8. Uttiyattheraapadānaṃ
169.
‘‘ Candabhāgānadītīre , susumāro ahaṃ tadā ;
Sagocarappasutohaṃ [ sabhojanapasutāhaṃ ( syā . ka .)], nadītitthaṃ agacchahaṃ .
170.
‘‘ Siddhattho tamhi samaye , sayambhū aggapuggalo ;
Nadiṃ taritukāmo so , nadītitthaṃ upāgami .
171.
‘‘ Upāgate ca [ upāgatamhi ( syā . ka .)] sambuddhe , ahampi tatthupāgamiṃ ;
Upagantvāna sambuddhaṃ , imaṃ vācaṃ udīrayiṃ .
172.
‘‘‘ Abhirūha mahāvīra , tāressāmi ahaṃ tuvaṃ ;
Pettikaṃ visayaṃ mayhaṃ , anukampa mahāmuni ’.
173.
‘‘ Mama uggajjanaṃ sutvā , abhirūhi mahāmuni ;
Haṭṭho haṭṭhena cittena , tāresiṃ lokanāyakaṃ .
174.
‘‘ Nadiyā
T1.114 pārime tīre , siddhattho lokanāyako ;Assāsesi mamaṃ tattha , amataṃ pāpuṇissasi .
175.
‘‘ Tamhā
V1.78 kāyā cavitvāna , devalokaṃ āgacchahaṃ ;Dibbasukhaṃ anubhaviṃ , accharāhi purakkhato .
176.
‘‘ Sattakkhattuñca
M1.89 devindo , devarajjamakāsahaṃ ;Tīṇikkhattuṃ cakkavattī , mahiyā issaro ahuṃ .
177.
‘‘ Vivekamanuyuttohaṃ
P1.80 , nipako ca susaṃvuto ;Dhāremi antimaṃ dehaṃ , sammāsambuddhasāsane .
178.
‘‘ Catunnavutito kappe , tāresiṃ yaṃ narāsabhaṃ ;
Duggatiṃ nābhijānāmi , taraṇāya idaṃ phalaṃ .
179.
‘‘ Paṭisambhidā catasso , vimokkhāpi ca aṭṭhime ;
Chaḷabhiññā sacchikatā , kataṃ buddhassa sāsanaṃ ’’.
Itthaṃ sudaṃ āyasmā uttiyo [ uttiriyo ( sī .)] thero imā gāthāyo abhāsitthāti .
Uttiyattherassāpadānaṃ aṭṭhamaṃ .