Issues
Editor
Settings
Versions
Select Version
sāsanāre-သာသနာရေး
မြန်မာဘာသာ
Nidānavaggo
Nidānavaggo

3. Tatiyavaggo

Author： _System_Pali_VRI_ @ Administrator

3. Tatiyavaggo

1. Mātugāmasuttaṃ

170. SāvatthiyaṃT2.276 viharati … pe …‘‘ dāruṇo , bhikkhave , lābhasakkārasiloko … pe … naP2.235 tassa , bhikkhave , mātugāmo eko ekassa cittaṃ pariyādāya tiṭṭhati yassa lābhasakkārasiloko cittaṃ pariyādāya tiṭṭhati .
Evaṃ dāruṇo kho , bhikkhave , lābhasakkārasiloko … pe … evañhi vo , bhikkhave , sikkhitabban ’’ ti .
Paṭhamaṃ .

2. Kalyāṇīsuttaṃ

171. Sāvatthiyaṃ viharati … pe …‘‘ dāruṇo , bhikkhave , lābhasakkārasiloko … pe … na tassa , bhikkhave , janapadakalyāṇī ekā ekassa cittaṃ pariyādāya tiṭṭhati yassa lābhasakkārasiloko cittaṃ pariyādāya tiṭṭhati .
Evaṃ dāruṇo kho , bhikkhave , lābhasakkārasiloko … pe … evañhi vo , bhikkhave , sikkhitabban ’’ ti .
Dutiyaṃ .

3. Ekaputtakasuttaṃ

172. Sāvatthiyaṃ viharati … pe …‘‘ dāruṇo , bhikkhave , lābhasakkārasiloko … pe … saddhā , bhikkhave , upāsikā ekaputtakaṃ piyaṃ manāpaṃ evaṃ sammā āyācamānā āyāceyya –
‘ tādiso , tāta , bhavāhi yādiso citto ca gahapati hatthako ca āḷavako ’ ti .
Esā , bhikkhaveT2.277 , tulā etaṃ pamāṇaṃ mama sāvakānaṃ upāsakānaṃ , yadidaṃ cittoV1.213 ca gahapati hatthako ca āḷavako .
Sace kho tvaṃ , tāta , agārasmā anagāriyaṃ pabbajasi ;
tādiso , tāta , bhavāhi yādisā sāriputtamoggallānāti .
Esā , bhikkhave , tulā etaṃ pamāṇaṃ mama sāvakānaṃ bhikkhūnaṃ , yadidaṃ sāriputtamoggalānāM1.432 .
Mā ca kho tvaṃ , tāta , sekhaṃ appattamānasaṃ lābhasakkārasiloko anupāpuṇātūti .
Tañce , bhikkhave , bhikkhuṃP2.236 sekhaṃ appattamānasaṃ lābhasakkārasiloko anupāpuṇāti , so tassa hoti antarāyāya .
Evaṃ dāruṇo kho , bhikkhave , lābhasakkārasiloko … pe … evañhi vo , bhikkhave , sikkhitabban ’’ ti .
Tatiyaṃ .

4. Ekadhītusuttaṃ

173. Sāvatthiyaṃ viharati … pe …‘‘ dāruṇo , bhikkhave , lābhasakkārasiloko … pe … saddhā bhikkhave upāsikā ekaṃ dhītaraṃ piyaṃ manāpaṃ evaṃ sammā āyācamānā āyāceyya –
‘ tādisā , ayye , bhavāhi yādisā khujjuttarā ca upāsikā veḷukaṇḍakiyā [ veḷukaṇḍakī ( sī . chakkaṅguttarepi )] ca nandamātā ’ ti .
Esā , bhikkhave , tulā etaṃ pamāṇaṃ mama sāvikānaṃ upāsikānaṃ , yadidaṃ khujjuttarā ca upāsikā veḷukaṇḍakiyā ca nandamātā .
Sace kho tvaṃ , ayye , agārasmā anagāriyaṃ pabbajasi ;
tādisā , ayye , bhavāhi yādisā khemā ca bhikkhunī uppalavaṇṇā cāti .
Esā , bhikkhave , tulā etaṃ pamāṇaṃ mama sāvikānaṃ bhikkhunīnaṃ , yadidaṃ khemāT2.278 ca bhikkhunī uppalavaṇṇā ca .
Mā ca kho tvaṃ , ayye , sekhaṃ appattamānasaṃ lābhasakkārasiloko anupāpuṇātūti .
Taṃ ce , bhikkhave , bhikkhuniṃ sekhaṃ appattamānasaṃ lābhasakkārasiloko anupāpuṇāti , so tassā hoti antarāyāya .
Evaṃ dāruṇo kho , bhikkhave , lābhasakkārasiloko … pe … evañhi vo , bhikkhave , sikkhitabban ’’ ti .
Catutthaṃ .

5. Samaṇabrāhmaṇasuttaṃ

174. Sāvatthiyaṃ viharati … pe …‘‘ yeP2.237 hi keci , bhikkhave , samaṇā vā brāhmaṇā vā lābhasakkārasilokassa assādañca ādīnavañca nissaraṇañca yathābhūtaṃ nappajānanti , na me te , bhikkhave , samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā , na ca pana te āyasmantā sāmaññatthaṃ vā brahmaññatthaṃ vā diṭṭheva dhamme sayaṃ abhiññāV1.214 sacchikatvā upasampajja viharanti .
Ye ca kho keci , bhikkhave , samaṇā vā brāhmaṇā vā lābhasakkārasilokassa assādañca ādīnavañcaM1.433 nissaraṇañca yathābhūtaṃ pajānanti , te ca kho me , bhikkhave , samaṇā vā brāhmaṇā vā samaṇesu ceva samaṇasammatā brāhmaṇesu ca brāhmaṇasammatā , te ca panāyasmanto sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī ’’ ti .
Pañcamaṃ .

6. Dutiyasamaṇabrāhmaṇasuttaṃ

175. Sāvatthiyaṃ viharati … pe …‘‘ ye hi keci , bhikkhave , samaṇā vā brāhmaṇā vā lābhasakkārasilokassa samudayañca atthaṅgamañca assādañca ādīnavañca nissaraṇañca yathābhūtaṃ nappajānanti … pe … pajānanti … pe … sayaṃ abhiññā sacchikatvā upasampajja viharantī ’’ ti .
Chaṭṭhaṃ .

7. Tatiyasamaṇabrāhmaṇasuttaṃ

176. Sāvatthiyaṃ viharati … pe …‘‘ ye hi keci , bhikkhave , samaṇā vā brāhmaṇāT2.279 vā lābhasakkārasilokaṃ yathābhūtaṃ nappajānanti , lābhasakkārasilokasamudayaṃ nappajānanti , lābhasakkārasilokanirodhaṃ nappajānanti , lābhasakkārasilokanirodhagāminiṃ paṭipadaṃ nappajānanti … pe … pajānanti … pe … sayaṃ abhiññā sacchikatvā upasampajja viharantī ’’ ti .
Sattamaṃ .

8. Chavisuttaṃ

177. Sāvatthiyaṃ viharati … pe …‘‘ dāruṇo , bhikkhave , lābhasakkārasiloko .
LābhasakkārasilokoP2.238 , bhikkhave , chaviṃ chindati , chaviṃ chetvā cammaṃ chindati , cammaṃ chetvā maṃsaṃ chindati , maṃsaṃ chetvā nhāruṃ chindati , nhāruṃ chetvā aṭṭhiṃ chindati , aṭṭhiṃ chetvā aṭṭhimiñjaṃV1.215 āhacca tiṭṭhati .
Evaṃ dāruṇo kho , bhikkhave , lābhasakkārasiloko … pe … evañhi vo bhikkhave , sikkhitabban ’’ ti .
Aṭṭhamaṃ .

9. Rajjusuttaṃ

178. Sāvatthiyaṃ viharati … pe …‘‘ dāruṇo , bhikkhave , lābhasakkārasiloko .
Lābhasakkārasiloko , bhikkhave , chaviṃ chindati , chaviṃ chetvā cammaṃ chindati , cammaṃ chetvā maṃsaṃ chindati , maṃsaṃ chetvā nhāruṃ chindati , nhāruṃ chetvā aṭṭhiṃ chindati , aṭṭhiṃ chetvā aṭṭhimiñjaṃ āhacca tiṭṭhati ’’.
‘‘ SeyyathāpiM1.434 , bhikkhave , balavā puriso daḷhāya vāḷarajjuyā jaṅghaṃ veṭhetvā ghaṃseyya .
Sā chaviṃ chindeyya , chaviṃ chetvā cammaṃ chindeyya , cammaṃ chetvā maṃsaṃ chindeyya , maṃsaṃ chetvā nhāruṃ chindeyya , nhāruṃ chetvā aṭṭhiṃ chindeyya , aṭṭhiṃ chetvā aṭṭhimiñjaṃ āhacca tiṭṭheyya .
Evameva kho , bhikkhave , lābhasakkārasilokoT2.280 chaviṃ chindati , chaviṃ chetvā cammaṃ chindati , cammaṃ chetvā maṃsaṃ chindati , maṃsaṃ chetvā nhāruṃ chindati , nhāruṃ chetvā aṭṭhiṃ chindati , aṭṭhiṃ chetvā aṭṭhiṃmiñjaṃ āhacca tiṭṭhati .
Evaṃ dāruṇo kho , bhikkhave , lābhasakkārasiloko … pe … evañhi vo , bhikkhave , sikkhitabban ’’ ti .
Navamaṃ .

10. Bhikkhusuttaṃ

179. Sāvatthiyaṃ viharati … pe …‘‘ yopiP2.239 so , bhikkhave , bhikkhu arahaṃ khīṇāsavo tassapāhaṃ lābhasakkārasiloko antarāyāya vadāmī ’’ ti .
Evaṃ vutte , āyasmā ānando bhagavantaṃ etadavoca –
‘‘ kissa pana , bhante , khīṇāsavassa bhikkhuno lābhasakkārasiloko antarāyāyā ’’ ti ?
‘‘ Yā hissa sā , ānanda , akuppā cetovimutti nāhaṃ tassā lābhasakkārasilokaṃ antarāyāya vadāmi .
Ye ca khvassa , ānanda , appamattassa ātāpino pahitattassa viharato diṭṭhadhammasukhavihārā adhigatā tesāhamassa lābhasakkārasilokaṃ antarāyāya vadāmi .
Evaṃ dāruṇo kho , ānanda , lābhasakkārasiloko kaṭuko pharuso antarāyiko anuttarassa yogakkhemassa adhigamāya .
Tasmātihānanda , evaṃ sikkhitabbaṃ –
‘ uppannaṃV1.216 lābhasakkārasilokaṃ pajahissāma , na ca no uppanno lābhasakkārasiloko cittaṃ pariyādāya ṭhassatī ’ ti .
Evañhi vo , ānanda , sikkhitabban ’’ ti .
Dasamaṃ .
Tatiyo vaggo .
Tassuddānaṃ –
MātugāmoT2.281 ca kalyāṇī , putto ca ekadhītu ca ;
Samaṇabrāhmaṇā tīṇi , chavi rajju ca bhikkhunāti .