(2) Desanāgāminiyādivaṇṇanā
Desanāgāminiyādivaṇṇanā
475. Eketthāti
M0.626 etthasaddo sāsanavisayo .Ekasikkhāpadampi natthīti pi saddo bahusikkhāpadāni pana pagevāti ca āpatti pana pagevāti ca āpattīpi natthīti ca atthaṃ dasseti .
475. Dve saṃvāsakabhūmiyoti ettha bhūmīti avatthā .
‘‘ Sakalepi vinaye ’’ ti iminā dvetthāti pāṭhe etthasaddassa visayaṃ dasseti .
Ubhinnan ti bhikkhubhikkhunīnaṃ .
Aññathā pana kittakā paṭhamāpattikāti āha ‘‘ itarathā panā ’’ tiādi .
Tattha itarathāti paññattito aññena pakārena .
Kammañcāti kammañatti ca .
Kammapādikā cāti kammapādañatti ca .
475. Kammañca kammapādakā cāti ettha yasmā ñattikammesu ñatti sayameva kammaṃ hoti , ñattidutiyañatticatutthesu kammesu anussāvanasaṅkhātassa kammassa ñattipādakabhāvena tiṭṭhati , tasmā imāni dve ‘‘ ñattikiccānī ’’ ti vuttāni .
Navasu ṭhānesūti osāraṇādīsu navasu ṭhānesu .
Dvīsūti ñattidutiya , ñatticatutthakammesu .
Vajjapaṭicchādikāya pārājikaṃ , ukkhittānuvattikāya pārājikaṃ , aṭṭhavatthukāya pārājikanti
V2.251 iti ime tayoti yojanā .Kāraṇabhūtenāti hetubhūtena ,‘‘ karaṇabhūtenā ’’ tipi pāṭho , sādhakatamasattibhūtenāti attho .
Tesan ti addhānahīnādīnaṃ .
Etthāti ‘‘ tayo puggalā na upasampādetabbā ’’ ti pāṭhe , etesu aṅgahīnādīsu vā .
Yoti puggalo .
Aparipūro na yācatīti sambandho .
Aṅgahīnatā kāraṇavekallavasenapi veditabbāti āha ‘‘ apicetthā ’’ tiādi .
Mātughātakādayo karaṇadukkaṭakā cāti yojanā .
Esa nayoti ‘‘ apicetthā ’’ tiādinā vuttanayo .
Tatthāti tesu ñattikappanādīsu .
Ñattikappanāti ñattividhi .
Vippakatapaccattan ti vippakataṃ paccattaṃ .
Atītakaraṇan ti atītassa karaṇaṃ .
Vitthārento āha ‘‘ vatthusampannaṃ hī ’’ tiādi .
Tayo kammāna saṅgahāti ettha chandabhedarakkhanatthāya nakāre niggahitalopo .
Nāsitakāti nāsetabbā puggalā , nāsitabbāti nāsitā , nāsitā eva nāsitakā .
Tiṇṇaṃ janānan ti tiṇṇaṃ upasampadāpekkhajanānaṃ ekūpajjhāyena nānācariyena hutvāti yojanā .
Ekānussāvanāti ekato anussāvanā .
Pādo
M0.627 nāma kahāpaṇassa catutthabhāgo .
Māsako nāma pādassa pañcamabhāgo .Pārājikan ti vanappatiṃ chindantassa dutiyapārājikaṃ ( pārā .110).
Vanappatiṃ chindantassa pārājikan ti adinnādāne vanappatikathāya āgataṃ parasantakaṃ sandhāya vuttaṃ .
Anodissāti ‘‘ manusso maratū ’’ tiādinā na uddisitvā .
Tenāti visena .
Vissaṭṭhichaḍḍaneti sukkavissaṭṭhiyā mocane .
Bhikkhunovādakavaggasmin ti sāmaññādhāro .
Dasasu sikkhāpadesūti visesādhāro .
Dukkaṭā katāti dukkaṭaṃ vuttaṃ .
Pācittiyena saddhiṃ dukkaṭā katāti dasasupi sikkhāpadesu ekatoupasampannāya vasena vuttadukkaṭaṃ sandhāya vuttaṃ .
Paṭhamasikkhāpadamhiyevāti dasasu sikkhāpadesu paṭhamasikkhāpadamhiyeva .
Paṭhamasikkhāpadamhiyevāti bhikkhunovādakavaggassa paṭhamasikkhāpadeyeva .
Paṭhamasikkhāpadamhīti bhikkhunovādavaggassa paṭhamasikkhāpadavibhaṅge ( pāci .144 ādayo ).
Adhammakammeti bhikkhunovādakasammutikamme adhammakamme jāte āpajjitabbā dve āpattinavakā , dhammakamme dve āpattinavakāti cattāro navakā vuttā .
Upasampannāya bhikkhuniyāti sambandho .
‘‘ Āpatti hotī ’’ ti iminā ‘‘ cīvarenā ’’ ti padassa sambandhaṭṭhānaṃ dasseti .
Āmakadhaññaṃ viññāpetvā bhuñjantiyā pubbapayoge dukkaṭaṃ , ajjhohāre pācittiyaṃ .
Āmakadhaññaṃ viññāpetvā bhuñjantiyā viññāpanādipubbapayoge dukkaṭaṃ , ajjhohāre pācittiyaṃ .
Pācittiyena saddhiṃ dukkaṭā katāyevāti vuttaṃ .
‘‘ Catasso evā ’’ ti iminā tattikāti ettha tasaddassa visayaṃ dasseti .
Tā catasso parimāṇā yāsaṃ āpattīnanti tattikā .
Vijahantī tiṭṭhatītiādīsu yadā bhikkhuniyā ekena pādena hatthapāsaṃ vijahitvā ṭhatvā kiñci kammaṃ katvā tato aparena pādena vijahitvā ṭhātukāmatā uppajjati , tadā sā yathākkamaṃ ‘‘ vijahantī tiṭṭhati , vijahitvā tiṭṭhatī ’’ ti imaṃ vohāraṃ labhati .
Aññathā hissā gāmūpacāramokkantiyā viseso na siyā hatthapāsavijahanassāpi gamanattā .
Nipannassāpi tattikāti etthāpi eseva nayo .
Sāti bhikkhunī .
Nisīdati vā nipajjati vāti etthāpi yathāvuttādhippāyena addhāsanena hatthapāsaṃ vijahantī nisīdati , sakalena
V2.293 vā āsanena vijahitvā nisīdati , addhasarīrena vijahantī nipajjati , sakalena sarīrena vijahitvā nipajjatīti yojetabbaṃ .