4. Madhudāyakattheraapadānaṃ
333.
‘‘ Sindhuyā nadiyā tīre , sukato assamo mama ;
Tattha vācemahaṃ sisse , itihāsaṃ salakkhaṇaṃ .
334.
‘‘ Dhammakāmā vinītā te , sotukāmā susāsanaṃ ;
Chaḷaṅge pāramippattā , sindhukūle vasanti te .
335.
‘‘ Uppātagamane
T1.511 ceva , lakkhaṇesu ca kovidā ;Uttamatthaṃ gavesantā , vasanti vipine tadā .
336.
‘‘ Sumedho nāma sambuddho , loke uppajji tāvade ;
Amhākaṃ anukampanto , upāgacchi vināyako .
337.
‘‘ Upāgataṃ mahāvīraṃ , sumedhaṃ lokanāyakaṃ ;
Tiṇasanthārakaṃ katvā , lokajeṭṭhassadāsahaṃ .
338.
‘‘ Vipināto
M1.381 madhuṃ gayha , buddhaseṭṭhassadāsahaṃ ;Sambuddho paribhuñjitvā , idaṃ vacanamabravi .
339.
‘‘‘ Yo taṃ adāsi madhuṃ me , pasanno sehi pāṇibhi ;
Tamahaṃ kittayissāmi , suṇātha mama bhāsato .
340.
‘‘‘ Iminā madhudānena , tiṇasanthārakena ca ;
Tiṃsa kappasahassāni , devaloke ramissati .
341.
‘‘‘ Tiṃsa
V1.359 kappasahassamhi , okkākakulasambhavo ;Gotamo nāma gottena , satthā loke bhavissati .
342.
‘‘‘ Tassa dhammesu dāyādo , oraso dhammanimmito ;
Sabbāsave pariññāya , nibbāyissatināsavo .
343.
‘‘‘ Devalokā idhāgantvā , mātukucchiṃ upāgate ;
Madhuvassaṃ pavassittha , chādayaṃ madhunā mahiṃ ’.
344.
‘‘ Mayi nikkhantamattamhi , kucchiyā ca suduttarā ;
Tatrāpi madhuvassaṃ me , vassate niccakālikaṃ .
345.
‘‘ Agārā
T1.512P1.326 abhinikkhamma , pabbajiṃ anagāriyaṃ ;Lābhī annassa pānassa , madhudānassidaṃ phalaṃ .
346.
‘‘ Sabbakāmasamiddhohaṃ , bhavitvā devamānuse ;
Teneva madhudānena , pattomhi āsavakkhayaṃ .
347.
‘‘ Vuṭṭhamhi deve caturaṅgule tiṇe , sampupphite [ supupphite ( syā .)] dharaṇīruhe sañchanne [ vappadese ( syā .)];
Suññe ghare maṇḍaparukkhamūlake , vasāmi niccaṃ sukhito anāsavo .
348.
‘‘ Majjhe mahante hīne ca [ majjhe mayhaṃ bhavā assu ( syā . pī . ka .)], bhave sabbe atikkamiṃ [ ye bhave samatikkamiṃ ( syā . ka .), yo bhavesu pakittayi ( ka .)];
Ajja me āsavā khīṇā , natthi dāni punabbhavo .
349.
‘‘ Tiṃsakappasahassamhi , yaṃ dānamadadiṃ tadā ;
Duggatiṃ nābhijānāmi , madhudānassidaṃ phalaṃ .
350.
‘‘ Kilesā
M1.382 jhāpitā mayhaṃ , bhavā sabbe samūhatā ;Sabbāsavā parikkhīṇā , natthi dāni punabbhavo .
351.
‘‘ Svāgataṃ vata me āsi … pe … kataṃ buddhassa sāsanaṃ .
352.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ āyasmā madhudāyako thero imā gāthāyo abhāsitthāti .
Madhudāyakattherassāpadānaṃ catutthaṃ .