11. Tatiyapabbatasuttaṃ
84. Sāvatthiyaṃ viharati … pe …‘‘ seyyathāpi
P2.139 , bhikkhave , puriso sinerussa pabbatarājassa satta muggamattiyo pāsāṇasakkharā upanikkhipeyya .Taṃ kiṃ maññatha , bhikkhave , katamaṃ nu kho bahutaraṃ , yā vā satta muggamattiyo pāsāṇasakkharā upanikkhittā yo vā sineru [ upanikkhittā , sineru vā ( sī .)] pabbatarājā ’’ ti ?
‘‘ Etadeva , bhante , bahutaraṃ yadidaṃ sineru pabbatarājā ;
appamattikā satta muggamattiyo pāsāṇasakkharā upanikkhittā .
Neva satimaṃ kalaṃ upenti na sahassimaṃ
M1.357 kalaṃ upenti na satasahassimaṃ kalaṃ upenti sineruṃ pabbatarājānaṃ upanidhāya satta muggamattiyo pāsāṇasakkharā upanikkhittā ’’ ti .‘‘ Evameva kho , bhikkhave , ariyasāvakassa diṭṭhisampannassa puggalassa
T2.169 adhigamaṃ upanidhāya aññatitthiyasamaṇabrāhmaṇaparibbājakānaṃ adhigamo neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti .Evaṃ mahādhigamo , bhikkhave , diṭṭhisampanno puggalo , evaṃ mahābhiñño ’’ ti .
Ekādasamaṃ .
Abhisamayasaṃyuttaṃ samattaṃ .
Tassuddānaṃ –
Nakhasikhā pokkharaṇī , sambhejjaudake ca dve ;
Dve pathavī dve samuddā , tayo ca pabbatūpamāti .