Sattussadatālakkhaṇavaṇṇanā
208. Raso jāto etesanti rasitāni , mahārasāni .
Tenāha ‘‘ rasasampannānan ’’ ti .
Piṭṭhakhajjakādīnīti pūpasakkhalimodakādīni .
Ādi -saddena pana kadaliphalādiṃ saṅgaṇhāti .
Piṭṭhaṃ pakkhipitvā pacitabbapāyasaṃ piṭṭhapāyasaṃ .
Ādi -saddena tathārūpabhojjayāguādiṃ saṅgaṇhāti .
Idha
M3.110V3.99P3.141 kammasarikkhakaṃ nāma sattussadatālakkhaṇassa paṇītalābhitāya ñāpakanimittabhāvo .
Iminā nayena tattha tattha lakkhaṇe kammasarikkhakaṃ niddhāretvā yojetabbaṃ .Khajjabhojjādijotakan ti khajjabhojjādilābhajotakaṃ .
Lābhasaṃvattanikassa kammassa phalaṃ ‘‘ lābhasaṃvattanikan ’’ ti kāraṇūpacārena vadati .
Tadatthajotakan ti vā tassa paṇītabhojanadāyakattasaṅkhātassa atthassa jotakaṃ .
209. Uttamo aggarasadāyakoti sabbasattānaṃ uttamo lokanātho aggānaṃ paṇītānaṃ rasānaṃ dāyako .
Uttamānaṃ aggarasānan ti paṇītesupi paṇītarasānaṃ .
Tadādhigacchatīti ettha ā -kāro nipātamattanti āha ‘‘ taṃ adhigacchatī ’’ ti .
Lābhiruttaman ti ra-kāro padasandhikaro .