Rasaggasaggitālakkhaṇavaṇṇanā
226. Tilaphalamattampi bhojanaṃ .
Sabbattha pharatīti sabbā rasāharaṇiyo anussarantaṃ sabhāvena sabbasmiṃ kāye pharati .
Samā hutvā vahantīti avisamā ujukā hutvā pavattanti .
Ārogyakaraṇakamman ti arogabhāvakaraṃ sattānaṃ aviheṭhanakammaṃ .
Madhurādibhedaṃ rasaṃ gasati harati etehi , sayameva vā taṃ gasanti gilanti anto pavesentīti rasaggasā , rasaggasānaṃ aggā rasaggasaggā , te ettha santīti rasaggasaggī , tadeva lakkhaṇaṃ .
Bhavati hi abhinnepi vatthusmiṃ taggatavisesāvabodhanatthaṃ bhinnaṃ viya katvā vohāro yathā ‘‘ silāputtakassa sarīran ’’ ti
P3.155 .
Rasaggasaggitāsaṅkhātaṃ vā lakkhaṇaṃ rasaggasaggilakkhaṇaṃ . 227. Vadha -saddo ‘‘ attānaṃ vadhitvā vadhitvā rodatī ’’ tiādīsu ( pāci .879) bādhanatthopi hotīti tato visesanatthaṃ ‘‘ māraṇavadhenā ’’ ti vuttaṃ , māraṇasaṅkhātena vadhenāti attho .
Bādhanattho eva vā vadha -saddo , māraṇena , bādhanena cāti attho .
Ubbādhanāyāti bandhanāgāre pakkhipitvā uddhaṃ uddhaṃ bādhanena .
Tenāha ‘‘ bandhanāgārappavesanenā ’’ ti .