379. Bahujanaahitāya paṭipanno hotīti pāḷiṃ vitthārento āha ‘‘ vinayadharena hī ’’ tiādi . Tattha vinayadharenāti anuvijjakena , vinicchiteti sambandho . 379. Yāva akaniṭṭhabrahmāno dvidhā hontīti ettha avihādisuddhāvāsikā aññabhūmīsu ariyā dhammavādīpakkhaṃ eva bhajanti , itare duvidhampīti daṭṭhabbaṃ .

Ovādūpajīviniyoti bhikkhūnaṃ ovādaṃ upanissāya jīviniyo .

Upāsakāpīti ratanattayaṃ paṭissaraṇanti upāsakāpi . Dāyakāpīti bhikkhūnaṃ paccayadāyakāpi . Tesan ti upāsakādīnaṃ . Tathevāti yathā upāsakādayo dvidhā bhijjanti , tatheva .

Tatoti ārakkhadevatāhi paranti sambandho .

Tenāti dvidhākāraṇena . Voharantena jānitabbādivaṇṇanā niṭṭhitā . Kathinabhedaṃ Kathinaatthatādivaṇṇanā

382. Gahananissitoti ettha gahanasaddo diṭṭhipariyāyoti āha ‘‘ micchādiṭṭhiantaggāhikadiṭṭhisaṅkhātaṃ gahanan ’’ ti .

393. Tassa avajānantoti ettha ‘‘ tassā ’’ ti padaṃ ‘‘ vacanan ’’ ti pāṭhasesena sambandhitabbanti āha ‘‘ tassa vacanan ’’ ti . Tassāti navakassa . Tan ti navakaṃ .

394.‘‘ Yaṃatthāyā ’’ ti eso saddo samāsoti āha ‘‘ yadatthāyā ’’ ti .

‘‘ Taṃ atthan ’’ ti eso saddo liṅgavipallāsoti āha ‘‘ so attho ’’ ti . Attha saddo hi pulliṅgo , pāḷiyaṃ na parihāpetabban ti etthāpi liṅgavipallāso veditabbo .

Sabbatthāti sabbasmiṃ mahāsaṅgāme .

Iti mahāsaṅgāmavaṇṇanāya yojanā samattā .