahānāya sato appamatto hutvā vihareyya bhagavāti kathesi .
Atha bhagavā cintesi – imāya devatāya upamā tāva daḷhaṃ katvā ānītā , atthaṃ pana parittakaṃ gahetvā ṭhitā , punappunaṃ kathentīpi hesā kāmarāgassa vikkhambhanapahānameva katheyya .
Yāva ca kāmarāgo maggena na samugghāṭiyati , tāva anubaddhova hoti .
Iti tameva opammaṃ gahetvā paṭhamamaggavasena desanaṃ vinivaṭṭetvā desento dutiyaṃ gāthamāha .
Tassattho purimānusāreneva veditabboti .
Paṭhamaṃ .