1. Buddhavaggo

1. Paṭiccasamuppādasuttaṃ

1. EvaṃT2.1M1.243P2.1V1.1 me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme .

Tatra kho bhagavā bhikkhū āmantesi –

‘‘ bhikkhavo ’’ ti .

‘‘ Bhadante ’’ ti te bhikkhū bhagavato paccassosuṃ .

Bhagavā etadavoca –

‘‘ paṭiccasamuppādaṃ vo , bhikkhave , desessāmi ;

taṃ suṇātha , sādhukaṃ manasi karotha ;

bhāsissāmī ’’ ti .

‘‘ Evaṃ , bhante ’’ ti kho te bhikkhū bhagavato paccassosuṃ .

Bhagavā etadavoca –

‘‘ KatamoV1.2 ca , bhikkhave , paṭiccasamuppādo ?

Avijjāpaccayā , bhikkhave , saṅkhārā ;

saṅkhārapaccayā viññāṇaṃ ;

viññāṇapaccayā nāmarūpaṃ ;

nāmarūpapaccayā saḷāyatanaṃ ;

saḷāyatanapaccayā phasso ;

phassapaccayā vedanā ;

vedanāpaccayā taṇhā ;

taṇhāpaccayā upādānaṃ ;

upādānapaccayā bhavo ;

bhavapaccayā jātiT2.2 ;

jātipaccayā jarāmaraṇaṃ sokaparidevadukkhadomanassupāyāsā sambhavanti .

Evametassa kevalassa dukkhakkhandhassa samudayo hoti .

Ayaṃ vuccati , bhikkhave , paṭiccasamuppādo .

‘‘ AvijjāyaM1.244 tveva asesavirāganirodhā saṅkhāranirodho ;

saṅkhāranirodhāP2.2 viññāṇanirodho ;

viññāṇanirodhā nāmarūpanirodho ;

nāmarūpanirodhā saḷāyatananirodho ;

saḷāyatananirodhā phassanirodho ;

phassanirodhā vedanānirodho ;

vedanānirodhā taṇhānirodho ;

taṇhānirodhā upādānanirodho ;

upādānanirodhā bhavanirodho ;

bhavanirodhā jātinirodho ;

jātinirodhā jarāmaraṇaṃ sokaparidevadukkhadomanassupāyāsā nirujjhanti .

Evametassa kevalassa dukkhakkhandhassa nirodho hotī ’’ ti .

Idamavoca bhagavā .

Attamanā te bhikkhū bhagavato bhāsitaṃ abhinandunti .

Paṭhamaṃ .

2. Vibhaṅgasuttaṃ

2. Sāvatthiyaṃ viharati … pe …‘‘ paṭiccasamuppādaṃ vo , bhikkhave , desessāmi vibhajissāmi .

Taṃ suṇātha , sādhukaṃ manasi karotha ;

bhāsissāmī ’’ ti .

‘‘ Evaṃ , bhante ’’ ti kho te bhikkhū bhagavato paccassosuṃ .

Bhagavā etadavoca –

‘‘ Katamo ca , bhikkhave , paṭiccasamuppādo ?

Avijjāpaccayā , bhikkhave , saṅkhārā ;

saṅkhārapaccayā viññāṇaṃ ;

viññāṇapaccayā nāmarūpaṃ ;

nāmarūpapaccayā saḷāyatanaṃ ;

saḷāyatanapaccayā phasso ;

phassapaccayā vedanā ;

vedanāpaccayā taṇhā ;

taṇhāpaccayā upādānaṃ ;

upādānapaccayā bhavo ;

bhavapaccayā jātiT2.3 ;

jātipaccayā jarāmaraṇaṃ sokaparidevadukkhadomanassupāyāsā sambhavanti .

Evametassa kevalassa dukkhakkhandhassa samudayo hoti .

‘‘ Katamañca , bhikkhave , jarāmaraṇaṃ ?

Yā tesaṃ tesaṃ sattānaṃ tamhi tamhi sattanikāye jarā jīraṇatā khaṇḍiccaṃ pāliccaṃ valittacatā āyuno saṃhāni indriyānaṃ paripāko ;

ayaṃ vuccatiV1.3 jarā .

Yā tesaṃP2.3 tesaṃ sattānaṃ tamhā tamhā sattanikāyā cuti cavanatā bhedo antaradhānaṃ maccu maraṇaṃ kālakiriyā khandhānaṃ bhedo kaḷevarassa nikkhepo ()[( jīvitindriyassa upacchedo )( syā . kaṃ .) evamuparipi , aṭṭhakathāyaṃ pana na dissati ], idaṃ vuccati maraṇaṃ .

Iti ayañca jarā , idañca maraṇaṃ .

Idaṃ vuccati , bhikkhave , jarāmaraṇaṃ .

‘‘ Katamā ca , bhikkhave , jāti ?

Yā tesaṃ tesaṃ sattānaṃ tamhi tamhi sattanikāye jāti sañjāti okkanti nibbatti abhinibbatti khandhānaṃ pātubhāvo āyatanānaṃ paṭilābho .

Ayaṃ vuccati , bhikkhave , jāti .

‘‘ KatamoM1.245 ca , bhikkhave , bhavo ?

Tayo me , bhikkhave , bhavā – kāmabhavo , rūpabhavo , arūpabhavo .

Ayaṃ vuccati , bhikkhave , bhavo .

‘‘ Katamañca , bhikkhave , upādānaṃ ?

Cattārimāni , bhikkhave , upādānāni – kāmupādānaṃ , diṭṭhupādānaṃ , sīlabbatupādānaṃ , attavādupādānaṃ .

Idaṃ vuccati , bhikkhave , upādānaṃ .

‘‘ Katamā ca , bhikkhave , taṇhā ?

Chayime , bhikkhave , taṇhākāyā – rūpataṇhā , saddataṇhā , gandhataṇhā , rasataṇhā , phoṭṭhabbataṇhā , dhammataṇhā .

Ayaṃ vuccati , bhikkhave , taṇhā .

‘‘ KatamāT2.4 ca , bhikkhave , vedanā ?

Chayime , bhikkhave , vedanākāyā – cakkhusamphassajā vedanā , sotasamphassajā vedanā , ghānasamphassajā vedanā , jivhāsamphassajā vedanā , kāyasamphassajā vedanā , manosamphassajā vedanā .

Ayaṃ vuccati , bhikkhave , vedanā .

‘‘ Katamo ca , bhikkhave , phasso ?

Chayime , bhikkhave , phassakāyā – cakkhusamphasso , sotasamphasso , ghānasamphasso , jivhāsamphasso , kāyasamphasso , manosamphasso .

Ayaṃ vuccati , bhikkhave , phasso .

‘‘ Katamañca , bhikkhave , saḷāyatanaṃ ?

Cakkhāyatanaṃ , sotāyatanaṃ , ghānāyatanaṃ , jivhāyatanaṃ , kāyāyatanaṃ , manāyatanaṃ – idaṃ vuccati , bhikkhave , saḷāyatanaṃ .

‘‘ KatamañcaV1.4 , bhikkhave , nāmarūpaṃ ?

Vedanā , saññā , cetanā , phasso , manasikāro – idaṃ vuccati nāmaṃ .

Cattāro caP2.4 mahābhūtā , catunnañca mahābhūtānaṃ upādāyarūpaṃ .

Idaṃ vuccati rūpaṃ .

Iti idañca nāmaṃ , idañca rūpaṃ .

Idaṃ vuccati , bhikkhave , nāmarūpaṃ .

‘‘ Katamañca , bhikkhave , viññāṇaṃ ?

Chayime , bhikkhave , viññāṇakāyā – cakkhuviññāṇaṃ , sotaviññāṇaṃ , ghānaviññāṇaṃ , jivhāviññāṇaṃ , kāyaviññāṇaṃ , manoviññāṇaṃ .

Idaṃ vuccati , bhikkhave , viññāṇaṃ .

‘‘ Katame ca , bhikkhave , saṅkhārā ?

Tayome , bhikkhave , saṅkhārā – kāyasaṅkhāro , vacīsaṅkhāro , cittasaṅkhāro .

Ime vuccanti , bhikkhave , saṅkhārā .

‘‘ KatamāT2.5 ca , bhikkhave , avijjā ?

Yaṃ kho , bhikkhave , dukkhe aññāṇaṃ , dukkhasamudaye aññāṇaṃ , dukkhanirodhe aññāṇaṃ , dukkhanirodhagāminiyā paṭipadāya aññāṇaṃ .

Ayaṃ vuccati , bhikkhave , avijjā .

‘‘ ItiM1.246 kho , bhikkhave , avijjāpaccayā saṅkhārā ;

saṅkhārapaccayā viññāṇaṃ … pe … evametassa kevalassa dukkhakkhandhassa samudayo hoti .

Avijjāya tveva asesavirāganirodhā saṅkhāranirodho ;

saṅkhāranirodhā viññāṇanirodho … pe … evametassa kevalassa dukkhakkhandhassa nirodho hotī ’’ ti .

Dutiyaṃ .

3. Paṭipadāsuttaṃ

3. Sāvatthiyaṃ viharati … pe …‘‘ micchāpaṭipadañca vo , bhikkhave , desessāmi sammāpaṭipadañca .

Taṃ suṇātha , sādhukaṃ manasi karotha ;

bhāsissāmī ’’ ti .

‘‘ Evaṃ bhante ’’ ti kho te bhikkhū bhagavato paccassosuṃ .

Bhagavā etadavoca –

‘‘ Katamā ca , bhikkhave , micchāpaṭipadā ?

Avijjāpaccayā , bhikkhave , saṅkhārā ;

saṅkhārapaccayāV1.5 viññāṇaṃ … pe … evametassa kevalassa dukkhakkhandhassa samudayo hoti .

Ayaṃ vuccati , bhikkhave , micchāpaṭipadā .

‘‘ KatamāP2.5 ca , bhikkhave , sammāpaṭipadā ?

Avijjāya tveva asesavirāganirodhā saṅkhāranirodho ;

saṅkhāranirodhā viññāṇanirodho … pe … evametassa kevalassa dukkhakkhandhassa nirodho hoti .

Ayaṃ vuccati , bhikkhave , sammāpaṭipadā ’’ ti .

Tatiyaṃ .

4. Vipassīsuttaṃ

4. Sāvatthiyaṃ viharati … pe …‘‘ vipassissa , bhikkhave , bhagavato arahato sammāsambuddhassaT2.6 pubbeva sambodhā anabhisambuddhassa bodhisattasseva sato etadahosi –

‘ kicchaṃ vatāyaṃ loko āpanno jāyati ca jīyati ca mīyati ca cavati ca upapajjati ca .

Atha ca panimassa dukkhassa nissaraṇaṃ nappajānāti jarāmaraṇassa .

Kudāssu nāma imassa dukkhassa nissaraṇaṃ paññāyissati jarāmaraṇassā ’’’ ti ?

‘‘ Atha kho bhikkhave , vipassissa bodhisattassa etadahosi –

‘ kimhi nu kho sati jarāmaraṇaṃ hoti , kiṃpaccayā jarāmaraṇan ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ jātiyā kho sati jarāmaraṇaṃ hoti , jātipaccayā jarāmaraṇan ’’’ ti .

‘‘ AthaM1.247 kho , bhikkhave , vipassissa bodhisattassa etadahosi –

‘ kimhi nu kho sati jāti hoti , kiṃpaccayā jātī ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ bhave kho sati jāti hoti , bhavapaccayā jātī ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho sati bhavo hoti , kiṃpaccayā bhavo ’ ti ?

Atha kho , bhikkhave , vipassissa bodhisattassa yoniso manasikārāV1.6 ahu paññāya abhisamayo –

‘ upādāne kho sati bhavo hoti , upādānapaccayā bhavo ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho sati upādānaṃ hoti , kiṃpaccayā upādānan ’ ti ?

Atha kho , bhikkhave , vipassissa bodhisattassa yoniso manasikārāP2.6 ahu paññāya abhisamayo –

‘ taṇhāya kho sati upādānaṃT2.7 hoti , taṇhāpaccayā upādānan ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho sati taṇhā hoti , kiṃpaccayā taṇhā ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ vedanāya kho sati taṇhā hoti , vedanāpaccayā taṇhā ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho sati vedanā hoti , kiṃpaccayā vedanā ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ phasse kho sati vedanā hoti , phassapaccayā vedanā ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho sati phasso hoti , kiṃpaccayā phasso ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ saḷāyatane kho sati phasso hoti , saḷāyatanapaccayā phasso ’’’ ti .

‘‘ AthaM1.248 kho , bhikkhave , vipassissa bodhisattassa etadahosi –

‘ kimhi nu kho sati saḷāyatanaṃ hoti , kiṃpaccayā saḷāyatanan ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ nāmarūpe kho sati saḷāyatanaṃ hoti , nāmarūpapaccayā saḷāyatanan ’’’ ti .

‘‘ AthaV1.7 kho , bhikkhave , vipassissa bodhisattassa etadahosi –

‘ kimhi nu kho sati nāmarūpaṃ hoti , kiṃpaccayā nāmarūpan ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ viññāṇe kho sati nāmarūpaṃ hotiT2.8 , viññāṇapaccayā nāmarūpan ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho sati viññāṇaṃ hoti , kiṃpaccayā viññāṇan ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ saṅkhāresu kho sati viññāṇaṃ hoti , saṅkhārapaccayā viññāṇan ’’’ ti .

‘‘ Atha kho , bhikkhave , vipassissa bodhisattassa etadahosiP2.7 –

‘ kimhi nu kho sati saṅkhārā honti , kiṃpaccayā saṅkhārā ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ avijjāya kho sati saṅkhārā honti , avijjāpaccayā saṅkhārā ’’’ ti .

‘‘ Iti hidaṃ avijjāpaccayā saṅkhārā ;

saṅkhārapaccayā viññāṇaṃ … pe … evametassa kevalassa dukkhakkhandhassa samudayo hoti .

‘ Samudayo , samudayo ’ ti kho , bhikkhave , vipassissa bodhisattassa pubbe ananussutesu dhammesu cakkhuṃ udapādi , ñāṇaṃ udapādi , paññā udapādi , vijjā udapādi , āloko udapādi .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho asati jarāmaraṇaṃ na hoti , kissa nirodhā jarāmaraṇanirodho ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ jātiyā kho asati jarāmaraṇaṃ na hoti , jātinirodhā jarāmaraṇanirodho ’’’ ti .

‘‘ AthaM1.249 kho , bhikkhave , vipassissa bodhisattassa etadahosi –

‘ kimhi nu kho asati jāti na hotiT2.9 , kissa nirodhā jātinirodho ’ ti ?

Atha kho , bhikkhave , vipassissa bodhisattassaV1.8 yoniso manasikārā ahu paññāya abhisamayo –

‘ bhave kho asati jāti na hoti , bhavanirodhā jātinirodho ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho asati bhavo na hoti , kissa nirodhā bhavanirodho ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ upādāne kho asati bhavo na hoti , upādānanirodhā bhavanirodho ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho asati upādānaṃ na hoti , kissa nirodhā upādānanirodho ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ taṇhāya kho asati upādānaṃ na hoti , taṇhānirodhā upādānanirodho ’’’ ti .

‘‘ AthaP2.8 kho , bhikkhave , vipassissa bodhisattassa etadahosi –

‘ kimhi nu kho asati taṇhā na hoti , kissa nirodhā taṇhānirodho ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ vedanāya kho asati taṇhā na hoti , vedanānirodhā taṇhānirodho ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho asati vedanā na hoti , kissa nirodhā vedanānirodho ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ phasse kho asati vedanā na hoti , phassanirodhāT2.10 vedanānirodho ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho asati phasso na hoti , kissa nirodhā phassanirodho ’ ti ?

Atha kho bhikkhave , vipassissa bodhisattassa yoniso manasikārā ahuM1.250 paññāya abhisamayo –

‘ saḷāyatane kho asati phasso na hoti , saḷāyatananirodhā phassanirodho ’’’ ti .

‘‘ AthaV1.9 kho , bhikkhave , vipassissa bodhisattassa etadahosi –

‘ kimhi nu kho asati saḷāyatanaṃ na hoti , kissa nirodhā saḷāyatananirodho ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ nāmarūpe kho asati saḷāyatanaṃ na hoti , nāmarūpanirodhā saḷāyatananirodho ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho asati nāmarūpaṃ na hoti , kissa nirodhā nāmarūpanirodho ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ viññāṇe kho asati nāmarūpaṃ na hoti , viññāṇanirodhā nāmarūpanirodho ’’’ ti .

‘‘ Atha kho , bhikkhave , vipassissa bodhisattassa etadahosi –

‘ kimhi nu kho asati viññāṇaṃ na hoti , kissa nirodhā viññāṇanirodho ’ ti ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ saṅkhāresu kho asati viññāṇaṃ na hoti , saṅkhāranirodhā viññāṇanirodho ’’’ ti .

‘‘ AthaP2.9 kho , bhikkhave , vipassissa bodhisattassa etadahosi –

‘ kimhi nu kho asati saṅkhārā na honti , kissa nirodhā saṅkhāranirodho ’ tiT2.11 ?

Atha kho , bhikkhave , vipassissa bodhisattassa yoniso manasikārā ahu paññāya abhisamayo –

‘ avijjāya kho asati saṅkhārā na honti , avijjānirodhā saṅkhāranirodho ’’’ ti .

‘‘ Iti hidaṃ avijjānirodhā saṅkhāranirodho ;

saṅkhāranirodhā viññāṇanirodho … pe … evametassa kevalassa dukkhakkhandhassa nirodho hotīti .

‘ Nirodho , nirodho ’ ti kho , bhikkhave , vipassissa bodhisattassa pubbe ananussutesu dhammesu cakkhuṃ udapādi , ñāṇaṃ udapādi , paññā udapādi , vijjā udapādi , āloko udapādi ’’.

Catutthaṃ .

( Sattannampi buddhānaṃ evaṃ vitthāretabbo ).

5. Sikhīsuttaṃ

5. SikhissaM1.251V1.10 , bhikkhave , bhagavato arahato sammāsambuddhassa … pe ….

6. Vessabhūsuttaṃ

6. Vessabhussa , bhikkhave , bhagavato arahato sammāsambuddhassa … pe ….

7. Kakusandhasuttaṃ

7. Kakusandhassa , bhikkhave , bhagavato arahato sammāsambuddhassa … pe ….

8. Koṇāgamanasuttaṃ

8. Koṇāgamanassa , bhikkhave , bhagavato arahato sammāsambuddhassa … pe ….

9. Kassapasuttaṃ

9. Kassapassa , bhikkhave , bhagavato arahato sammāsambuddhassa … pe ….

10. Gotamasuttaṃ

10.‘‘ PubbevaP2.10 me , bhikkhave , sambodhā anabhisambuddhassa bodhisattasseva sato etadahosi –

‘ kicchaṃ vatāyaṃ loko āpanno jāyati ca jīyati ca mīyati ca cavati ca upapajjati ca .

Atha ca panimassa dukkhassa nissaraṇaṃ nappajānāti jarāmaraṇassa .

Kudāssu nāma imassa dukkhassa nissaraṇaṃ paññāyissati jarāmaraṇassā ’’’ ti ?

‘‘ Tassa mayhaṃ , bhikkhave , etadahosi –

‘ kimhi nu kho sati jarāmaraṇaṃ hoti , kiṃpaccayāV1.11 jarāmaraṇan ’ tiT2.12 ?

Tassa mayhaṃ , bhikkhave , yoniso manasikārā ahu paññāya abhisamayo –

‘ jātiyā kho sati jarāmaraṇaṃ hoti , jātipaccayā jarāmaraṇan ’’’ ti .

‘‘ Tassa mayhaṃ , bhikkhave , etadahosi –

‘ kimhi nu kho sati jāti hoti … pe … bhavo … upādānaṃ … taṇhā … vedanā … phasso … saḷāyatanaṃ … nāmarūpaṃ … viññāṇaṃ … saṅkhārā honti , kiṃpaccayā saṅkhārā ’ ti ?

Tassa mayhaṃ , bhikkhaveM1.252 , yoniso manasikārā ahu paññāya abhisamayo –

‘ avijjāya kho sati saṅkhārā honti , avijjāpaccayā saṅkhārā ’’’ ti .

‘‘ Iti hidaṃ avijjāpaccayā saṅkhārā ;

saṅkhārapaccayā viññāṇaṃ … pe … evametassa kevalassa dukkhakkhandhassa samudayo hoti .

‘ Samudayo , samudayo ’ ti kho me , bhikkhave , pubbe ananussutesu dhammesu cakkhuṃ udapādi , ñāṇaṃ udapādi , paññā udapādi , vijjā udapādi , āloko udapādi .

‘‘ Tassa mayhaṃ , bhikkhave , etadahosi –

‘ kimhi nu kho asati jarāmaraṇaṃ na hoti , kissa nirodhā jarāmaraṇanirodho ’ ti ?

Tassa mayhaṃ , bhikkhave , yoniso manasikārā ahu paññāya abhisamayo –

‘ jātiyā kho asati jarāmaraṇaṃ na hoti , jātinirodhā jarāmaraṇanirodho ’’’ ti .

‘‘ Tassa mayhaṃ , bhikkhave , etadahosi –

‘ kimhi nu khoP2.11 asati jāti na hoti … pe … bhavo … upādānaṃ … taṇhā … vedanā … phasso … saḷāyatanaṃ … nāmarūpaṃ … viññāṇaṃ … saṅkhārā na honti , kissa nirodhā saṅkhāranirodho ’ ti ?

Tassa mayhaṃ , bhikkhave , yoniso manasikārā ahuT2.13 paññāya abhisamayo –

‘ avijjāya kho asati saṅkhārā na honti , avijjānirodhā saṅkhāranirodho ’’’ ti .

‘‘ Iti hidaṃ avijjānirodhā saṅkhāranirodho ;

saṅkhāranirodhā viññāṇanirodho … pe … evametassa kevalassa dukkhakkhandhassa nirodho hoti .

‘ Nirodho , nirodho ’ tiV1.12 kho me , bhikkhave , pubbe ananussutesu dhammesu cakkhuṃ udapādi , ñāṇaṃ udapādi , paññā udapādi , vijjā udapādi , āloko udapādī ’’ ti .

Dasamo .

Buddhavaggo paṭhamo .

Tassuddānaṃ –

Desanā vibhaṅgapaṭipadā ca ,

Vipassī sikhī ca vessabhū ;

Kakusandho koṇāgamano kassapo ,

Mahāsakyamuni ca gotamoti .

Issues

選擇版本

Nidānavaggo

Nidānavaggo

1. Buddhavaggo

1. Buddhavaggo

1. Paṭiccasamuppādasuttaṃ

2. Vibhaṅgasuttaṃ

3. Paṭipadāsuttaṃ

4. Vipassīsuttaṃ

5. Sikhīsuttaṃ

6. Vessabhūsuttaṃ

7. Kakusandhasuttaṃ

8. Koṇāgamanasuttaṃ

9. Kassapasuttaṃ

10. Gotamasuttaṃ

Issues

選擇版本

Nidānavaggo

Nidānavaggo

1. Buddhavaggo

1. Buddhavaggo

1. Paṭiccasamuppādasuttaṃ

2. Vibhaṅgasuttaṃ

3. Paṭipadāsuttaṃ

4. Vipassīsuttaṃ

5. Sikhīsuttaṃ

6. Vessabhūsuttaṃ

7. Kakusandhasuttaṃ

8. Koṇāgamanasuttaṃ

9. Kassapasuttaṃ

10. Gotamasuttaṃ

閱讀設定