Ekuttarikanayo dasakavāravaṇṇanā
Dasakavāravaṇṇanā
Dasakavāravaṇṇanā
330. Dasakesu aṭṭhāne vā panāti akāraṇe vā pana .
Tatthāti navakesu .
330. Dasakesu natthi dinnantiādivasena veditabbāti ‘‘ natthi dinnaṃ , natthi yiṭṭhaṃ , natthi hutaṃ , natthi sukatadukkaṭānaṃ kammānaṃ phalaṃ vipāko , natthi ayaṃ loko , natthi paro loko , natthi mātā , natthi pitā , natthi sattā opapātikā , natthi loke samaṇabrāhmaṇā sammaggatā sammāpaṭipannā , ye imañca lokaṃ parañca lokaṃ sayaṃ abhiññā sacchikatvā pavedentī ’’ ti ( ma . ni .2.94,225;3.91,116; saṃ . ni .3.210) evamāgataṃ sandhāya vuttaṃ .
330.‘‘ Oramattakañca adhikaraṇaṃ hoti , na ca gatigatan ’’ tiādinā ( cūḷava .204) dasa adhammikā salākaggāhā .
Viparītā dhammikā .
330. Sassato lokotiādinā vasenāti ‘‘ sassato loko , asassato loko .
Antavā loko , anantavā loko .
Taṃ jīvaṃ taṃ sarīranti vā , aññaṃ jīvaṃ aññaṃ sarīranti vā .
Hoti tathāgato parammaraṇā , na hoti tathāgato parammaraṇā .
Hoti ca na hoti ca tathāgato parammaraṇā , neva hoti na na hoti tathāgato parammaraṇā ’’ ti ( ma . ni .1.269) evaṃ āgatā dasa antaggāhikā diṭṭhiyo sandhāya vuttaṃ .
Sassato lokotiādivasenāti ‘‘ sassato lokoti vā , asassato lokoti vā , antavā lokoti vā , anantavā lokoti vā , taṃ jīvaṃ taṃ sarīranti vā , aññaṃ jīvaṃ aññaṃ sarīranti vā , hoti tathāgato paraṃ maraṇāti vā , na hoti tathāgato paraṃ maraṇāti vā , hoti ca na ca hoti tathāgato paraṃ maraṇāti vā , neva hoti na na hoti tathāgato paraṃ maraṇāti vā ’’ ti ( ma . ni .1.269) evamāgataṃ saṅgaṇhāti .
Samathakkhandhake vuttehi
M0.562 samannāgato hotīti sambandho .
Micchādiṭṭhiādayoti micchādiṭṭhimicchāsaṅkappādayo aṭṭhamicchāñāṇamicchāvimuttīhi saddhiṃ dasa micchattā .
Tattha micchāñāṇan ti micchādiṭṭhisampayutto moho .
Avimuttasseva vimuttasaññitā micchāvimutti nāma .
Viparītāti sammādiṭṭhiādayo sammāñāṇasammāvimuttipariyosānā dasa .
Tattha sammāvimutti arahattaphalaṃ , taṃsampayuttaṃ pana ñāṇaṃ vā paccavekkhaṇañāṇaṃ vā sammāñāṇan ti veditabbaṃ .‘‘ Natthi dinnantiādivasenā ’’ ti ādisaddena ‘‘ natthi yiṭṭhaṃ natthi hutan ’’ tiādayo ( dha . sa .1221; ma . ni .94.225;3.91,116; saṃ . ni .3.210; a . ni .10.176) nava natthikā saṅgahetabbā .
‘‘ Sassato lokoti ādivasenā ’’ tiādisaddena ( dī . ni .1.31; ma . ni .1.269)‘‘ asassato loko ’’ tiādayo ( ma . ni .1.269) nava antaggāhike saṅgaṇhāti .
Micchādiṭṭhiādayo micchāvimuttipariyosānāti ‘‘ micchādiṭṭhi micchāsaṅkappo micchāvācā micchākammanto micchāājīvo micchāvāyāmo micchāsati micchāsamādhi micchāñāṇaṃ micchāvimuttī ’’ ti ( vibha .970) evamāgataṃ sandhāya vadati .
Tattha micchāñāṇan ti pāpakiriyāsu upāyacintāvasena pāpakaṃ katvā ‘‘ sukataṃ mayā ’’ ti paccavekkhaṇākārena ca uppanno moho .
Micchāvimuttīti avimuttasseva sato vimuttisaññitā .
Viparītā sammattāti dasahi micchattehi viparītā dasa sammattā sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi sammāñāṇaṃ sammāvimuttīti .
Samathakkhandhake niddiṭṭhāti ‘‘ oramattakaṃ adhikaraṇaṃ hoti , na ca gatigataṃ , na ca saritasāritan ’’ tiādinā ( cūḷava .204) niddiṭṭhā .
Samathakkhandhake vuttehi samannāgato hotīti
M3.482 sambandho .Dasa ādīnavā niddiṭṭhāti sambandho .
Undūrakkhāyitan ti mūsikena khāditaṃ .
Ettha hi khedhātu khādanattho hoti .
Aggidaḍḍhan ti agginā daḍḍhaṃ .
Etesūti etesu dasasu paṃsukūlesu .
Udakasāṭikaṃ vā saṃkaccikaṃ vāti bhikkhunīnaṃ udakasāṭikaṃ
V2.214 vā saṃkaccikaṃ vā .
Ettha vā saddo aniyamavikappattho .
‘‘ Saṃkaccikaṃ vā pakkhipitvā dasā ’’ ti vuttaṃ kappiyattā etesaṃ .Māturakkhitādayo dasa itthiyo .
Dhanakkītādayo dasa bhariyā .
Paṇṇasanthāro tiṇasanthārena saṅgahito .
Sabbatthāti sabbesu dasakesu .
‘‘ Sikkhāsammutiṃ datvā dasavassāya tassā dvādasavassakāle sayampi dvādasavassā bhavissatī ’’ ti vuṭṭhāpanasammuti sāditabbā .
‘‘ Vinayadharasseva ‘ āpattānāpattiṃ na jānātī ’ ti ārabbha yāva ‘ ubhayāni kho panassa … pe … anubyañjanaso ’ ti pañcaṅgāni vatvā punapi ‘ āpattānāpattiṃ na jānāti ’ cceva ārabbha yāva ‘ adhikaraṇe ca na vinicchayakusalo hotī ’ ti pañca vuttā , te tathā tathā pañca pañca katvā dasa hontī ’’ ti likhitaṃ .
‘‘ Dasavassāya bhikkhuniyā nissayo dātabbo ’’ ti ekaccesu potthakesu natthi , kiñcāpi natthi , pāṭho eva pana hoti .
Iti dasakavāravaṇṇanāya yojanā samattā .
Dasakavāravaṇṇanā niṭṭhitā .
Ekuttarikanayo niṭṭhito .