5. Sammukhāthavikattheraapadānaṃ

Author： _System_Pali_VRI_ @ Administrator

41.

‘‘ Jāyamāne vipassimhi , nimittaṃ byākariṃ ahaṃ ;

‘ Nibbāpayiñca [ nibbāpayaṃ ca ( sī . syā .), nibbāpayanto (?)] janataṃ , buddho loke bhavissati .

42.

‘‘‘ YasmiñcaM1.174 jāyamānasmiṃ , dasasahassi kampati ;

So dāni bhagavā satthā , dhammaṃ deseti cakkhumā .

43.

‘‘‘ Yasmiñca jāyamānasmiṃ , āloko vipulo ahu ;

So dāni bhagavā satthā , dhammaṃ deseti cakkhumā .

44.

‘‘‘ Yasmiñca jāyamānasmiṃ , saritāyo na sandayuṃ [ sandisuṃ ( sī . syā .)];

So dāni bhagavā satthā , dhammaṃ deseti cakkhumā .

45.

‘‘‘ Yasmiñca jāyamānasmiṃ , avīcaggi na pajjali ;

So dāni bhagavā satthā , dhammaṃ deseti cakkhumā .

46.

‘‘‘ YasmiñcaV1.160 jāyamānasmiṃ , pakkhisaṅgho na saṃcari ;

So dāni bhagavā satthā , dhammaṃ deseti cakkhumā .

47.

‘‘‘ Yasmiñca jāyamānasmiṃ , vātakkhandho na vāyati ;

So dāni bhagavā satthā , dhammaṃ deseti cakkhumā .

48.

‘‘‘ YasmiñcaT1.228 jāyamānasmiṃ , sabbaratanāni jotayuṃ [ jotisuṃ ( sī . syā .)];

So dāni bhagavā satthā , dhammaṃ deseti cakkhumā .

49.

‘‘‘ Yasmiñca jāyamānasmiṃ , sattāsuṃ padavikkamā ;

So dāni bhagavā satthā , dhammaṃ deseti cakkhumā .

50.

‘‘‘ JātamattoP1.159 ca sambuddho , disā sabbā vilokayi ;

Vācāsabhimudīresi , esā buddhāna dhammatā ’.

51.

‘‘ Saṃvejayitvā janataṃ , thavitvā lokanāyakaṃ ;

Sambuddhaṃ abhivādetvā , pakkāmiṃ pācināmukho .

52.

‘‘ Ekanavutito kappe , yaṃ buddhamabhithomayiṃ ;

Duggatiṃ nābhijānāmi , thomanāya idaṃ phalaṃ .

53.

‘‘ Ito navutikappamhi , sammukhāthavikavhayo ;