9. Timiravaggo
1. Timirapupphiyattheraapadānaṃ
1.
‘‘ Candabhāgānadītīre
T1.182M1.140V1.127 , anusotaṃ vajāmahaṃ ;Nisinnaṃ samaṇaṃ disvā , vippasannamanāvilaṃ .
2.
‘‘ Tattha cittaṃ pasādetvā [ pasādesiṃ ( syā .)], evaṃ cintesahaṃ tadā ;
Tārayissati tiṇṇoyaṃ , dantoyaṃ damayissati .
3.
‘‘ Assāsissati assattho , santo ca samayissati ;
Mocayissati mutto ca , nibbāpessati nibbuto .
4.
‘‘ Evāhaṃ cintayitvāna , siddhatthassa mahesino ;
Gahetvā timirapupphaṃ , matthake okiriṃ ahaṃ [ tadā ( syā .)].
5.
‘‘ Añjaliṃ paggahetvāna , katvā ca naṃ padakkhiṇaṃ ;
Vanditvā satthuno pāde , pakkāmiṃ aparaṃ disaṃ .
6.
‘‘ Aciraṃ gatamattaṃ maṃ , migarājā viheṭhayi ;
Papātamanugacchanto , tattheva papatiṃ ahaṃ .
7.
‘‘ Catunnavutito kappe , yaṃ pupphamabhiropayiṃ ;
Duggatiṃ nābhijānāmi , pupphapūjāyidaṃ [ buddhapūjāyidaṃ ( sī . syā .)] phalaṃ .
8.
‘‘ Chappaññāsamhi
P1.127 kappamhi , sattevāsuṃ mahāyasā [ mahārahā ( syā . ka .)];Sattaratanasampannā , cakkavattī mahabbalā .
9.
‘‘ Paṭisambhidā catasso , vimokkhāpi ca aṭṭhime ;
Chaḷabhiññā
T1.183 sacchikatā , kataṃ buddhassa sāsanaṃ ’’.Itthaṃ sudaṃ āyasmā timirapupphiyo thero imā gāthāyo abhāsitthāti .
Timirapupphiyattherassāpadānaṃ paṭhamaṃ .
2. Gatasaññakattheraapadānaṃ
10.
‘‘ Jātiyā
M1.141V1.128 sattavassohaṃ , pabbajiṃ anagāriyaṃ ;Avandiṃ satthuno pāde , vippasannena cetasā .
11.
‘‘ Sattanaṅgalakīpupphe , ākāse ukkhipiṃ ahaṃ ;
Tissaṃ buddhaṃ samuddissa , anantaguṇasāgaraṃ .
12.
‘‘ Sugatānugataṃ maggaṃ , pūjetvā haṭṭhamānaso ;
Añjaliñca [ añjalissa ( ka .)] tadākāsiṃ , pasanno sehi pāṇibhi .
13.
‘‘ Dvenavute ito kappe , yaṃ kammamakariṃ tadā ;
Duggatiṃ nābhijānāmi , buddhapūjāyidaṃ phalaṃ .
14.
‘‘ Ito aṭṭhamake kappe , tayo aggisikhā ahu ;
Sattaratanasampannā , cakkavattī mahabbalā .
15.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ āyasmā gatasaññako thero imā gāthāyo abhāsitthāti .
Gatasaññakattherassāpadānaṃ dutiyaṃ .
3. Nipannañjalikattheraapadānaṃ
16.
‘‘ Rukkhamūle
T1.184P1.128 nisinnohaṃ , byādhito paramena ca ;Paramakāruññapattomhi , araññe kānane ahaṃ .
17.
‘‘ Anukampaṃ upādāya , tisso satthā upesi maṃ ;
Sohaṃ nipannako santo , sire katvāna añjaliṃ .
18.
‘‘ Pasannacitto sumano , sabbasattānamuttamaṃ ;
Sambuddhaṃ abhivādetvā , tattha kālaṅkato ahaṃ .
19.
‘‘ Dvenavute ito kappe , yaṃ vandiṃ purisuttamaṃ ;
Duggatiṃ nābhijānāmi , vandanāya idaṃ phalaṃ .
20.
‘‘ Ito
M1.142 pañcamake kappe , pañcevāsuṃ mahāsikhā ;Sattaratanasampannā , cakkavattī mahabbalā .
21.
‘‘ Paṭisambhidā
V1.129 catasso … pe … kataṃ buddhassa sāsanaṃ ’’.Itthaṃ sudaṃ āyasmā nipannañjaliko thero imā gāthāyo abhāsitthāti .
Nipannañjalikattherassāpadānaṃ tatiyaṃ .
4. Adhopupphiyattheraapadānaṃ
22.
‘‘ Abhibhū nāma so bhikkhu , sikhino aggasāvako ;
Mahānubhāvo tevijjo , himavantaṃ upāgami .
23.
‘‘ Ahampi
T1.185 himavantamhi , ramaṇīyassame isi ;Vasāmi appamaññāsu , iddhīsu ca tadā vasī .
24.
‘‘ Pakkhijāto viyākāse , pabbataṃ adhivattayiṃ [ abhipatthayiṃ ( syā .), abhimatthayiṃ ( ka .), adhivatthayinti pabbatassa upari gacchintiattho ];
Adhopupphaṃ gahetvāna , āgacchiṃ [ agacchiṃ ( ka .)] pabbataṃ ahaṃ .
25.
‘‘ Satta pupphāni gaṇhitvā , matthake okiriṃ ahaṃ ;
Ālokite [ ālokito ( syā .)] ca vīrena , pakkāmiṃ pācināmukho .
26.
‘‘ Āvāsaṃ
P1.129 abhisambhosiṃ , patvāna assamaṃ ahaṃ ;Khāribhāraṃ gahetvāna , pāyāsiṃ [ pāvisiṃ ( sī .)] pabbatantaraṃ .
27.
‘‘ Ajagaro maṃ pīḷesi , ghorarūpo mahabbalo ;
Pubbakammaṃ saritvāna , tattha kālaṅkato ahaṃ .
28.
‘‘ Ekattiṃse ito kappe , yaṃ pupphamabhiropayiṃ ;
Duggatiṃ nābhijānāmi , pupphapūjāyidaṃ phalaṃ .
29.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ āyasmā adhopupphiyo thero imā gāthāyo abhāsitthāti .
Adhopupphiyattherassāpadānaṃ catutthaṃ .
5. Raṃsisaññakattheraapadānaṃ
30.
‘‘ Pabbate
M1.143P1.130 himavantamhi , vāsaṃ kappesahaṃ pure ;Ajinuttaravāsohaṃ , vasāmi pabbatantare .
31.
‘‘ Suvaṇṇavaṇṇaṃ
T1.186V1.130 sambuddhaṃ , sataraṃsiṃva bhāṇumaṃ ;Vanantaragataṃ disvā , sālarājaṃva pupphitaṃ .
32.
‘‘ Raṃsyā [ raṃse ( syā . ka .)] cittaṃ pasādetvā , vipassissa mahesino ;
Paggayha añjaliṃ vandiṃ , sirasā ukkuṭī [ sirasā ukkuṭiko ( syā .), sirasukkuṭiko ( ka .)] ahaṃ .
33.
‘‘ Ekanavutito kappe , yaṃ kammamakariṃ tadā ;
Duggatiṃ nābhijānāmi , raṃsisaññāyidaṃ phalaṃ .
34.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ āyasmā raṃsisaññako thero imā gāthāyo abhāsitthāti .
Raṃsisaññakattherassāpadānaṃ pañcamaṃ .
6. Dutiyaraṃsisaññakattheraapadānaṃ
35.
‘‘ Pabbate himavantamhi , vākacīradharo ahaṃ ;
Caṅkamañca samārūḷho , nisīdiṃ pācināmukho .
36.
‘‘ Pabbate sugataṃ disvā , phussaṃ jhānarataṃ tadā ;
Añjaliṃ paggahetvāna , raṃsyā cittaṃ pasādayiṃ .
37.
‘‘ Dvenavute ito kappe , yaṃ saññamalabhiṃ tadā ;
Duggatiṃ nābhijānāmi , raṃsisaññāyidaṃ phalaṃ .
38.
‘‘ Paṭisambhidā
T1.187 catasso … pe … kataṃ buddhassa sāsanaṃ ’’.Itthaṃ sudaṃ āyasmā raṃsisaññako thero imā gāthāyo abhāsitthāti .
Dutiyaraṃsisaññakattherassāpadānaṃ chaṭṭhaṃ .
7. Phaladāyakattheraapadānaṃ
39.
‘‘ Pabbate
M1.144 himavantamhi , kharājinadharo ahaṃ ;Phussaṃ jinavaraṃ disvā , phalahattho phalaṃ adaṃ .
40.
‘‘ Yamahaṃ phalamadāsiṃ , vippasannena cetasā ;
Bhave nibbattamānamhi , phalaṃ nibbattate mama .
41.
‘‘ Dvenavute ito kappe , yaṃ phalaṃ adadiṃ ahaṃ ;
Duggatiṃ nābhijānāmi , phaladānassidaṃ phalaṃ .
42.
‘‘ Paṭisambhidā
V1.131 catasso … pe … kataṃ buddhassa sāsanaṃ ’’.Itthaṃ sudaṃ āyasmā phaladāyako thero imā gāthāyo abhāsitthāti .
Phaladāyakattherassāpadānaṃ sattamaṃ .
8. Saddasaññakattheraapadānaṃ
43.
‘‘ Pabbate
T1.188P1.131 himavantamhi , vasāmi paṇṇasanthare ;Phussassa dhammaṃ bhaṇato , sadde cittaṃ pasādayiṃ .
44.
‘‘ Dvenavute ito kappe , yaṃ kammamakariṃ tadā ;
Duggatiṃ nābhijānāmi , puññakammassidaṃ phalaṃ .
45.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ āyasmā saddasaññako thero imā gāthāyo abhāsitthāti .
Saddasaññakattherassāpadānaṃ aṭṭhamaṃ .
9. Bodhisiñcakattheraapadānaṃ
46.
‘‘ Vipassissa bhagavato , mahābodhimaho ahu ;
Pabbajjupagato santo , upagacchiṃ ahaṃ tadā .
47.
‘‘ Kusumodakamādāya
M1.145 , bodhiyā okiriṃ ahaṃ ;Mocayissati no mutto , nibbāpessati nibbuto .
48.
‘‘ Ekanavutito kappe , yaṃ bodhimabhisiñcayiṃ ;
Duggatiṃ nābhijānāmi , bodhisiñcāyidaṃ phalaṃ .
49.
‘‘ Tettiṃse
T1.189 vattamānamhi , kappe āsuṃ janādhipā ;Udakasecanā nāma , aṭṭhete cakkavattino .
50.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ āyasmā bodhisiñcako thero imā gāthāyo abhāsitthāti .
Bodhisiñcakattherassāpadānaṃ navamaṃ .
10. Padumapupphiyattheraapadānaṃ
51.
‘‘ Pokkharavanaṃ
V1.132P1.132 paviṭṭho , bhañjanto padumānihaṃ ;Tatthaddasaṃ phussaṃ buddhaṃ [ addasaṃ phussasambuddhaṃ ( sī . syā .)], bāttiṃsavaralakkhaṇaṃ .
52.
‘‘ Padumapupphaṃ gahetvāna , ākāse ukkhipiṃ ahaṃ ;
Pāpakammaṃ saritvāna , pabbajiṃ anagāriyaṃ .
53.
‘‘ Pabbajitvāna kāyena , manasā saṃvutena ca ;
Vacīduccaritaṃ hitvā , ājīvaṃ parisodhayiṃ .
54.
‘‘ Dvenavute ito kappe , yaṃ pupphamabhiropayiṃ ;
Duggatiṃ nābhijānāmi , buddhapūjāyidaṃ phalaṃ .
55.
‘‘ Padumābhāsanāmā ca , aṭṭhārasa mahīpatī ;
Aṭṭhārasesu kappesu , aṭṭhatālīsamāsisuṃ .
56.
‘‘ Paṭisambhidā
T1.190M1.146 catasso … pe … kataṃ buddhassa sāsanaṃ ’’.Itthaṃ sudaṃ āyasmā padumapupphiyo thero imā gāthāyo abhāsitthāti ;
Padumapupphiyattherassāpadānaṃ dasamaṃ .
Timiravaggo navamo .
Tassuddānaṃ –
Timiranaṅgalīpuppha , nippannañjaliko adho ;
Dve raṃsisaññī phalado , saddasaññī ca secako ;
Padmapupphī ca gāthāyo , chappaññāsa pakittitā .