2. Dutiyavaggo
1. Cakkhusuttaṃ
198. Evaṃ
T2.293 me sutaṃ – ekaṃ samayaṃ bhagavā sāvatthiyaṃ viharati .Atha
P2.250 kho āyasmā rāhulo yena bhagavā tenupasaṅkami ;upasaṅkamitvā bhagavantaṃ abhivādetvā ekamantaṃ nisīdi .
Ekamantaṃ nisinnaṃ kho āyasmantaṃ rāhulaṃ
M1.443 bhagavā etadavoca –‘‘ taṃ kiṃ maññasi , rāhula , cakkhuṃ niccaṃ vā aniccaṃ vā ’’ ti ?
‘‘ Aniccaṃ , bhante ’’.
‘‘ Yaṃ panāniccaṃ , dukkhaṃ vā taṃ sukhaṃ vā ’’ ti ?
‘‘ Dukkhaṃ , bhante ’’.
‘‘ Yaṃ panāniccaṃ dukkhaṃ vipariṇāmadhammaṃ , kallaṃ nu taṃ samanupassituṃ –
‘ etaṃ mama , esohamasmi , eso me attā ’’’ ti ?
‘‘ No hetaṃ , bhante ’’.
‘‘ Sotaṃ … pe … ghānaṃ … jivhā … kāyo … mano nicco vā anicco vā ’’ ti ?
‘‘ Anicco , bhante ’’.
‘‘ Yaṃ panāniccaṃ , dukkhaṃ vā taṃ sukhaṃ vā ’’ ti ?
‘‘ Dukkhaṃ , bhante ’’.
‘‘ Yaṃ panāniccaṃ dukkhaṃ vipariṇāmadhammaṃ , kallaṃ nu taṃ samanupassituṃ –
‘ etaṃ mama , esohamasmi , eso me attā ’’’ ti ?
‘‘ No hetaṃ , bhante ’’.
‘‘ Evaṃ passaṃ , rāhula , sutavā ariyasāvako cakkhusmimpi nibbindati … pe … sotasmimpi nibbindati … ghānasmimpi nibbindati
V1.228 … jivhāyapi nibbindati … kāyasmimpi nibbindati … manasmimpi nibbindati ;nibbindaṃ virajjati ;
virāgā vimuccati ;
vimuttasmiṃ vimuttamiti ñāṇaṃ hoti .
‘ Khīṇā
T2.294 jāti , vusitaṃ brahmacariyaṃ , kataṃ karaṇīyaṃ , nāparaṃ itthattāyā ’ ti pajānātī ’’ ti .Etena peyyālena dasa suttantā kātabbā .
Paṭhamaṃ .
2-10.Rūpādisuttanavakaṃ
199. Sāvatthiyaṃ viharati … pe …‘‘ taṃ kiṃ maññasi , rāhula , rūpā
P2.251 niccā vā aniccā vā ’’ ti ?‘‘ Aniccā , bhante ’’… pe … saddā … gandhā … rasā … phoṭṭhabbā … dhammā ….
‘‘ Cakkhuviññāṇaṃ … pe … sotaviññāṇaṃ … ghānaviññāṇaṃ … jivhāviññāṇaṃ … kāyaviññāṇaṃ … manoviññāṇaṃ ….
‘‘ Cakkhusamphasso … pe … sotasamphasso … ghānasamphasso … jivhāsamphasso … kāyasamphasso … manosamphasso ….
‘‘ Cakkhusamphassajā vedanā … pe … sotasamphassajā vedanā … ghānasamphassajā vedanā … jivhāsamphassajā vedanā … kāyasamphassajā vedanā … manosamphassajā vedanā ….
‘‘ Rūpasaññā … pe … saddasaññā … gandhasaññā … rasasaññā … phoṭṭhabbasaññā … dhammasaññā ….
‘‘ Rūpasañcetanā … pe … saddasañcetanā … gandhasañcetanā … rasasañcetanā … phoṭṭhabbasañcetanā … dhammasañcetanā ….
‘‘ Rūpataṇhā
V1.229M1.444 … pe … saddataṇhā … gandhataṇhā … rasataṇhā … phoṭṭhabbataṇhā … dhammataṇhā ….‘‘ Pathavīdhātu … pe … āpodhātu … tejodhātu … vāyodhātu … ākāsadhātu
T2.295 … viññāṇadhātu ….‘‘ Rūpaṃ
P2.252 … pe … vedanā … saññā … saṅkhārā … viññāṇaṃ niccaṃ vā aniccaṃ vā ’’ ti ?Aniccaṃ , bhante … pe … evaṃ passaṃ rāhula … pe … nāparaṃ itthattāyāti pajānātīti .
Dasamaṃ .
11. Anusayasuttaṃ
200. Sāvatthiyaṃ viharati .
Atha kho āyasmā rāhulo yena bhagavā tenupasaṅkami ;
upasaṅkamitvā bhagavantaṃ abhivādetvā ekamantaṃ nisīdi .
Ekamantaṃ nisinno kho āyasmā rāhulo bhagavantaṃ etadavoca –
‘‘ kathaṃ nu kho , bhante , jānato kathaṃ passato imasmiñca saviññāṇake kāye bahiddhā ca sabbanimittesu ahaṅkāramamaṅkāramānānusayā na hontī ’’ ti ?
‘‘ Yaṃ kiñci , rāhula , rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā , sabbaṃ rūpaṃ ‘ netaṃ mama , nesohamasmi , na meso attā ’ ti evametaṃ yathābhūtaṃ sammappaññāya passati .
Yā kāci vedanā … pe … yā kāci saññā … ye keci saṅkhārā … yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā , sabbaṃ viññāṇaṃ ‘ netaṃ mama , nesohamasmi , na meso attā ’ ti evametaṃ yathābhūtaṃ sammappaññāya passati .
Evaṃ kho , rāhula , jānato evaṃ passato imasmiñca saviññāṇake kāye bahiddhā ca sabbanimittesu ahaṅkāramamaṅkāramānānusayā
T2.296 na hontī ’’ ti .Ekādasamaṃ .
12. Apagatasuttaṃ
201. Sāvatthinidānaṃ
V1.230P2.253 .Atha kho āyasmā rāhulo yena bhagavā tenupasaṅkami ;
upasaṅkamitvā bhagavantaṃ abhivādetvā ekamantaṃ nisīdi .
Ekamantaṃ nisinno kho āyasmā rāhulo bhagavantaṃ etadavoca –
‘‘ kathaṃ nu kho , bhante , jānato kathaṃ passato imasmiṃ ca saviññāṇake kāye
M1.445 bahiddhā ca sabbanimittesu ahaṅkāramamaṅkāramānāpagataṃ mānasaṃ hoti vidhā samatikkantaṃ santaṃ suvimuttan ’’ ti ?‘‘ Yaṃ kiñci , rāhula , rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā sabbaṃ rūpaṃ ‘ netaṃ mama , nesohamasmi , na meso attā ’ ti evametaṃ yathābhūtaṃ sammappaññāya disvā anupādā vimutto hoti ’’.
‘‘ Yā kāci vedanā … pe … yā kāci saññā … ye keci saṅkhārā … yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā , sabbaṃ viññāṇaṃ ‘ netaṃ mama , nesohamasmi , na meso attā ’ ti evametaṃ yathābhūtaṃ sammappaññāya disvā anupādā vimutto hoti .
Evaṃ kho , rāhula , jānato evaṃ passato imasmiñca saviññāṇake kāye bahiddhā ca sabbanimittesu ahaṅkāramamaṅkāramānāpagataṃ mānasaṃ hoti
T2.297 vidhā samatikkantaṃ santaṃ suvimuttan ’’ ti .Dvādasamaṃ .
Dutiyo vaggo .
Tassuddānaṃ –
Cakkhu
P2.254 rūpañca viññāṇaṃ , samphasso vedanāya ca ;Saññā sañcetanā taṇhā , dhātu khandhena te dasa ;
Anusayaṃ apagatañceva , vaggo tena pavuccatīti .
Rāhulasaṃyuttaṃ samattaṃ .