5. Gahapativaggo

1. Pañcaverabhayasuttaṃ

41. SāvatthiyaṃT2.82 viharati .

Atha kho anāthapiṇḍiko gahapati yena bhagavā tenupasaṅkami ;

upasaṅkamitvā bhagavantaṃ abhivādetvā ekamantaṃ nisīdi .

Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –

‘‘ Yato kho , gahapati , ariyasāvakassa pañca bhayāni verāni vūpasantāni honti , catūhi ca sotāpattiyaṅgehi samannāgato hoti , ariyo cassa ñāyo paññāya sudiṭṭho hoti suppaṭividdho , so ākaṅkhamāno attanāva attānaṃ byākareyya –

‘ khīṇanirayomhi khīṇatiracchānayoni khīṇapettivisayo khīṇāpāyaduggativinipāto , sotāpannohamasmi avinipātadhammo niyato sambodhiparāyano ’’’ ti .

‘‘ KatamāniM1.298V1.61 pañca bhayāni verāni vūpasantāni honti ?

Yaṃ , gahapati , pāṇātipātī pāṇātipātapaccayā diṭṭhadhammikampi bhayaṃ veraṃ pasavati , samparāyikampi bhayaṃ veraṃ pasavati , cetasikampi dukkhaṃ domanassaṃ paṭisaṃvedayati , pāṇātipātā paṭiviratassa evaṃ taṃ bhayaṃ veraṃ vūpasantaṃ hoti .

‘‘ Yaṃ , gahapati , adinnādāyī adinnādānapaccayā diṭṭhadhammikampi bhayaṃ veraṃ pasavati , samparāyikampi bhayaṃ veraṃ pasavati , cetasikampi dukkhaṃ domanassaṃ paṭisaṃvedayati , adinnādānā paṭiviratassa evaṃ taṃ bhayaṃ veraṃ vūpasantaṃ hoti .

‘‘ YaṃP2.69 , gahapati , kāmesumicchācārī kāmesumicchācārapaccayāT2.83 diṭṭhadhammikampi bhayaṃ veraṃ pasavati , samparāyikampi bhayaṃ veraṃ pasavati , cetasikampi dukkhaṃ domanassaṃ paṭisaṃvedayati , kāmesumicchācārā paṭiviratassa evaṃ taṃ bhayaṃ veraṃ vūpasantaṃ hoti .

‘‘ Yaṃ , gahapati , musāvādī musāvādapaccayā diṭṭhadhammikampi bhayaṃ veraṃ pasavati , samparāyikampi bhayaṃ veraṃ pasavati , cetasikampi dukkhaṃ domanassaṃ paṭisaṃvedayati , musāvādā paṭiviratassa evaṃ taṃ bhayaṃ veraṃ vūpasantaṃ hoti .

‘‘ Yaṃ , gahapati , surāmerayamajjapamādaṭṭhāyī surāmerayamajjapamādaṭṭhānapaccayā diṭṭhadhammikampi bhayaṃ veraṃ pasavati , samparāyikampi bhayaṃ veraṃ pasavati , cetasikampi dukkhaṃ domanassaṃ paṭisaṃvedayati , surāmerayamajjapamādaṭṭhānā paṭiviratassa evaṃ taṃ bhayaṃ veraṃ vūpasantaṃ hoti .

Imāni pañca bhayāni verāni vūpasantāni honti .

‘‘ Katamehi catūhi sotāpattiyaṅgehi samannāgato hoti ?

Idha , gahapati , ariyasāvako buddhe aveccappasādena samannāgato hoti –

‘ itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā ’’’ ti .

‘‘ DhammeV1.62 aveccappasādena samannāgato hoti –

‘ svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī ’’’ ti .

‘‘ SaṅgheM1.299 aveccappasādena samannāgato hoti –

‘ suppaṭipanno bhagavato sāvakasaṅgho , ujuppaṭipanno bhagavato sāvakasaṅgho , ñāyappaṭipanno bhagavato sāvakasaṅgho , sāmīcippaṭipanno bhagavato sāvakasaṅghoT2.84 , yadidaṃ cattāri purisayugāni aṭṭha purisapuggalā , esa bhagavato sāvakasaṅghoP2.70 āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā ’’’ ti .

‘‘ Ariyakantehi sīlehi samannāgato hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṃvattanikehi .

Imehi catūhi sotāpattiyaṅgehi samannāgato hoti .

‘‘ Katamo cassa ariyo ñāyo paññāya sudiṭṭho hoti suppaṭividdho ?

Idha , gahapati , ariyasāvako paṭiccasamuppādaññeva sādhukaṃ yoniso manasi karoti –

‘ iti imasmiṃ sati idaṃ hoti , imasmiṃ asati idaṃ na hoti ;

imassuppādā idaṃ uppajjati , imassa nirodhā idaṃ nirujjhati .

Yadidaṃ avijjāpaccayā saṅkhārā ;

saṅkhārapaccayā viññāṇaṃ … pe … evametassa kevalassa dukkhakkhandhassa samudayo hoti .

Avijjāya tveva asesavirāganirodhā saṅkhāranirodho ;

saṅkhāranirodhā viññāṇanirodho … pe … evametassa kevalassa dukkhakkhandhassa nirodho hotī ’’’ ti .

Ayamassa ariyo ñāyo paññāya sudiṭṭho hoti suppaṭividdho .

‘‘ Yato kho , gahapati , ariyasāvakassa imāni pañca bhayāni verāni vūpasantāni honti , imehi catūhi sotāpattiyaṅgehi samannāgato hoti , ayañcassa ariyo ñāyo paññāya sudiṭṭho hoti suppaṭividdho , so ākaṅkhamāno attanāva attānaṃ byākareyya –

‘ khīṇanirayomhiT2.85 khīṇatiracchānayoni khīṇapettivisayo khīṇāpāyaduggativinipāto , sotāpannohamasmi avinipātadhammo niyato sambodhiparāyano ’’’ ti .

2. Dutiyapañcaverabhayasuttaṃ

42. SāvatthiyaṃV1.63 viharati … pe …‘‘ yatoP2.71 kho , bhikkhave , ariyasāvakassa pañca bhayāni verāni vūpasantāni honti , catūhi ca sotāpattiyaṅgehi samannāgato hoti , ariyo cassa ñāyo paññāya sudiṭṭho hotiM1.300 suppaṭividdho , so ākaṅkhamāno attanāva attānaṃ byākareyya –

‘ khīṇanirayomhi khīṇatiracchānayoni khīṇapettivisayo khīṇāpāyaduggativinipāto , sotāpannohamasmi avinipātadhammo niyato sambodhiparāyano ’’’ ti .

‘‘ Katamāni pañca bhayāni verāni vūpasantāni honti ?

Yaṃ , bhikkhave , pāṇātipātī … pe … yaṃ , bhikkhave , adinnādāyī … pe … yaṃ , bhikkhave , kāmesumicchācārī … yaṃ , bhikkhave , musāvādī … yaṃ , bhikkhave , surāmerayamajjapamādaṭṭhāyī … pe … imāni pañca bhayāni verāni vūpasantāni honti .

‘‘ Katamehi catūhi sotāpattiyaṅgehi samannāgato hoti ?

Idha , bhikkhave , ariyasāvako buddhe … pe … dhamme … saṅghe … ariyakantehi sīlehi samannāgato hoti .

Imehi catūhi sotāpattiyaṅgehi samannāgato hoti .

‘‘ Katamo cassa ariyo ñāyo paññāya sudiṭṭho hoti suppaṭividdhoT2.86 ?

Idha , bhikkhave , ariyasāvako paṭiccasamuppādaññeva sādhukaṃ yoniso manasi karoti … pe … ayamassa ariyo ñāyo paññāya sudiṭṭho hoti suppaṭividdho .

‘‘ Yato kho , bhikkhave , ariyasāvakassa imāni pañca bhayāni verāni vūpasantāni honti , imehi ca catūhi sotāpattiyaṅgehi samannāgato hoti , ayañcassa ariyo ñāyo paññāya sudiṭṭho hoti suppaṭividdho , so ākaṅkhamāno attanāva attānaṃ byākareyya –

‘ khīṇanirayomhi khīṇatiracchānayoni khīṇapettivisayo khīṇāpāyaduggativinipāto , sotāpannohamasmi avinipātadhammo niyato sambodhiparāyano ’’’ ti .

Dutiyaṃ .

3. Dukkhasuttaṃ

43. SāvatthiyaṃV1.64 viharati … pe …‘‘ dukkhassaP2.72 , bhikkhave , samudayañca atthaṅgamañca desessāmi .

Taṃ suṇātha , sādhukaṃ manasi karotha ;

bhāsissāmī ’’ ti .

‘‘ Evaṃ , bhante ’’ ti kho te bhikkhū bhagavato paccassosuṃ .

Bhagavā etadavoca –

‘‘ Katamo ca , bhikkhave , dukkhassa samudayo ?

Cakkhuñca paṭicca rūpe ca uppajjati cakkhuviññāṇaṃ .

Tiṇṇaṃ saṅgati phasso .

Phassapaccayā vedanā ;

vedanāpaccayā taṇhā .

Ayaṃ kho , bhikkhave , dukkhassa samudayo .

‘‘ SotañcaM1.301 paṭicca sadde ca uppajjati sotaviññāṇaṃ … pe … ghānañca paṭicca gandhe ca … pe … jivhañca paṭicca rase ca … pe … kāyañca paṭicca phoṭṭhabbe ca … pe … manañca paṭicca dhamme ca uppajjati manoviññāṇaṃ .

Tiṇṇaṃ saṅgati phasso .

Phassapaccayā vedanā ;

vedanāpaccayā taṇhā .

AyaṃT2.87 kho , bhikkhave , dukkhassa samudayo .

‘‘ Katamo ca , bhikkhave , dukkhassa atthaṅgamo ?

Cakkhuñca paṭicca rūpe ca uppajjati cakkhuviññāṇaṃ .

Tiṇṇaṃ saṅgati phasso .

Phassapaccayā vedanā ;

vedanāpaccayā taṇhā .

Tassāyeva taṇhāya asesavirāganirodhā upādānanirodho ;

upādānanirodhā bhavanirodho ;

bhavanirodhā jātinirodho ;

jātinirodhā jarāmaraṇaṃ sokaparidevadukkhadomanassupāyāsā nirujjhanti .

Evametassa kevalassa dukkhakkhandhassa nirodho hoti .

Ayaṃ kho , bhikkhave , dukkhassa atthaṅgamo .

‘‘ Sotañca paṭicca sadde ca uppajjati sotaviññāṇaṃ … pe … ghānañca paṭicca gandhe ca … pe … jivhañca paṭicca rase ca … pe … kāyañca paṭicca phoṭṭhabbe ca … pe … manañca paṭicca dhamme ca uppajjati manoviññāṇaṃ .

Tiṇṇaṃ saṅgati phasso .

Phassapaccayā vedanā ;

vedanāpaccayā taṇhā .

Tassāyeva taṇhāya asesavirāganirodhā upādānanirodho ;

upādānanirodhā bhavanirodho ;

bhavanirodhā jātinirodho ;

jātinirodhā jarāmaraṇaṃ sokaparidevadukkhadomanassupāyāsāP2.73 nirujjhanti .

Evametassa kevalassa dukkhakkhandhassa nirodho hoti .

Ayaṃ kho , bhikkhave , dukkhassa atthaṅgamo ’’ ti .

Tatiyaṃ .

4. Lokasuttaṃ

44. SāvatthiyaṃV1.65 viharati … pe …‘‘ lokassa , bhikkhave , samudayañca atthaṅgamañca desessāmi .

Taṃ suṇātha , sādhukaṃ manasi karotha ;

bhāsissāmī ’’ ti .

‘‘ Evaṃ , bhante ’’ ti kho te bhikkhū bhagavato paccassosuṃ .

Bhagavā etadavoca –

‘‘ Katamo ca , bhikkhave , lokassa samudayo ?

Cakkhuñca paṭicca rūpe ca uppajjati cakkhuviññāṇaṃ .

TiṇṇaṃT2.88 saṅgati phasso .

Phassapaccayā vedanā ;

vedanāpaccayā taṇhā ;

taṇhāpaccayā upādānaṃ ;

upādānapaccayā bhavo ;

bhavapaccayā jāti ;

jātipaccayā jarāmaraṇaṃ sokaparidevadukkhadomanassupāyāsā sambhavanti .

Ayaṃ kho , bhikkhave , lokassa samudayo .

‘‘ SotañcaM1.302 paṭicca sadde ca … pe … ghānañca paṭicca gandhe ca … jivhañca paṭicca rase ca … kāyañca paṭicca phoṭṭhabbe ca … manañca paṭicca dhamme ca uppajjati manoviññāṇaṃ .

Tiṇṇaṃ saṅgati phasso .

Phassapaccayā vedanā … pe … jātipaccayā jarāmaraṇaṃ sokaparidevadukkhadomanassupāyāsā sambhavanti .

Ayaṃ kho , bhikkhave , lokassa samudayo .

‘‘ Katamo ca , bhikkhave , lokassa atthaṅgamo ?

Cakkhuñca paṭicca rūpe ca uppajjati cakkhuviññāṇaṃ .

Tiṇṇaṃ saṅgati phasso .

Phassapaccayā vedanā ;

vedanāpaccayā taṇhā .

Tassāyeva taṇhāya asesavirāganirodhā upādānanirodho ;

upādānanirodhā bhavanirodho … pe … evametassa kevalassa dukkhakkhandhassa nirodho hoti .

Ayaṃ kho , bhikkhave , lokassa atthaṅgamo .

‘‘ Sotañca paṭicca sadde ca … pe … ghānañcaP2.74 paṭicca gandhe ca … jivhañca paṭicca rase ca … kāyañca paṭicca phoṭṭhabbe ca … manañca paṭicca dhamme ca uppajjati manoviññāṇaṃ .

Tiṇṇaṃ saṅgati phasso .

Phassapaccayā vedanā ;

vedanāpaccayā taṇhā .

Tassāyeva taṇhāya asesavirāganirodhā upādānanirodho ;

upādānanirodhā bhavanirodho … pe … evametassa kevalassaT2.89 dukkhakkhandhassa nirodho hoti .

Ayaṃ kho , bhikkhave , lokassa atthaṅgamo ’’ ti .

Catutthaṃ .

5. Ñātikasuttaṃ

45. EvaṃV1.66 me sutaṃ – ekaṃ samayaṃ bhagavā ñātike viharati giñjakāvasathe .

Atha kho bhagavā rahogato paṭisallāno imaṃ dhammapariyāyaṃ abhāsi –

‘‘ Cakkhuñca paṭicca rūpe ca uppajjati cakkhuviññāṇaṃ .

Tiṇṇaṃ saṅgati phasso .

Phassapaccayā vedanā , vedanāpaccayā taṇhā ;

taṇhāpaccayā upādānaṃ … pe … evametassa kevalassa dukkhakkhandhassa samudayo hoti .

‘‘ Sotañca paṭicca sadde ca … pe … ghānañca paṭicca gandhe ca … jivhañca paṭicca rase ca … kāyañca paṭicca phoṭṭhabbe ca … manañca paṭicca dhamme ca uppajjati manoviññāṇaṃ .

Tiṇṇaṃ saṅgati phasso .

Phassapaccayā vedanā ;

vedanāpaccayā taṇhā ;

taṇhāpaccayā upādānaṃ … pe … evametassa kevalassa dukkhakkhandhassa samudayo hoti .

‘‘ CakkhuñcaM1.303 paṭicca rūpe ca uppajjati cakkhuviññāṇaṃ .

Tiṇṇaṃ saṅgati phasso .

Phassapaccayā vedanā ;

vedanāpaccayā taṇhā .

Tassāyeva taṇhāya asesavirāganirodhā upādānanirodho ;

upādānanirodhā bhavanirodho … pe … evametassa kevalassa dukkhakkhandhassa nirodho hoti .

‘‘ SotañcaP2.75 paṭicca sadde ca … pe … manañca paṭicca dhamme ca uppajjati manoviññāṇaṃ .

Tiṇṇaṃ saṅgati phasso .

Phassapaccayā vedanā ;

vedanāpaccayā taṇhā .

Tassāyeva taṇhāya asesavirāganirodhāT2.90 upādānanirodho ;

upādānanirodhā bhavanirodho … pe … evametassa kevalassa dukkhakkhandhassa nirodho hotī ’’ ti .

Tena kho pana samayena aññataro bhikkhu bhagavato upassuti [ upassutiṃ ( sī . pī .)] ṭhito hoti .

Addasā kho bhagavā taṃ bhikkhuṃ upassuti ṭhitaṃ .

Disvāna taṃ bhikkhuṃ etadavoca –

‘‘ assosi no tvaṃ , bhikkhu , imaṃ dhammapariyāyan ’’ ti ?

‘‘ Evaṃ , bhante ’’ ti .

‘‘ Uggaṇhāhi tvaṃ , bhikkhu , imaṃ dhammapariyāyaṃ ;

pariyāpuṇāhi tvaṃ , bhikkhu , imaṃ dhammapariyāyaṃ ;

dhārehi tvaṃ , bhikkhu , imaṃ dhammapariyāyaṃ .

Atthasaṃhito ayaṃ [ atthasaṃhitoyaṃ ( sī . syā . kaṃ .), atthasaṃhitāyaṃ ( pī . ka .)], bhikkhu , dhammapariyāyo ādibrahmacariyako ’’ ti .

Pañcamaṃ .

6. Aññatarabrāhmaṇasuttaṃ

46. SāvatthiyaṃV1.67 viharati .

Atha kho aññataro brāhmaṇo yena bhagavā tenupasaṅkami ;

upasaṅkamitvā bhagavatā saddhiṃ sammodi .

Sammodanīyaṃ kathaṃ sāraṇīyaṃ vītisāretvā ekamantaṃ nisīdi .

Ekamantaṃ nisinno kho so brāhmaṇo bhagavantaṃ etadavoca –

‘‘ Kiṃ nu kho , bho gotama , so karoti so paṭisaṃvedayatī ’’ ti ?

‘‘‘ So karoti so paṭisaṃvedayatī ’ ti kho , brāhmaṇa , ayameko anto ’’.

‘‘ KiṃP2.76 pana , bho gotama , añño karoti , añño paṭisaṃvedayatī ’’ ti ?

‘‘‘ Añño karoti , añño paṭisaṃvedayatī ’ ti kho , brāhmaṇa , ayaṃ dutiyo anto .

Ete te , brāhmaṇa , ubho ante anupagamma majjhena tathāgato dhammaṃ deseti –

‘ avijjāpaccayā saṅkhārā ;

saṅkhārapaccayā viññāṇaṃ … pe … evametassa kevalassa dukkhakkhandhassa samudayo hoti .

AvijjāyaM1.304 tveva asesavirāganirodhā saṅkhāranirodho ;

saṅkhāranirodhā viññāṇanirodhoT2.91 … pe … evametassa kevalassa dukkhakkhandhassa nirodho hotī ’’’ ti .

Evaṃ vutte , so brāhmaṇo bhagavantaṃ etadavoca –

‘‘ abhikkantaṃ , bho gotama , abhikkantaṃ , bho gotama ,… pe … upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gatan ’’ ti .

Chaṭṭhaṃ .

7. Jāṇussoṇisuttaṃ

47. Sāvatthiyaṃ viharati .

Atha kho jāṇussoṇi brāhmaṇo yena bhagavā tenupasaṅkami ;

upasaṅkamitvā bhagavatā saddhiṃ … pe … ekamantaṃ nisinno kho jāṇussoṇi brāhmaṇo bhagavantaṃ etadavoca –

‘‘ KiṃV1.68 nu kho , bho , gotama , sabbamatthī ’’ ti ?

‘‘‘ Sabbamatthī ’ ti kho , brāhmaṇa , ayameko anto ’’.

‘‘ Kiṃ pana , bho gotama , sabbaṃ natthī ’’ ti ?

‘‘‘ Sabbaṃ natthī ’ ti kho , brāhmaṇa , ayaṃ dutiyo anto .

Ete te , brāhmaṇa , ubho ante anupagamma majjhena tathāgato dhammaṃ deseti –

‘ avijjāpaccayā saṅkhārā ;

saṅkhārapaccayā viññāṇaṃ … pe … evametassa kevalassa dukkhakkhandhassa samudayo hoti .

Avijjāya tveva asesavirāganirodhā saṅkhāranirodho ;

saṅkhāranirodhā viññāṇanirodho … pe … evametassa kevalassa dukkhakkhandhassa nirodho hotī ’’’ ti .

Evaṃ vutte , jāṇussoṇi brāhmaṇo bhagavantaṃ etadavocaP2.77 –

‘‘ abhikkantaṃ bho gotama … pe … pāṇupetaṃ saraṇaṃ gatan ’’ ti .

Sattamaṃ .

8. Lokāyatikasuttaṃ

48. Sāvatthiyaṃ viharati .

Atha kho lokāyatiko brāhmaṇo yenaT2.92 bhagavā … pe … ekamantaṃ nisinno kho lokāyatiko brāhmaṇo bhagavantaṃ etadavoca –

‘‘ Kiṃ nu kho , bho gotama , sabbamatthī ’’ ti ?

‘‘‘ Sabbamatthī ’ ti kho , brāhmaṇa , jeṭṭhametaṃ lokāyataṃ ’’.

‘‘ KiṃM1.305 pana , bho gotama , sabbaṃ natthī ’’ ti ?

‘‘‘ Sabbaṃ natthī ’ ti kho , brāhmaṇa , dutiyametaṃ lokāyataṃ ’’.

‘‘ Kiṃ nu kho , bho gotama , sabbamekattan ’’ ti ?

‘‘‘ Sabbamekattan ’ ti kho , brāhmaṇa , tatiyametaṃ lokāyataṃ ’’.

‘‘ KiṃV1.69 pana , bho gotama , sabbaṃ puthuttan ’’ ti ?

‘‘‘ Sabbaṃ puthuttan ’ ti kho , brāhmaṇa , catutthametaṃ lokāyataṃ ’’.

‘‘ Ete te , brāhmaṇa , ubho ante anupagamma majjhena tathāgato dhammaṃ deseti –

‘ avijjāpaccayā saṅkhārā ;

saṅkhārapaccayā viññāṇaṃ … pe … evametassa kevalassa dukkhakkhandhassa samudayo hoti .

Avijjāya tveva asesavirāganirodhā saṅkhāranirodho ;

saṅkhāranirodhā viññāṇanirodho … pe … evametassa kevalassa dukkhakkhandhassa nirodho hotī ’’’ ti .

Evaṃ vutte , lokāyatiko brāhmaṇo bhagavantaṃ etadavoca –

‘‘ abhikkantaṃ , bho gotama … pe … ajjatagge pāṇupetaṃ saraṇaṃ gatan ’’ ti .

Aṭṭhamaṃ .

9. Ariyasāvakasuttaṃ

49. Sāvatthiyaṃ viharati … pe …‘‘ naP2.78 , bhikkhave , sutavato ariyasāvakassa evaṃ hoti –

‘ kiṃ nu kho kismiṃ sati kiṃ hoti , kissuppādā kiṃ uppajjati ?( Kismiṃ sati saṅkhārā honti , kismiṃ sati viññāṇaṃ hoti ,)[() etthantare pāṭhā kesuci potthakesu na dissantīti sī . pī . potthakesu dassitā . tathā sati anantarasuttaṭīkāya sameti ] kismiṃ sati nāmarūpaṃ hoti , kismiṃ sati saḷāyatanaṃ hoti , kismiṃ sati phasso hoti , kismiṃ sati vedanāT2.93 hoti , kismiṃ sati taṇhā hoti , kismiṃ sati upādānaṃ hoti , kismiṃ sati bhavo hoti , kismiṃ sati jāti hoti , kismiṃ sati jarāmaraṇaṃ hotī ’’’ ti ?

‘‘ Atha kho , bhikkhave , sutavato ariyasāvakassa aparappaccayā ñāṇamevettha hoti –

‘ imasmiṃ sati idaṃ hoti , imassuppādā idaṃ uppajjati .( Avijjāya sati saṅkhārā honti ; saṅkhāresu sati viññāṇaṃ hoti ;)[() etthakesu pāṭhā kesuci potthakesu na dissantīti sī . pī . potthakesu dassitā . tathā sati anantarasuttaṭīkāya sameti ] viññāṇe sati nāmarūpaṃ hoti ;

nāmarūpe sati saḷāyatanaṃ hotiM1.306 ;

saḷāyatane sati phasso hoti ;

phasse sati vedanā hoti ;

vedanāya sati taṇhā hoti ;

taṇhāya sati upādānaṃ hoti ;

upādāne sati bhavo hoti ;

bhave sati jāti hoti ;

jātiyā sati jarāmaraṇaṃ hotī ’ ti .

So evaṃ pajānāti –

‘ evamayaṃ loko samudayatī ’’’ ti .

‘‘ NaV1.70 , bhikkhave , sutavato ariyasāvakassa evaṃ hoti –

‘ kiṃ nu kho kismiṃ asati kiṃ na hoti , kissa nirodhā kiṃ nirujjhati ?( Kismiṃ asati saṅkhārā na honti , kismiṃ asati viññāṇaṃ na hoti ,)[() etthantare pāṭhāpi tattha tatheva dassitā ] kismiṃ asati nāmarūpaṃ na hoti , kismiṃ asati saḷāyatanaṃ na hoti , kismiṃ asati phasso na hoti , kismiṃ asati vedanā na hoti , kismiṃ asati taṇhā na hoti , kismiṃ asati upādānaṃ na hoti , kismiṃ asati bhavo na hoti , kismiṃ asati jāti na hoti , kismiṃ asati jarāmaraṇaṃ na hotī ’’’ ti ?

‘‘ Atha kho , bhikkhave , sutavato ariyasāvakassa aparappaccayā ñāṇamevettha hoti –

‘ imasmiṃ asati idaṃ na hoti , imassa nirodhā idaṃ nirujjhati .( Avijjāya asati saṅkhārā na honti ; saṅkhāresu asati viññāṇaṃ na hoti ;)[() etthantare pāṭhāpi tattha tatheva dassitā ] viññāṇe asati nāmarūpaṃ na hoti ;

nāmarūpe asati saḷāyatanaṃT2.94 na hoti … pe … bhavo na hoti … jāti na hoti … jātiyā asati jarāmaraṇaṃ na hotī ’ ti .

So evaṃ pajānāti –

‘ evamayaṃ loko nirujjhatī ’’’ ti .

‘‘ YatoP2.79 kho , bhikkhave , ariyasāvako evaṃ lokassa samudayañca atthaṅgamañca yathābhūtaṃ pajānāti , ayaṃ vuccati , bhikkhave , ariyasāvako diṭṭhisampanno itipi … pe … amatadvāraṃ āhacca tiṭṭhati itipī ’’ ti .

Navamaṃ .

10. Dutiyaariyasāvakasuttaṃ

50. Sāvatthiyaṃ viharati … pe …‘‘ na , bhikkhave , sutavato ariyasāvakassa evaṃ hoti –

‘ kiṃ nu kho kismiṃ sati kiṃ hoti , kissuppādā kiṃ uppajjati ?

Kismiṃ sati saṅkhārā honti , kismiṃ sati viññāṇaṃ hoti , kismiṃ sati nāmarūpaṃ hoti , kismiṃ sati saḷāyatanaṃ hoti , kismiṃ satiM1.307 phasso hoti , kismiṃ sati vedanā hoti , kismiṃ sati taṇhā hoti , kismiṃ sati upādānaṃ hoti , kismiṃ sati bhavo hoti , kismiṃ sati jāti hoti , kismiṃ sati jarāmaraṇaṃ hotī ’’’ ti ?

‘‘ Atha kho , bhikkhave , sutavato ariyasāvakassa aparappaccayā ñāṇamevettha hoti –

‘ imasmiṃV1.71 sati idaṃ hoti , imassuppādā idaṃ uppajjati .

Avijjāya sati saṅkhārā honti ;

saṅkhāresu sati viññāṇaṃ hoti ;

viññāṇe sati nāmarūpaṃ hoti ;

nāmarūpe sati saḷāyatanaṃ hoti ;

saḷāyatane sati phasso hoti ;

phasse sati vedanā hotiT2.95 ;

vedanāya sati taṇhā hoti ;

taṇhāya sati upādānaṃ hoti ;

upādāne sati bhavo hoti ;

bhave sati jāti hoti ;

jātiyā sati jarāmaraṇaṃ hotī ’ ti .

So evaṃ pajānāti –

‘ evamayaṃ loko samudayatī ’’’ ti .

‘‘ Na , bhikkhave , sutavato ariyasāvakassa evaṃ hoti –

‘ kiṃ nu kho kismiṃ asati kiṃ na hoti , kissa nirodhā kiṃ nirujjhati ?

Kismiṃ asati saṅkhārā na honti , kismiṃ asati viññāṇaṃ na hoti , kismiṃ asati nāmarūpaṃ na hoti , kismiṃ asati saḷāyatanaṃ na hoti , kismiṃ asati phasso na hoti , kismiṃ asati vedanā na hoti , kismiṃ asati taṇhā na hoti … pe … upādānaṃ … bhavo … jāti … kismiṃ asati jarāmaraṇaṃ na hotī ’’’ ti ?

‘‘ Atha kho , bhikkhave , sutavato ariyasāvakassa aparappaccayā ñāṇamevettha hoti –

‘ imasmiṃ asati idaṃ na hoti , imassa nirodhā idaṃ nirujjhati .

Avijjāya asati saṅkhārāP2.80 na honti ;

saṅkhāresu asati viññāṇaṃ na hoti ;

viññāṇe asati nāmarūpaṃ na hoti ;

nāmarūpe asati saḷāyatanaṃ na hoti … pe … jātiyā asati jarāmaraṇaṃ na hotī ’ ti .

So evaṃ pajānāti –

‘ evamayaṃ loko nirujjhatī ’’’ ti .

‘‘ Yato kho , bhikkhave , ariyasāvako evaṃ lokassa samudayañca atthaṅgamañca yathābhūtaṃ pajānāti , ayaṃ vuccati , bhikkhave , ariyasāvako diṭṭhisampanno itipi , dassanasampanno itipi , āgato imaṃ saddhammaṃ itipi , passati imaṃ saddhammaṃ itipi , sekkhena ñāṇena samannāgato itipiT2.96 , sekkhāyaM1.308 vijjāya samannāgato itipi , dhammasotaṃ samāpanno itipi , ariyo nibbedhikapañño itipi , amatadvāraṃ āhacca tiṭṭhati itipī ’’ ti .

Dasamaṃ .

Gahapativaggo pañcamo .

Tassuddānaṃ –

DveV1.72 pañcaverabhayā vuttā , dukkhaṃ loko ca ñātikaṃ ;

Aññataraṃ jāṇussoṇi ca , lokāyatikena aṭṭhamaṃ ;

Dve ariyasāvakā vuttā , vaggo tena pavuccatīti .

Issues

Select Version

Nidānavaggo

Nidānavaggo

5. Gahapativaggo

5. Gahapativaggo

1. Pañcaverabhayasuttaṃ

2. Dutiyapañcaverabhayasuttaṃ

3. Dukkhasuttaṃ

4. Lokasuttaṃ

5. Ñātikasuttaṃ

6. Aññatarabrāhmaṇasuttaṃ

7. Jāṇussoṇisuttaṃ

8. Lokāyatikasuttaṃ

9. Ariyasāvakasuttaṃ

10. Dutiyaariyasāvakasuttaṃ

Issues

Select Version

Nidānavaggo

Nidānavaggo

5. Gahapativaggo

5. Gahapativaggo

1. Pañcaverabhayasuttaṃ

2. Dutiyapañcaverabhayasuttaṃ

3. Dukkhasuttaṃ

4. Lokasuttaṃ

5. Ñātikasuttaṃ

6. Aññatarabrāhmaṇasuttaṃ

7. Jāṇussoṇisuttaṃ

8. Lokāyatikasuttaṃ

9. Ariyasāvakasuttaṃ

10. Dutiyaariyasāvakasuttaṃ

Reading Settings