Dutiyapārājikasamuṭṭhānavaṇṇanā
Chasattati paṭhamapārājikasamuṭṭhānā .
Dutiyapārājikasamuṭṭhānavaṇṇanā
259. Idaṃ
M0.554 samuṭṭhānaṃ ekaṃ samuṭṭhānasīsanti sambandho .
‘‘ Adinnādānan ’’ ti iminā adinnan ti ettha samudāyanāme ekadesavohāroti dasseti .
Sesānīti dutiyapārājikato sesāni ekūnasattati sikkhāpadāni .
Tenāti dutiyapārājikena .Tatthāti ‘‘ viggahuttarī ’’ tiādivacane .
Viggahuttarītiādipadānaṃ byañjane ādaramakatvā atthameva dassetuṃ vuttaṃ ‘‘ manussaviggahauttarimanussadhammasikkhāpadānī ’’ ti .
Aniyatā dutiyikāti āpattiṃ apekkhitvā pāḷiyaṃ itthiliṅgavasena vuttaṃ , aṭṭhakathāyaṃ pana sikkhāpadaṃ apekkhitvā napuṃsakaliṅgavasena dutiyanti vuttaṃ .
259.‘‘ Kukkuccaṃ cīvaraṃ datvāti kukkuccuppādanañca dhammikānaṃ kammānaṃ chandaṃ datvā khīyanañca cīvaraṃ datvā khīyanañcā ’’ ti pāṭho .
‘‘ Datvā ’’ ti uppaṭipāṭiyā vuttaṃ , tasmā ‘‘ kukkuccaṃ dhammikaṃ datvāti pāṭho sundaro ’’ ti vadanti , vicāretvā gahetabbaṃ .
Samuṭṭhānā tikā katāti ettha ‘‘ tikasamuṭṭhānā ’’ ti vattabbe padavipariyāyavasena kakārassa dīghavasena samuṭṭhānā tikāti vuttanti dassento āha ‘‘ tikasamuṭṭhānā katā ’’ ti .