Bodhipakkhiyabhāvanāvaṇṇanā
138. Bodhi vuccati maggasammādiṭṭhi , cattāri ariyasaccāni bujjhatīti katvā , sabhāvato , taṃsabhāvato ca tassā pakkhe bhavāti bodhipakkhiyā , sativīriyādayo dhammā , tesaṃ bodhipakkhiyānaṃ .
Paṭipāṭiyāti bodhipakkhiyadesanāpaṭipāṭiyā .
Bhāvanaṃ anugantvāti anukkamena pavattaṃ bhāvanaṃ patvā .
Tenāha ‘‘ paṭipajjitvā ’’ ti .
Saupādisesāya nibbānadhātuyā vasena khīṇāsavassa seṭṭhabhāvaṃ lokassa pākaṭaṃ katvā dassetuṃ sakkā , na itarāya sabbaso apaññattibhāvūpagamane tassa
M3.51 adassanatoti vuttaṃ ‘‘ parinibbātīti kilesaparinibbānena parinibbāyatī ’’ ti .Vinivattetvāti tato catuvaṇṇato nīharitvā .
140. Tamevatthan ti ‘‘ khīṇāsavova devamanussesu seṭṭho ’’ ti vuttamevatthaṃ .
Seṭṭhacchedakavādamevāti
P3.64 jātibrāhmaṇānaṃ seṭṭhabhāvasamucchedakameva kathaṃ .
Dassetvā bhāsitvā .
Suttantaṃ vinivattetvāti pubbe lokiyadhammasandassanavasena pavattaṃ aggaññasuttaṃ ‘‘ sattannaṃ bodhipakkhiyānaṃ dhammānaṃ bhāvanamanvāyā ’’ tiādinā tato vinivattetvā nīharitvā tena asaṃsaṭṭhaṃ katvā .Āvajjantāti samannāharantā .
Anumajjantāti pubbenāparaṃ atthato vicarantāti .
Aggaññasuttavaṇṇanāya līnatthappakāsanā .
5. Sampasādanīyasuttavaṇṇanā