6. Rāhulattheraapadānaṃ
68.
‘‘ Padumuttarassa bhagavato , lokajeṭṭhassa tādino ;
Sattabhūmamhi pāsāde , ādāsaṃ santhariṃ ahaṃ .
69.
‘‘ Khīṇāsavasahassehi , parikiṇṇo mahāmuni ;
Upāgami gandhakuṭiṃ , dvipadindo [ dipadindo ( sī . syā .)] narāsabho .
70.
‘‘ Virocento [ virocayaṃ ( syā .)] gandhakuṭiṃ , devadevo narāsabho ;
Bhikkhusaṅghe ṭhito satthā , imā gāthā abhāsatha .
71.
‘‘‘ Yenāyaṃ
T1.86V1.58 jotitā seyyā , ādāsova susanthato ;Tamahaṃ kittayissāmi , suṇātha mama bhāsato .
72.
‘‘‘ Soṇṇamayā rūpimayā , atho veḷuriyāmayā ;
Nibbattissanti pāsādā , ye keci manaso piyā .
73.
‘‘‘ Catusaṭṭhikkhattuṃ
P1.61 devindo , devarajjaṃ karissati ;Sahassakkhattuṃ cakkavattī , bhavissati anantarā .
74.
‘‘‘ Ekavīsatikappamhi , vimalo nāma khattiyo ;
Cāturanto vijitāvī , cakkavattī bhavissati .
75.
‘‘‘ Nagaraṃ reṇuvatī nāma , iṭṭhakāhi sumāpitaṃ ;
Āyāmato tīṇi sataṃ , caturassasamāyutaṃ .
76.
‘‘‘ Sudassano nāma pāsādo , vissakammena māpito [ visukammena § māpito ( ka .), vissakammena nimmito ( sī .)];
Kūṭāgāravarūpeto , sattaratanabhūsito .
77.
‘‘‘ Dasasaddāvivittaṃ
M1.67 taṃ [ avivittaṃ ( sī .)], vijjādharasamākulaṃ ;Sudassanaṃva nagaraṃ , devatānaṃ bhavissati .
78.
‘‘‘ Pabhā niggacchate tassa , uggacchanteva sūriye ;
Virocessati taṃ niccaṃ , samantā aṭṭhayojanaṃ .
79.
‘‘‘ Kappasatasahassamhi , okkākakulasambhavo ;
Gotamo nāma gottena , satthā loke bhavissati .
80.
‘‘‘ Tusitā so cavitvāna , sukkamūlena codito ;
Gotamassa bhagavato , atrajo so bhavissati .
81.
‘‘‘ Sace
T1.87 vaseyya [ sacā ’ vaseyya (?)] agāraṃ , cakkavattī bhaveyya so ;Aṭṭhānametaṃ yaṃ tādī , agāre ratimajjhagā .
82.
‘‘‘ Nikkhamitvā agāramhā , pabbajissati subbato ;
Rāhulo nāma nāmena , arahā so bhavissati ’.
83.
‘‘ Kikīva aṇḍaṃ rakkheyya , cāmarī viya vāladhiṃ ;
Nipako sīlasampanno , mamaṃ rakkhi mahāmuni [ evaṃ rakkhiṃ mahāmuni ( sī . ka .), mamaṃ dakkhi mahāmuni ( syā .)].
84.
‘‘ Tassāhaṃ dhammamaññāya , vihāsiṃ sāsane rato ;
Sabbāsave pariññāya , viharāmi anāsavo .
85.
‘‘ Paṭisambhidā
V1.59 catasso , vimokkhāpi ca aṭṭhime ;Chaḷabhiññā sacchikatā , kataṃ buddhassa sāsanaṃ ’’.
Itthaṃ sudaṃ āyasmā rāhulo thero imā gāthāyo abhāsitthāti .
Rāhulattherassāpadānaṃ chaṭṭhaṃ .