4. Ghoṭamukhasuttavaṇṇanā
412. Evaṃ
V3.290 me sutan ti ghoṭamukhasuttaṃ .Tattha khemiyambavaneti evaṃnāmake ambavane .
Dhammiko paribbajoti dhammikā pabbajjā .
Adassanāti tumhādisānaṃ
M3.282 vā paṇḍitānaṃ adassanena .Yo vā panettha dhammoti yo vā pana ettha dhammo
P3.413 sabhāvo , tasseva vā adassanena .Iminā ‘‘ amhākaṃ kathā appamāṇaṃ , dhammova pamāṇan ’’ ti dasseti .
Tato thero ‘‘ navauposathāgāre viya bahunā kammena idha bhavitabban ’’ ti cintetvā caṅkamā oruyha paṇṇasālaṃ pavisitvā nisīdi .
Taṃ dassetuṃ evaṃ vuttetiādi vuttaṃ .
413. Cattārome brāhmaṇāti therassa kira etadahosi –
‘‘ ayaṃ brāhmaṇo ‘ dhammikaṃ pabbajjaṃ upagato samaṇo vā brāhmaṇo vā natthī ’ ti vadati .
Imassa cattāro puggale dve ca parisā dassetvā ‘ catutthaṃ puggalaṃ katarāya parisāya bahulaṃ passasī ’ ti pucchissāmi , jānamāno ‘ anāgāriyaparisāyan ’ ti vakkhati .
Evametaṃ sakamukheneva ‘ dhammiko paribbajo atthī ’ ti vadāpessāmī ’’ ti imaṃ desanaṃ ārabhi .
414. Tattha sārattarattāti suṭṭhu rattarattā .
Sānuggahā vācā bhāsitā sakāraṇā vācā bhāsitā .
Vuttañhetaṃ mayā ‘‘ amhākaṃ kathā appamāṇaṃ , dhammova pamāṇan ’’ ti .
421. Kiṃ pana teti gihi nāma kappiyampi akappiyampi vadeyyāti vivecanatthaṃ pucchi .
Kārāpesīti māpesi .
Kārāpetvā ca pana kālaṃ katvā sagge nibbatto .
Etassa kira jānanasippe mātarampi pitarampi ghātetvā attāva ghātetabboti āgacchati .
Etaṃ sippaṃ jānanto ṭhapetvā etaṃ añño sagge nibbatto nāma natthi , esa pana theraṃ upanissāya puññaṃ katvā tattha nibbattitvā ca pana ‘‘ kenāhaṃ kammena idha nibbatto ’’ ti āvajjetvā yathābhūtaṃ
P3.414 ñatvā ekadivasaṃ jiṇṇāya bhojanasālāya paṭisaṅkharaṇatthaṃ saṅghe sannipatite manussavesena āgantvā pucchi –‘‘ kimatthaṃ , bhante , saṅgho sannipatito ’’ ti ?
Bhojanasālāya
V3.291 paṭisaṅkharaṇatthanti .Kenesā kāritāti ?
Ghoṭamukhenāti .
Idāni so kuhinti ?
Kālaṅkatoti .
Atthi panassa koci ñātakoti ?
Atthi ekā bhaginīti .
Pakkosāpetha nanti .
Bhikkhū pakkosāpesuṃ .
So taṃ upasaṅkamitvā –
‘‘ ahaṃ , tava bhātā , ghoṭamukho nāma imaṃ sālaṃ kāretvā sagge nibbatto , asuke ca asuke ca ṭhāne mayā ṭhapitaṃ dhanaṃ
M3.283 atthi , taṃ gahetvā imañca bhojanasālaṃ kārehi , dārake ca posehī ’’ ti vatvā bhikkhusaṅghaṃ vanditvā vehāsaṃ uppatitvā devalokameva agamāsi .Sesaṃ sabbattha uttānamevāti .
Papañcasūdaniyā majjhimanikāyaṭṭhakathāya
Ghoṭamukhasuttavaṇṇanā niṭṭhitā .