5. Upasīvattheraapadānaṃ
100.
‘‘ Himavantassāvidūre
T1.544 , anomo nāma pabbato ;Assamo sukato mayhaṃ , paṇṇasālā sumāpitā .
101.
‘‘ Nadī ca sandatī tattha , supatitthā manoramā ;
Anūpatitthe jāyanti , padumuppalakā bahū .
102.
‘‘ Pāṭhīnā pāvusā macchā , balajā muñjarohitā ;
Macchakacchapasañchannā [ macchakacchapasampannā (?)], nadikā sandate tadā .
103.
‘‘ Timirā pupphitā tattha , asokā khuddamālakā ;
Punnāgā giripunnāgā , sampavanti mamassamaṃ .
104.
‘‘ Kuṭajā
P2.346 pupphitā tattha , tiṇasūlavanāni ca ;Sālā ca saḷalā tattha , campakā pupphitā bahū .
105.
‘‘ Ajjunā atimuttā ca , mahānāmā ca pupphitā ;
Asanā madhugandhī ca , pupphitā te mamassame .
106.
‘‘ Uddālakā pāṭalikā , yūthikā ca piyaṅgukā ;
Bimbijālakasañchannā , samantā aḍḍhayojanaṃ .
107.
‘‘ Mātaggārā
V1.381 [ mātaṅgavā ( sī .), mātakarā ( syā .), mātaṅgā vā ( pī .)] sattaliyo , pāṭalī sinduvārakā ;Aṅkolakā bahū tattha , tālakuṭṭhi [ tālakūṭā ( sī . syā .), tālakuṭṭhā ( pī .)] ca pupphitā ;
Seleyyakā bahū tattha , pupphitā mama assame .
108.
‘‘ Etesu
M1.406 pupphajātesu [ pupphamānesu ( sī . pī .)], sobhanti pādapā bahū ;Samantā
T1.545 tena gandhena , vāyate mama assamo . 109.
‘‘ Harītakā āmalakā , ambajambuvibhītakā [ vibhiṭakā ( sī .)];
Kolā bhallātakā billā , phārusakaphalāni ca .
110.
‘‘ Tindukā ca piyālā ca , madhukā kāsumārayo ;
Labujā panasā tattha , kadalī badarīphalā [ mandariphalā ( ka .), candarīphalā ( syā . pī .)].
111.
‘‘ Ambāṭakā bahū tattha , vallikāraphalāni ca ;
Bījapūrasapāriyo [ cirasaṃrasapākā ca ( syā .), viṭapā ca sapākā ca ( pī ), vidaparapadādayo ( ka .)], phalitā mama assame .
112.
‘‘ Āḷakā isimuggā ca , tato modaphalā bahū ;
Avaṭā pakkabharitā [ sakkarāritā ( ka .)], pilakkhudumbarāni ca .
113.
‘‘ Pipphilī marīcā tattha , nigrodhā ca kapitthanā ;
Udumbarakā bahavo , kaṇḍupaṇṇā ca hariyo [ kaṇḍapakkā ca pāriyo ( sī . syā . pī .)].
114.
‘‘ Ete caññe ca bahavo , phalitā assame mama ;
Puppharukkhāpi bahavo , pupphitā mama assame .
115.
‘‘ Āluvā ca kaḷambā ca , biḷālī takkalāni ca ;
Ālakā tālakā ceva , vijjanti assame mama .
116.
‘‘ Assamassāvidūre me , mahājātassaro ahu ;
Acchodako sītajalo , supatittho manoramo .
117.
‘‘ Padumuppalā bahū tattha , puṇḍarīkasamāyutā ;
Mandālakehi
P2.347 sañchannā , nānāgandhasameritā . 118.
‘‘ Gabbhaṃ gaṇhanti padumā , aññe pupphanti kesarī ;
Opupphapattā
T1.546 tiṭṭhanti , padumākaṇṇikā bahū . 119.
‘‘ Madhu bhisamhā savati , khīraṃ sappi mulāḷibhi ;
Samantā tena gandhena , nānāgandhasameritā .
120.
‘‘ Kumudā
M1.407 ambagandhi ca , nayitā dissare bahū ;Jātassarassānukūlaṃ , ketakā pupphitā bahū .
121.
‘‘ Suphullā
V1.382 bandhujīvā ca , setavārī sugandhikā ;Kumbhilā susumārā ca , gahakā tattha jāyare .
122.
‘‘ Uggāhakā ajagarā , tattha jātassare bahū ;
Pāṭhīnā pāvusā macchā , balajā muñjarohitā .
123.
‘‘ Macchakacchapasañchannā , atho papaṭakāhi [ pampaṭakehi ( sī .), sapaṭakehi ( syā .), pappaṭakehi ( pī )] ca ;
Pārevatā ravihaṃsā , kukutthā [ kukkutthā ( syā . ka .), kutthakā ( pī .)] ca nadīcarā .
124.
‘‘ Dindibhā [ ṭiṭṭibhā ( pī .)] cakkavākā ca , pampakā jīvajīvakā ;
Kalandakā ukkusā ca , senakā uddharā bahū .
125.
‘‘ Koṭṭhakā sukapotā ca , tuliyā camarā bahū ;
Kāreniyo [ kāseniyā ( syā .)] ca tilakā [ kilakā ( ka .)], upajīvanti taṃ saraṃ .
126.
‘‘ Sīhā byagghā ca dīpī ca , acchakokataracchakā ;
Vānarā kinnarā ceva , dissanti mama assame .
127.
‘‘ Tāni gandhāni ghāyanto , bhakkhayanto phalānahaṃ ;
Gandhodakaṃ pivanto ca , vasāmi mama assame .
128.
‘‘ Eṇīmigā varāhā ca , pasadā khuddarūpakā ;
Aggikā
T1.547 jotikā ceva , vasanti mama assame . 129.
‘‘ Haṃsā koñcā mayūrā ca , sālikāpi ca kokilā ;
Majjārikā [ mañjarikā ( sī . syā . pī .)] bahū tattha , kosikā poṭṭhasīsakā .
130.
‘‘ Pisācā dānavā ceva , kumbhaṇḍā rakkhasā bahū ;
Garuḷā pannagā ceva , vasanti mama assame .
131.
‘‘ Mahānubhāvā isayo , santacittā samāhitā ;
Kamaṇḍaludharā
P2.348 sabbe , ajinuttaravāsanā ;Jaṭābhārabharitāva [ te jaṭābhārabharitā ( sī . pī .), jaṭābhārabharitā ca ( syā .)], vasanti mama assame .
132.
‘‘ Yugamattañca
M1.408 pekkhantā , nipakā santavuttino ;Lābhālābhena santuṭṭhā , vasanti mama assame .
133.
‘‘ Vākacīraṃ dhunantā te , phoṭentājinacammakaṃ ;
Sabalehi upatthaddhā , gacchanti ambare tadā .
134.
‘‘ Na te dakaṃ āharanti , kaṭṭhaṃ vā aggidārukaṃ ;
Sayañca upasampannā , pāṭihīrassidaṃ phalaṃ .
135.
‘‘ Lohadoṇiṃ
V1.383 gahetvāna , vanamajjhe vasanti te ;Kuñjarāva mahānāgā , asambhītāva kesarī .
136.
‘‘ Aññe gacchanti goyānaṃ , aññe pubbavidehakaṃ [ pubbavidehanaṃ ( syā . pī . ka .)];
Aññe ca uttarakuruṃ , sakaṃ balamavassitā [ balamapassitā ( syā . pī . ka .)].
137.
‘‘ Tato piṇḍaṃ āharitvā , paribhuñjanti ekato ;
Sabbesaṃ pakkamantānaṃ , uggatejāna tādinaṃ .
138.
‘‘ Ajinacammasaddena
T1.548 , vanaṃ saddāyate tadā ;Edisā te mahāvīra , sissā uggatapā mama .
139.
‘‘ Parivuto ahaṃ tehi , vasāmi mama assame ;
Tositā sakakammena , vinītāpi samāgatā .
140.
‘‘ Ārādhayiṃsu maṃ ete , sakakammābhilāsino ;
Sīlavanto ca nipakā , appamaññāsu kovidā .
141.
‘‘ Padumuttaro lokavidū , āhutīnaṃ paṭiggaho ;
Samayaṃ saṃviditvāna , upagacchi vināyako .
142.
‘‘ Upagantvāna sambuddho , ātāpī nipako muni ;
Pattaṃ paggayha sambuddho , bhikkhāya mamupāgami .
143.
‘‘ Upāgataṃ mahāvīraṃ , jalajuttamanāyakaṃ ;
Tiṇasantharaṃ [ tiṇattharaṃ ( syā .), tiṇatthataṃ ( ka .)] paññāpetvā , sālapupphehi okiriṃ .
144.
‘‘ Nisādetvāna
M1.409 [ nisīdetvāna ( sī .), nisīditvāna ( syā . pī .)] sambuddhaṃ , haṭṭho saṃviggamānaso ;Khippaṃ pabbatamāruyha , agaḷuṃ [ agaruṃ ( sī .)] aggahiṃ ahaṃ .
145.
‘‘ Kumbhamattaṃ gahetvāna , panasaṃ devagandhikaṃ ;
Khandhe āropayitvāna , upagacchiṃ vināyakaṃ .
146.
‘‘ Phalaṃ
P2.349 buddhassa datvāna , agaḷuṃ anulimpahaṃ ;Pasannacitto sumano , buddhaseṭṭhaṃ avandihaṃ .
147.
‘‘ Padumuttaro lokavidū , āhutīnaṃ paṭiggaho ;
Isimajjhe
T1.549 nisīditvā , imā gāthā abhāsatha . 148.
‘‘‘ Yo me phalañca agaḷuṃ , āsanañca adāsi me ;
Tamahaṃ kittayissāmi , suṇātha mama bhāsato .
149.
‘‘‘ Gāme
V1.384 vā yadi vāraññe , pabbhāresu guhāsu vā ;Imassa cittamaññāya , nibbattissati bhojanaṃ .
150.
‘‘‘ Devaloke manusse vā , upapanno ayaṃ naro ;
Bhojanehi ca vatthehi , parisaṃ tappayissati .
151.
‘‘‘ Upapajjati yaṃ yoniṃ , devattaṃ atha mānusaṃ ;
Akkhobhabhogo hutvāna , saṃsarissatiyaṃ naro .
152.
‘‘‘ Tiṃsakappasahassāni , devaloke ramissati ;
Sahassakkhattuṃ rājā ca , cakkavattī bhavissati .
153.
‘‘‘ Ekasattatikkhattuñca , devarajjaṃ karissati ;
Padesarajjaṃ vipulaṃ , gaṇanāto asaṅkhiyaṃ .
154.
‘‘‘ Kappasatasahassamhi , okkākakulasambhavo ;
Gotamo nāma gottena , satthā loke bhavissati .
155.
‘‘‘ Tassa dhammesu dāyādo , oraso dhammanimmito [( upasīvo nāma nāmena , hessati satthu sāvako )( syā .)];
Sabbāsave pariññāya , viharissatināsavo ’.
156.
‘‘ Suladdhalābho laddho me , yohaṃ addakkhiṃ nāyakaṃ ;
Tisso vijjā anuppattā , kataṃ buddhassa sāsanaṃ .
157.
‘‘ Gāme
T1.550M1.410 vā yadi vāraññe , pabbhāresu guhāsu vā ;Mama saṅkappamaññāya , bhojanaṃ hoti me sadā .
158.
‘‘ Kilesā jhāpitā mayhaṃ … pe … viharāmi anāsavo .
159.
‘‘ Svāgataṃ vata me āsi … pe … kataṃ buddhassa sāsanaṃ .
160.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ āyasmā upasīvo [ upasivo ( ka .)] thero imā gāthāyo abhāsitthāti .
Upasīvattherassāpadānaṃ pañcamaṃ .