Āyuvaṇṇādiparihānikathāvaṇṇanā
91. Balavalobhattāti ‘‘ imasmiṃ loke idāni daliddamanussā nāma bahū , tesaṃ sabbesaṃ dhane anuppadiyamāne mayhaṃ kosassa parikkhayo hotī ’’ ti evaṃ uppannabalavalobhattā .
Uparūparibhūmīsūti chakāmasaggasaṅkhātāsu uparūparikāmabhūmīsu .
Kammassa phalaṃ aggaṃ nāma , taṃ panettha uddhagāmīti āha ‘‘ uddhaṃ aggaṃ assā ’’ ti .
Sagge niyuttā , saggappayojanāti vā sovaggikā .
Dasannaṃ visesānan ti dibbaāyuvaṇṇayasasukhaādhipateyyānañceva dibbarūpādīnañca phalavisesānaṃ
V3.28 .
Vaṇṇa ggahaṇena cettha sako attabhāvavaṇṇo gahito , rūpa ggahaṇena bahiddhā rūpārammaṇaṃ . 92. Suṭṭhu
P3.38 nisiddhan ti yathāyaṃ iminā attabhāvena adinnaṃ ādātuṃ na sakkoti , evaṃ sammadeva tato nisedhitaṃ katvā .Mūlahatan ti jīvitā voropanena mūle eva hataṃ .
96. Rāgavasena caraṇaṃ carittaṃ , carittameva cārittaṃ , methunanti adhippāyo , taṃ pana ‘‘ paresaṃ dāresū ’’ ti vuttattā ‘‘ micchācāran ’’ ti āha .
101. Mātucchādikā upari sayameva vakkhati .
Atibalavalobhoti ativiya balavā bahalakileso , yena akāle , adese ca pavattati .
Micchādhammoti micchā viparīto avisabhāgavatthuko lobhadhammo .
Tenāha ‘‘ purisānan ’’ tiādi .
Tassa bhāvoti yena mettākaruṇāpubbaṅgamena cittena puggalo ‘‘ matteyyo ’’ ti vuccati , so tassa yathāvuttacittuppādo , taṃsamuṭṭhānā ca kiriyā matteyyatā .
Tenāha ‘‘ mātari sammā paṭipattiyā etaṃ nāman ’’ ti
M3.31 .Yā sammā pajjitabbe sammā appaṭipatti , sopi doso agāravakiriyādibhāvato .
Vippaṭipattiyaṃ pana vattabbameva natthīti āha ‘‘ tassā abhāvo ceva tappaṭipakkhatā ca amatteyyatā ’’ ti .
Kule jeṭṭhānan ti attano kule vuddhānaṃ mahāpitucūḷapitujeṭṭhakabhātikādīnaṃ .