3-3.Mahākassapattheraapadānaṃ
398.
‘‘ Padumuttarassa
V1.31 bhagavato , lokajeṭṭhassa tādino ;Nibbute lokanāthamhi , pūjaṃ kubbanti satthuno .
399.
‘‘ Udaggacittā janatā , āmoditapamoditā ;
Tesu saṃvegajātesu , pīti me udapajjatha .
400.
‘‘ Ñātimitte samānetvā , idaṃ vacanamabraviṃ ;
Parinibbuto mahāvīro , handa pūjaṃ karomase .
401.
‘‘ Sādhūti te paṭissutvā , bhiyyo hāsaṃ janiṃsu me ;
Buddhasmiṃ lokanāthamhi , kāhāma puññasañcayaṃ .
402.
‘‘ Agghiyaṃ
M1.37 sukataṃ katvā , satahatthasamuggataṃ ;Diyaḍḍhahatthapatthaṭaṃ , vimānaṃ nabhamuggataṃ .
403.
‘‘ Katvāna hammiyaṃ tattha , tālapantīhi cittitaṃ ;
Sakaṃ cittaṃ pasādetvā , cetiyaṃ pūjayuttamaṃ .
404.
‘‘ Aggikkhandhova
T1.49 jalito , kiṃsuko iva [ sālarājāva ( sī .)] phullito ;Indalaṭṭhīva ākāse , obhāseti catuddisā .
405.
‘‘ Tattha cittaṃ pasādetvā , katvāna kusalaṃ bahuṃ ;
Pubbakammaṃ saritvāna , tidasaṃ upapajjahaṃ .
406.
‘‘ Sahassayuttaṃ
P1.34 hayavāhiṃ , dibbayānamadhiṭṭhito ;Ubbiddhaṃ bhavanaṃ mayhaṃ , sattabhūmaṃ samuggataṃ .
407.
‘‘ Kūṭāgārasahassāni , sabbasoṇṇamayā ahuṃ ;
Jalanti sakatejena , disā sabbā pabhāsayaṃ .
408.
‘‘ Santi aññepi niyyūhā , lohitaṅgamayā tadā ;
Tepi jotanti ābhāya , samantā caturo disā .
409.
‘‘ Puññakammābhinibbattā , kūṭāgārā sunimmitā ;
Maṇimayāpi jotanti , disā dasa [ disodisaṃ ( syā .)] samantato .
410.
‘‘ Tesaṃ ujjotamānānaṃ , obhāso vipulo ahu ;
Sabbe deve abhibhomi , puññakammassidaṃ phalaṃ .
411.
‘‘ Saṭṭhikappasahassamhi
V1.32 , ubbiddho nāma khattiyo ;Cāturanto vijitāvī , pathaviṃ āvasiṃ ahaṃ .
412.
‘‘ Tatheva bhaddake kappe , tiṃsakkhattuṃ ahosahaṃ ;
Sakakammābhiraddhomhi , cakkavattī mahabbalo .
413.
‘‘ Sattaratanasampanno , catudīpamhi issaro ;
Tatthāpi bhavanaṃ mayhaṃ , indalaṭṭhīva uggataṃ .
414.
‘‘ Āyāmato
T1.50M1.38 catubbīsaṃ , vitthārena ca dvādasa ;Rammaṇaṃ [ rammakaṃ ( sī . syā .)] nāma nagaraṃ , daḷhapākāratoraṇaṃ .
415.
‘‘ Āyāmato pañcasataṃ , vitthārena tadaḍḍhakaṃ ;
Ākiṇṇaṃ janakāyehi , tidasānaṃ puraṃ viya .
416.
‘‘ Yathā sūcighare sūcī , pakkhittā paṇṇavīsati ;
Aññamaññaṃ paghaṭṭenti , ākiṇṇaṃ hoti laṅkataṃ [ taṃ tadā ( sī .), satatā ( syā .), saṅkaraṃ (?)].
417.
‘‘ Evampi nagaraṃ mayhaṃ , hatthissarathasaṃkulaṃ ;
Manussehi sadākiṇṇaṃ , rammaṇaṃ nagaruttamaṃ .
418.
‘‘ Tattha bhutvā pivitvā ca , puna devattanaṃ gato [ punapi devataṅgato ( ka .)].
Bhave pacchimake mayhaṃ , ahosi kulasampadā .
419.
‘‘ Brāhmaññakulasambhūto
P1.35 , mahāratanasañcayo ;Asītikoṭiyo hitvā , hiraññassāpi pabbajiṃ .
420.
‘‘ Paṭisambhidā catasso , vimokkhāpi ca aṭṭhime ;
Chaḷabhiññā sacchikatā , kataṃ buddhassa sāsanaṃ ’’.
Itthaṃ sudaṃ āyasmā mahākassapo thero imā gāthāyo abhāsitthāti .
Mahākassapattherassāpadānaṃ tatiyaṃ .