9. Yathākammūpagatañāṇakathāvaṇṇanā
377. Idāni
V0.170 yathākammūpagatañāṇakathā nāma hoti .Tattha yesaṃ ‘‘ iti dibbena cakkhunā visuddhena … pe … yathākammūpage satte pajānātī ’’ ti ( dī . ni .1.246; paṭi . ma .1.106) suttaṃ ayoniso gahetvā yathākammūpagatañāṇameva dibbacakkhunti laddhi , te sandhāya pucchā sakavādissa , paṭiññā itarassa .
Puna yathākammūpagatañca manasi karotīti puṭṭho ekacittassa ārammaṇadvayābhāvā paṭikkhipati .
Dutiyaṃ puṭṭho nānācittavasena paṭijānāti .
Puna lesokāsaṃ adatvā dvinnaṃ phassānan ti puṭṭho paṭikkhipati .
Iti yathā iminā yathākammūpagatapadena , evameva ime vata bhonto
P0.71 , sattātiādipadehipi saddhiṃ yojanāsu attho veditabbo . 378. Āyasmā
M0.175 sāriputto yathākammūpagataṃ ñāṇaṃ jānātīti idaṃ sakavādī yasmā thero appicchatāya abhiññāñāṇāni na vaḷañjetīti ekacce na jānanti , tāni panassa neva atthīti maññanti , tasmā taṃ ‘‘ dibbacakkhuno alābhī thero ’’ ti maññamānaṃ pucchati .Teneva kāraṇena ‘‘ atthāyasmato sāriputtassa dibbacakkhū ’’ ti parato puṭṭho paṭikkhipati .
Dutiyaṃ puṭṭho yaṃkiñci sāvakena pattabbaṃ , sabbaṃ taṃ therena anuppattanti paṭijānāti .
Idānissa vikkhepaṃ karonto sakavādī nanu āyasmā sāriputtotiādimāha .
Imañhi gāthaṃ thero vaḷañjanapaṇidhiyā eva abhāvena āha , na abhiññāñāṇassa abhāvena .
Paravādī pana abhāvenevāti atthaṃ sallakkheti .
Tasmā tassa laddhiyā therassa yathākammūpagatañāṇameva atthi , no dibbacakkhu .
Tena vuttaṃ ‘‘ tena hi na vattabbaṃ yathākammūpagatañāṇaṃ dibbacakkhū ’’ ti .
Yathākammūpagatañāṇakathāvaṇṇanā .