5. Padumakūṭāgāriyattheraapadānaṃ
353.
‘‘ Piyadassī
T1.513 nāma bhagavā , sayambhū lokanāyako ;Vivekakāmo sambuddho , samādhikusalo muni .
354.
‘‘ Vanasaṇḍaṃ
V1.360 samogayha , piyadassī mahāmuni ;Paṃsukūlaṃ pattharitvā , nisīdi purisuttamo .
355.
‘‘ Migaluddo pure āsiṃ , araññe [ vipine ( sī .), irine ( syā . ka .)] kānane ahaṃ ;
Pasadaṃ migamesanto , āhiṇḍāmi ahaṃ tadā .
356.
‘‘ Tatthaddasāsiṃ sambuddhaṃ , oghatiṇṇamanāsavaṃ ;
Pupphitaṃ sālarājaṃva , sataraṃsiṃva uggataṃ .
357.
‘‘ Disvānahaṃ devadevaṃ , piyadassiṃ mahāyasaṃ ;
Jātassaraṃ samogayha , padumaṃ āhariṃ tadā .
358.
‘‘ Āharitvāna padumaṃ , satapattaṃ manoramaṃ ;
Kūṭāgāraṃ karitvāna , chādayiṃ padumenahaṃ .
359.
‘‘ Anukampako
P1.327 kāruṇiko , piyadassī mahāmuni ;Sattarattindivaṃ buddho , kūṭāgāre vasī jino .
360.
‘‘ Purāṇaṃ chaḍḍayitvāna , navena chādayiṃ ahaṃ ;
Añjaliṃ paggahetvāna , aṭṭhāsiṃ tāvade ahaṃ .
361.
‘‘ Vuṭṭhahitvā
M1.383 samādhimhā , piyadassī mahāmuni ;Disaṃ anuvilokento , nisīdi lokanāyako .
362.
‘‘ Tadā
T1.514 sudassano nāma , upaṭṭhāko mahiddhiko ;Cittamaññāya buddhassa , piyadassissa satthuno .
363.
‘‘ Asītiyā sahassehi , bhikkhūhi parivārito ;
Vanante sukhamāsīnaṃ , upesi lokanāyakaṃ .
364.
‘‘ Yāvatā vanasaṇḍamhi , adhivatthā ca devatā ;
Buddhassa cittamaññāya , sabbe sannipatuṃ tadā .
365.
‘‘ Samāgatesu yakkhesu , kumbhaṇḍe saharakkhase ;
Bhikkhusaṅghe ca sampatte , gāthā pabyāharī [ sabyāharī ( syā .), mābyāharī ( sī .)] jino .
366.
‘‘‘ Yo maṃ sattāhaṃ pūjesi , āvāsañca akāsi me ;
Tamahaṃ kittayissāmi , suṇātha mama bhāsato .
367.
‘‘‘ Sududdasaṃ sunipuṇaṃ , gambhīraṃ suppakāsitaṃ ;
Ñāṇena kittayissāmi , suṇātha mama bhāsato .
368.
‘‘‘ Catuddasāni
V1.361 kappāni , devarajjaṃ karissati ;Kūṭāgāraṃ mahantassa [ brahaṃ tassa ( sī . syā .)], padmapupphehi chāditaṃ .
369.
‘‘‘ Ākāse dhārayissati , pupphakammassidaṃ [ pubbakammassidaṃ ( syā .)] phalaṃ ;
Catubbīse [ catuddase ( syā .)] kappasate , vokiṇṇaṃ saṃsarissati .
370.
‘‘‘ Tattha pupphamayaṃ byamhaṃ , ākāse dhārayissati ;
Yathā padumapattamhi , toyaṃ na upalimpati .
371.
‘‘‘ Tathevīmassa ñāṇamhi , kilesā nopalimpare ;
Manasā vinivaṭṭetvā , pañca nīvaraṇe ayaṃ .
372.
‘‘‘ Cittaṃ
T1.515 janetvā nekkhamme , agārā pabbajissati ;Tato pupphamaye byamhe , dhārente [ pupphamayaṃ byamhaṃ , dhārentaṃ ( syā . ka .)] nikkhamissati .
373.
‘‘‘ Rukkhamūle vasantassa , nipakassa satīmato ;
Tattha pupphamayaṃ byamhaṃ , matthake dhārayissati .
374.
‘‘‘ Cīvaraṃ
M1.384P1.328 piṇḍapātañca , paccayaṃ sayanāsanaṃ ;Datvāna bhikkhusaṅghassa , nibbāyissatināsavo ’.
375.
‘‘ Kūṭāgārena caratā [ caraṇā ( sī . pī . ka .), carite ( syā .)], pabbajjaṃ abhinikkhamiṃ ;
Rukkhamūle vasantampi [ vasantamhi ( sī .), vasatopi (?)], kūṭāgāraṃ dharīyati .
376.
‘‘ Cīvare piṇḍapāte ca , cetanā me na vijjati ;
Puññakammena saṃyutto , labhāmi pariniṭṭhitaṃ .
377.
‘‘ Gaṇanāto asaṅkheyyā , kappakoṭī bahū mama ;
Rittakā te atikkantā , pamuttā lokanāyakā .
378.
‘‘ Aṭṭhārase kappasate , piyadassī vināyako ;
Tamahaṃ payirupāsitvā , imaṃ yoniṃ upāgato .
379.
‘‘ Idha passāmi [ idhaddasāsiṃ ( sī .)] sambuddhaṃ , anomaṃ nāma cakkhumaṃ ;
Tamahaṃ upagantvāna , pabbajiṃ anagāriyaṃ .
380.
‘‘ Dukkhassantakaro buddho , maggaṃ me desayī jino ;
Tassa dhammaṃ suṇitvāna , pattomhi acalaṃ padaṃ .
381.
‘‘ Tosayitvāna sambuddhaṃ , gotamaṃ sakyapuṅgavaṃ ;
Sabbāsave pariññāya , viharāmi anāsavo .
382.
‘‘ Aṭṭhārase
T1.516V1.362 kappasate , yaṃ buddhamabhipūjayiṃ ;Duggatiṃ nābhijānāmi , buddhapūjāyidaṃ phalaṃ .
383.
‘‘ Kilesā jhāpitā mayhaṃ , bhavā sabbe samūhatā ;
Sabbāsavā parikkhīṇā , natthi dāni punabbhavo .
384.
‘‘ Svāgataṃ vata me āsi … pe … kataṃ buddhassa sāsanaṃ .
385.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ āyasmā padumakūṭāgāriyo thero imā gāthāyo abhāsitthāti .
Padumakūṭāgāriyattherassāpadānaṃ pañcamaṃ .