9. Subhaddattheraapadānaṃ
101.
‘‘ Padumuttaro
P1.100 lokavidū , āhutīnaṃ paṭiggaho ;Janataṃ uddharitvāna , nibbāyati mahāyaso .
102.
‘‘ Nibbāyante ca sambuddhe , dasasahassi kampatha ;
Janakāyo mahā āsi , devā sannipatuṃ tadā .
103.
‘‘ Candanaṃ pūrayitvāna , tagarāmallikāhi ca ;
Haṭṭho haṭṭhena cittena , āropayiṃ [ ālepesiṃ ( sī .), āropesiṃ ( syā .)] naruttamaṃ .
104.
‘‘ Mama saṅkappamaññāya , satthā loke anuttaro ;
Nipannakova sambuddho , imā gāthā abhāsatha .
105.
‘‘‘ Yo
T1.144 me pacchimake kāle , gandhamālena [ gandhamallena ( syā . ka .) napuṃsakekattaṃ manasikātabbaṃ ] chādayi ;Tamahaṃ kittayissāmi , suṇātha mama bhāsato .
106.
‘‘‘ Ito cuto ayaṃ poso , tusitakāyaṃ gamissati ;
Tattha rajjaṃ karitvāna , nimmānaṃ so gamissati .
107.
‘‘‘ Eteneva upāyena , datvā mālaṃ [ malyaṃ ( sī .), mallaṃ ( syā . ka .)] varuttamaṃ ;
Sakakammābhiraddho so , sampattiṃ anubhossati .
108.
‘‘‘ Punāpi
V1.99 tusite kāye , nibbattissatiyaṃ naro ;Tamhā kāyā cavitvāna , manussattaṃ gamissati .
109.
‘‘‘ Sakyaputto mahānāgo , aggo loke sadevake ;
Bodhayitvā bahū satte , nibbāyissati cakkhumā .
110.
‘‘‘ Tadā
M1.112 sopagato santo , sukkamūlena codito ;Upasaṅkamma sambuddhaṃ , pañhaṃ pucchissati tadā .
111.
‘‘‘ Hāsayitvāna sambuddho , sabbaññū lokanāyako ;
Puññakammaṃ pariññāya , saccāni vivarissati .
112.
‘‘‘ Āraddho ca ayaṃ pañho , tuṭṭho ekaggamānaso ;
Satthāraṃ abhivādetvā , pabbajjaṃ yācayissati .
113.
‘‘‘ Pasannamānasaṃ disvā , sakakammena tositaṃ ;
Pabbājessati so buddho , aggamaggassa kovido .
114.
‘‘‘ Vāyamitvānayaṃ poso , sammāsambuddhasāsane ;
Sabbāsave pariññāya , nibbāyissatināsavo ’.
Pañcamabhāṇavāraṃ .
115.
‘‘ Pubbakammena
T1.145P1.101 saṃyutto , ekaggo susamāhito ;Buddhassa oraso putto , dhammajomhi sunimmito .
116.
‘‘ Dhammarājaṃ upagamma , apucchiṃ pañhamuttamaṃ ;
Kathayanto ca me pañhaṃ , dhammasotaṃ upānayi .
117.
‘‘ Tassāhaṃ dhammamaññāya , vihāsiṃ sāsane rato ;
Sabbāsave pariññāya , viharāmi anāsavo .
118.
‘‘ Satasahassito kappe , jalajuttamanāyako ;
Nibbāyi anupādāno , dīpova telasaṅkhayā .
119.
‘‘ Sattayojanikaṃ āsi , thūpañca ratanāmayaṃ ;
Dhajaṃ tattha apūjesiṃ , sabbabhaddaṃ manoramaṃ .
120.
‘‘ Kassapassa ca buddhassa , tisso nāmaggasāvako ;
Putto me oraso āsi , dāyādo jinasāsane .
121.
‘‘ Tassa hīnena manasā , vācaṃ bhāsiṃ abhaddakaṃ ;
Tena kammavipākena , pacchā me āsi bhaddakaṃ [ pacchime addasaṃ jinaṃ ( sī .)].
122.
‘‘ Upavattane
V1.100 sālavane , pacchime sayane muni ;Pabbājesi mahāvīro , hito kāruṇiko jino .
123.
‘‘ Ajjeva
M1.113 dāni pabbajjā , ajjeva upasampadā ;Ajjeva parinibbānaṃ , sammukhā dvipaduttame .
124.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ
T1.146 sudaṃ āyasmā subhaddo thero imā gāthāyo abhāsitthāti .Subhaddattherassāpadānaṃ navamaṃ .