Catuvipattivaṇṇanā
Catuvipattivaṇṇanā
336. Yaṃ taṃ pucchimhāti ettha niggahitato paraṃ akāralopoti āha ‘‘ yaṃ taṃ apucchimhā ’’ ti
V2.218 .
Tattha yan ti pañhaṃ .
Tan ti tuvaṃ .
‘‘ Tvan ’’ tipi pāṭho , ayamevattho .
336. Ekatiṃsa garukā nāma ubhato aṭṭha pārājikā , bhikkhūnaṃ terasa , bhikkhunīnaṃ dasa saṅghādisesā .
Aṭṭhettha anavasesāti etesu yathāvuttagarukesu sādhāraṇāsādhāraṇavasena aṭṭha pārājikā anavasesā nāma .
336. EkatiṃsāM0.567 ye garukāti ubhato aṭṭha pārājikā , bhikkhūnaṃ terasa , bhikkhunīnaṃ dasa ca saṅghādisesā .
Sādhāraṇāsādhāraṇavasena aṭṭha anavasesā nāma pārājikāni .Taṃ tadevāti taṃ taṃ eva pañhaṃ .
Aññathāti aññaṃ ākāraṃ .
Tadevāti sīlavipattiṃyeva .
Vitthārato dassetuṃ ‘‘ pārājikan ’’ tiādinā apucchitameva vissajjitaṃ .
‘‘ Tattha yo cāyaṃ , akkosati hasādhippāyo ’’ ti pāṭho .
Duṭṭhullavibhāvanavasenāgatavipattiṃ ṭhapetvā pucchāpaṭipāṭiyā yāvatatiyakapañhaṃ vissajjitumārabhi .
Ye duṭṭhullā sā sīlavipattīti ettha nanu sīlavipattiṃ pucchanto pañho natthi , kasmā pana ‘‘ sā sīlavipattī ’’ ti vissajjanaṃ vuttanti āha ‘‘ kiñcāpī ’’ tiādi .
Etan ti ‘‘ ye duṭṭhullā sā sīlavipattī ’’ ti vacanaṃ .
Tamevatthaṃ vitthārento āha ‘‘ catūsu hī ’’ tiādi .
Vatvāti saṃkhepena vatvā .
Ukkhittānuvattikā bhikkhunī aṭṭha yāvatatiyakasaṅghādisesā idha pucchitattā anantarapañhā nāma jātā .
Tissannaṃ vipattīnan ti sīlavipattito avasesānaṃ tissannaṃ vipattīnaṃ .
Tatthāti ‘‘ thullaccayan ’’ tiādivacane .
‘‘ Abbhācikkhantī ’’ ti padassa kattāraṃ dassento āha ‘‘ vadantā ’’ ti .
‘‘ Tathāhan ’’ tiādinā vadanākāraṃ dasseti .
‘‘ Ayaṃ chahī ’’ ti iminā ayaṃ sāti ettha sā saddo padālaṅkāroti dasseti .
Ettāvatāti ettakena ‘‘ thullaccayan ’’ tiādivacanamattena .
Vissajjitaṃ hotīti sambandho .