8. Lakkhaṇasaṃyuttaṃ
1. Paṭhamavaggo
1. Aṭṭhisuttaṃ
202. Evaṃ
T2.298V1.231M1.446 me sutaṃ – ekaṃ samayaṃ bhagavā rājagahe viharati veḷuvane kalandakanivāpe .Tena kho pana samayena āyasmā ca lakkhaṇo āyasmā ca mahāmoggallāno [ mahāmoggalāno ( ka .)] gijjhakūṭe pabbate viharanti .
Atha kho āyasmā mahāmoggallāno pubbaṇhasamayaṃ nivāsetvā pattacīvaramādāya yenāyasmā lakkhaṇo tenupasaṅkami ;
upasaṅkamitvā āyasmantaṃ lakkhaṇaṃ etadavoca –
‘‘ āyāmāvuso [ ehi āvuso ( syā . kaṃ . ka .)] lakkhaṇa , rājagahaṃ piṇḍāya pavisissāmā ’’ ti .
‘‘ Evamāvuso ’’ ti kho āyasmā lakkhaṇo āyasmato mahāmoggallānassa paccassosi .
Atha kho āyasmā mahāmoggallāno gijjhakūṭā pabbatā orohanto aññatarasmiṃ padese sitaṃ pātvākāsi .
Atha kho āyasmā lakkhaṇo āyasmantaṃ mahāmoggallānaṃ etadavoca –
‘‘ ko nu kho , āvuso moggallāna , hetu ko paccayo sitassa pātukammāyā ’’ ti ?
‘‘ Akālo kho , āvuso lakkhaṇa , etassa pañhassa .
Bhagavato maṃ santike etaṃ pañhaṃ pucchā ’’ ti .
Atha
P2.255 kho āyasmā ca lakkhaṇo āyasmā ca mahāmoggallānoT2.299 rājagahe piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu ;upasaṅkamitvā bhagavantaṃ abhivādetvā ekamantaṃ nisīdiṃsu .
Ekamantaṃ nisinno kho āyasmā lakkhaṇo āyasmantaṃ mahāmoggallānaṃ etadavoca –
‘‘ idhāyasmā mahāmoggallāno gijjhakūṭā pabbatā orohanto aññatarasmiṃ padese sitaṃ pātvākāsi .
Ko nu kho , āvuso moggallāna , hetu ko paccayo sitassa pātukammāyā ’’ ti ?
‘‘ Idhāhaṃ , āvuso , gijjhakūṭā pabbatā orohanto addasaṃ aṭṭhikasaṅkhalikaṃ vehāsaṃ gacchantiṃ .
Tamenaṃ gijjhāpi kākāpi kulalāpi anupatitvā
M1.447V1.232 anupatitvā phāsuḷantarikāhi vitudenti vitacchenti virājenti [ vitudenti ( sī .), vitacchenti vibhajenti ( pī . ka .)].Sā sudaṃ aṭṭassaraṃ karoti .
Tassa mayhaṃ , āvuso , etadahosi –
‘ acchariyaṃ vata , bho , abbhutaṃ vata , bho !
Evarūpopi nāma satto bhavissati !
Evarūpopi nāma yakkho bhavissati !
Evarūpopi nāma attabhāvapaṭilābho bhavissatī ’’’ ti !!
Atha kho bhagavā bhikkhū āmantesi –
‘‘ cakkhubhūtā vata , bhikkhave , sāvakā viharanti ;
ñāṇabhūtā vata , bhikkhave , sāvakā viharanti , yatra hi nāma sāvako evarūpaṃ ñassati vā dakkhati vā sakkhiṃ vā karissati .
Pubbeva me so , bhikkhave , satto diṭṭho ahosi , api cāhaṃ na byākāsiṃ .
Ahañcetaṃ [ ahamevetaṃ ( sī .)] byākareyyaṃ , pare ca me [ pare me ( sī .)] na saddaheyyuṃ .
Ye me na saddaheyyuṃ , tesaṃ taṃ assa dīgharattaṃ ahitāya dukkhāya .
Eso , bhikkhave , satto imasmiṃyeva rājagahe goghātako
T2.300 ahosi .So tassa kammassa vipākena bahūni vassāni bahūni vassasatāni bahūni vassasahassāni bahūni vassasatasahassāni niraye paccitvā tasseva kammassa vipākāvasesena
P2.256 evarūpaṃ attabhāvapaṭilābhaṃ paṭisaṃvedayatī ’’ ti .( Sabbesaṃ suttantānaṃ eseva peyyālo ).Paṭhamaṃ .
2. Pesisuttaṃ
203.‘‘ Idhāhaṃ , āvuso , gijjhakūṭā pabbatā orohanto addasaṃ maṃsapesiṃ vehāsaṃ gacchantiṃ .
Tamenaṃ gijjhāpi kākāpi kulalāpi anupatitvā anupatitvā vitacchenti virājenti [ virājenti ( sī . syā . kaṃ .), vibhajenti ( pī . ka .)].
Sā sudaṃ aṭṭassaraṃ karoti … pe … eso , bhikkhave , satto imasmiṃyeva rājagahe goghātako ahosi … pe ….
Dutiyaṃ .
3. Piṇḍasuttaṃ
204.‘‘ Idhāhaṃ , āvuso , gijjhakūṭā pabbatā orohanto addasaṃ maṃsapiṇḍaṃ vehāsaṃ gacchantaṃ .
Tamenaṃ gijjhāpi kākāpi kulalāpi anupatitvā anupatitvā vitacchenti virājenti
V1.233 .Sā sudaṃ aṭṭassaraṃ karoti … pe … eso , bhikkhave , satto imasmiṃyeva rājagahe sākuṇiko ahosi … pe ….
Tatiyaṃ .
4. Nicchavisuttaṃ
205.‘‘ Idhāhaṃ
M1.448 , āvuso , gijjhakūṭā pabbatā orohanto addasaṃ nicchaviṃ purisaṃ vehāsaṃ gacchantaṃ .Tamenaṃ gijjhāpi kākāpi kulalāpi anupatitvā anupatitvā vitacchenti virājenti .
So sudaṃ aṭṭassaraṃ karoti … pe … eso , bhikkhave , satto imasmiṃyeva rājagahe orabbhiko ahosi … pe ….
Catutthaṃ .
5. Asilomasuttaṃ
206.‘‘ Idhāhaṃ
T2.301P2.257 , āvuso , gijjhakūṭā pabbatā orohanto addasaṃ asilomaṃ purisaṃ vehāsaṃ gacchantaṃ .Tassa te asī uppatitvā uppatitvā tasseva kāye nipatanti .
So sudaṃ aṭṭassaraṃ karoti … pe … eso , bhikkhave , satto imasmiṃyeva rājagahe sūkariko ahosi … pe ….
Pañcamaṃ .
6. Sattisuttaṃ
207.‘‘ Idhāhaṃ , āvuso , gijjhakūṭā pabbatā orohanto addasaṃ sattilomaṃ purisaṃ vehāsaṃ gacchantaṃ .
Tassa tā sattiyo uppatitvā uppatitvā tasseva kāye nipatanti .
So sudaṃ aṭṭassaraṃ karoti … pe … eso , bhikkhave , satto imasmiṃyeva rājagahe māgaviko ahosi … pe ….
Chaṭṭhaṃ .
7. Usulomasuttaṃ
208.‘‘ Idhāhaṃ , āvuso , gijjhakūṭā pabbatā orohanto addasaṃ usulomaṃ purisaṃ vehāsaṃ gacchantaṃ .
Tassa te usū uppatitvā uppatitvā tasseva kāye nipatanti .
So sudaṃ aṭṭassaraṃ
V1.234 karoti … pe … eso , bhikkhave , satto imasmiṃyeva rājagahe kāraṇiko ahosi … pe ….Sattamaṃ .
8. Sūcilomasuttaṃ
209.‘‘ Idhāhaṃ , āvuso , gijjhakūṭā pabbatā orohanto addasaṃ sūcilomaṃ purisaṃ vehāsaṃ gacchantaṃ .
Tassa tā sūciyo uppatitvā uppatitvā tasseva kāye nipatanti .
So sudaṃ aṭṭassaraṃ karoti … pe … eso
M1.449 , bhikkhave , satto imasmiṃyeva rājagahe sūto [ sārathiko ( ka . vinayepi )] ahosi … pe ….Aṭṭhamaṃ .
9. Dutiyasūcilomasuttaṃ
210.‘‘ Idhāhaṃ , āvuso , gijjhakūṭā pabbatā orohanto addasaṃ sūcilomaṃ purisaṃ vehāsaṃ gacchantaṃ .
Tassa
P2.258 tā sūciyo sīse pavisitvā mukhato nikkhamanti ;mukhe pavisitvā urato nikkhamanti ;
ure pavisitvā udarato nikkhamanti ;
udare pavisitvā ūrūhi nikkhamanti ;
ūrūsu pavisitvā
T2.302 jaṅghāhi nikkhamanti ;jaṅghāsu pavisitvā pādehi nikkhamanti ;
so sudaṃ aṭṭassaraṃ karoti … pe … eso , bhikkhave , satto imasmiṃyeva rājagahe sūcako ahosi … pe ….
Navamaṃ .
10. Kumbhaṇḍasuttaṃ
211.‘‘ Idhāhaṃ , āvuso , gijjhakūṭā pabbatā orohanto addasaṃ kumbhaṇḍaṃ purisaṃ vehāsaṃ gacchantaṃ .
So gacchantopi teva aṇḍe khandhe āropetvā gacchati .
Nisīdantopi tesveva aṇḍesu nisīdati .
Tamenaṃ gijjhāpi kākāpi kulalāpi anupatitvā anupatitvā vitacchenti virājenti .
So sudaṃ aṭṭassaraṃ karoti … pe … eso , bhikkhave , satto imasmiṃyeva rājagahe gāmakūṭako ahosi … pe ….
Dasamaṃ .
Paṭhamo vaggo .
Tassuddānaṃ
V1.235 –Aṭṭhi pesi ubho gāvaghātakā ,
Piṇḍo sākuṇiyo nicchavorabbhi ;
Asi sūkariko sattimāgavi ,
Usu kāraṇiko sūci sārathi ;
Yo ca sibbiyati sūcako hi so ,
Aṇḍabhāri ahu gāmakūṭakoti .
2. Dutiyavaggo
1. Sasīsakasuttaṃ
212. Evaṃ
T2.303M1.450P2.259 me sutaṃ – ekaṃ samayaṃ rājagahe veḷuvane .‘‘ Idhāhaṃ , āvuso , gijjhakūṭā pabbatā orohanto addasaṃ purisaṃ gūthakūpe sasīsakaṃ nimuggaṃ … pe … eso , bhikkhave , satto imasmiṃyeva rājagahe pāradāriko ahosi … pe ….
Paṭhamaṃ .
2. Gūthakhādasuttaṃ
213.‘‘ Idhāhaṃ , āvuso , gijjhakūṭā pabbatā orohanto addasaṃ purisaṃ gūthakūpe nimuggaṃ ubhohi hatthehi gūthaṃ khādantaṃ … pe … eso , bhikkhave , satto imasmiṃyeva rājagahe duṭṭhabrāhmaṇo ahosi .
So kassapassa sammāsambuddhassa pāvacane bhikkhusaṅghaṃ bhattena nimantetvā doṇiyo [ doṇiyā ( syā . kaṃ . pī . ka .)] gūthassa pūrāpetvā etadavoca – aho bhonto , yāvadatthaṃ bhuñjantu ceva harantu cāti … pe ….
Dutiyaṃ .
3. Nicchavitthisuttaṃ
214.‘‘ Idhāhaṃ
V1.236 , āvuso , gijjhakūṭā pabbatā orohanto addasaṃ nicchaviṃ itthiṃ vehāsaṃ gacchantiṃ .Tamenaṃ gijjhāpi kākāpi kulalāpi anupatitvā anupatitvā vitacchenti virājenti .
Sā sudaṃ aṭṭassaraṃ karoti … pe … esā , bhikkhave , itthī imasmiṃyeva rājagahe aticārinī ahosi … pe ….
Tatiyaṃ .
4. Maṅgulitthisuttaṃ
215.‘‘ Idhāhaṃ
P2.260 , āvuso , gijjhakūṭā pabbatā orohanto addasaṃ itthiṃ duggandhaṃ maṅguliṃ vehāsaṃ gacchantiṃ .Tamenaṃ gijjhāpi kākāpi kulalāpi
T2.304 anupatitvā anupatitvā vitacchenti virājenti .Sā sudaṃ aṭṭassaraṃ karoti … pe … esā , bhikkhave , itthī imasmiṃyeva rājagahe ikkhaṇikā ahosi … pe ….
Catutthaṃ .
5. Okilinīsuttaṃ
216.‘‘ Idhāhaṃ
M1.451 , āvuso , gijjhakūṭā pabbatā orohanto addasaṃ itthiṃ uppakkaṃ okiliniṃ okiriniṃ vehāsaṃ gacchantiṃ .Sā sudaṃ aṭṭassaraṃ karoti … pe … esā , bhikkhave , itthī kaliṅgassa rañño aggamahesī ahosi .
Sā issāpakatā sapattiṃ aṅgārakaṭāhena okiri … pe ….
Pañcamaṃ .
6. Asīsakasuttaṃ
217.‘‘ Idhāhaṃ , āvuso , gijjhakūṭā pabbatā orohanto addasaṃ asīsakaṃ kabandhaṃ [ kavandhaṃ ( sī . pī .)] vehāsaṃ gacchantaṃ .
Tassa ure akkhīni ceva honti mukhañca .
Tamenaṃ gijjhāpi kākāpi kulalāpi anupatitvā anupatitvā vitacchenti virājenti .
So sudaṃ aṭṭassaraṃ karoti … pe … eso , bhikkhave , satto imasmiṃyeva rājagahe hāriko nāma coraghātako ahosi … pe ….
Chaṭṭhaṃ .
7. Pāpabhikkhusuttaṃ
218.‘‘ Idhāhaṃ
V1.237 , āvuso , gijjhakūṭā pabbatā orohanto addasaṃ bhikkhuṃ vehāsaṃ gacchantaṃ .Tassa saṅghāṭipi ādittā sampajjalitā sajotibhūtā [ sañjotibhūtā ( syā . kaṃ .)], pattopi āditto sampajjalito sajotibhūto , kāyabandhanampi
P2.261 ādittaṃ sampajjalitaṃ sajotibhūtaṃ , kāyopi āditto sampajjalito sajotibhūto .So sudaṃ aṭṭassaraṃ karoti … pe … eso , bhikkhave , bhikkhu kassapassa sammāsambuddhassa pāvacane pāpabhikkhu ahosi … pe ….
Sattamaṃ .
8. Pāpabhikkhunīsuttaṃ
219.‘‘ Addasaṃ
T2.305 bhikkhuniṃ vehāsaṃ gacchantiṃ .Tassā saṅghāṭipi ādittā … pe … pāpabhikkhunī ahosi … pe ….
Aṭṭhamaṃ .
9. Pāpasikkhamānasuttaṃ
220.‘‘ Addasaṃ
M1.452 sikkhamānaṃ vehāsaṃ gacchantiṃ .Tassā saṅghāṭipi ādittā … pe … pāpasikkhamānā ahosi … pe ….
Navamaṃ .
10. Pāpasāmaṇerasuttaṃ
221.‘‘ Addasaṃ sāmaṇeraṃ vehāsaṃ gacchantaṃ .
Tassa saṅghāṭipi ādittā … pe … pāpasāmaṇero ahosi … pe ….
Dasamaṃ .
11. Pāpasāmaṇerīsuttaṃ
222.‘‘ Idhāhaṃ , āvuso , gijjhakūṭā pabbatā orohanto addasaṃ sāmaṇeriṃ vehāsaṃ gacchantiṃ .
Tassā saṅghāṭipi ādittā sampajjalitā sajotibhūtā , pattopi āditto sampajjalito
V1.238 sajotibhūto , kāyabandhanampi ādittaṃ sampajjalitaṃ sajotibhūtaṃ , kāyopi āditto sampajjalito sajotibhūto .Sā sudaṃ aṭṭassaraṃ karoti .
Tassa mayhaṃ , āvuso , etadahosi –
‘ acchariyaṃ vata , bho , abbhutaṃ vata , bho !
Evarūpopi nāma satto bhavissati !
Evarūpopi nāma yakkho bhavissati !
Evarūpopi nāma attabhāvapaṭilābho bhavissatī ’’’ ti !!
Atha kho bhagavā bhikkhū āmantesi –
‘‘ cakkhubhūtā vata , bhikkhave , sāvakā viharanti ;
ñāṇabhūtā vata , bhikkhave , sāvakā viharanti , yatra hi nāma sāvako evarūpaṃ ñassati vā dakkhati vā sakkhiṃ vā karissati .
Pubbeva
P2.262 me sā , bhikkhave , sāmaṇerī diṭṭhā ahosi .Api cāhaṃ na byākāsiṃ .
Ahañcetaṃ byākareyyaṃ , pare ca me na saddaheyyuṃ .
Ye me na saddaheyyuṃ , tesaṃ taṃ assa dīgharattaṃ ahitāya
T2.306 dukkhāya .Esā , bhikkhave , sāmaṇerī kassapassa sammāsambuddhassa pāvacane pāpasāmaṇerī ahosi .
Sā tassa kammassa vipākena bahūni vassāni bahūni vassasatāni bahūni vassasahassāni bahūni vassasatasahassāni niraye paccitvā tasseva kammassa vipākāvasesena evarūpaṃ attabhāvapaṭilābhaṃ paṭisaṃvedayatī ’’ ti .
Ekādasamaṃ .
Dutiyo vaggo .
Tassuddānaṃ –
Kūpe
M1.453 nimuggo hi so pāradāriko ;Gūthakhādi ahu duṭṭhabrāhmaṇo .
Nicchavitthi aticārinī ahu ;
Maṅgulitthi ahu ikkhaṇitthikā .
Okilini sapattaṅgārokiri ;
Sīsacchinno ahu coraghātako .
Bhikkhu
V1.239 bhikkhunī sikkhamānā ;Sāmaṇero atha sāmaṇerikā .
Kassapassa vinayasmiṃ pabbajjaṃ ;
Pāpakammaṃ kariṃsu tāvadeti .
Lakkhaṇasaṃyuttaṃ samattaṃ .