9. Upālisuttaṃ

99. Atha kho āyasmā upāli yena bhagavā tenupasaṅkami ;

upasaṅkamitvā bhagavantaṃ abhivādetvā ekamantaṃ nisīdiP5.202 .

Ekamantaṃ nisinno kho āyasmā upāli bhagavantaṃ etadavoca –

‘‘ icchāmahaṃ , bhante , araññavanapatthāni pantāni senāsanāni paṭisevitun ’’ ti .

‘‘ Durabhisambhavāni hi kho [ durabhisambhavāni kho ( sī . pī .)], upāli , araññavanapatthāni pantāni senāsanāni .

Dukkaraṃ pavivekaṃ durabhiramaṃ .

Ekatte haranti maññe mano vanāni samādhiṃ alabhamānassa bhikkhuno .

Yo kho , upāli , evaṃ vadeyya –

‘ ahaṃ samādhiṃ alabhamāno araññavanapatthāni pantāni senāsanāni paṭisevissāmī ’ ti , tassetaṃ pāṭikaṅkhaṃ –

‘ saṃsīdissati vā uplavissati vā ’ ti [ uppilavissati vā ( sī . syā . pī .)].

‘‘ Seyyathāpi , upāli , mahāudakarahado .

Atha āgaccheyya hatthināgo sattaratano vā aḍḍhaṭṭharatano [ aṭṭharatano ( sī . pī .)] vā .

Tassa evamassa –

‘ yaṃnūnāhaṃ imaṃ udakarahadaṃ ogāhetvā kaṇṇasaṃdhovikampi khiḍḍaṃ kīḷeyyaṃ piṭṭhisaṃdhovikampi khiḍḍaṃ kīḷeyyaṃ .

Kaṇṇasaṃdhovikampi khiḍḍaṃ kīḷitvā piṭṭhisaṃdhovikampi khiḍḍaṃ kīḷitvā nhatvā [ nahātvā ( sī . pī .), nhātvā ( syā .)] ca pivitvā ca paccuttaritvā yena kāmaṃ pakkameyyan ’ ti .

So taṃ udakarahadaṃ ogāhetvā kaṇṇasaṃdhovikampi khiḍḍaṃ kīḷeyya piṭṭhisaṃdhovikampi khiḍḍaṃ kīḷeyya ;

kaṇṇasaṃdhovikampi khiḍḍaṃ kīḷitvā piṭṭhisaṃdhovikampi khiḍḍaṃ kīḷitvāV3.172 nhatvā ca pivitvā ca paccuttaritvā yena kāmaṃ pakkameyya .

Taṃ kissa hetu ?

Mahā , upāli [ mahā hupāli ( sī . pī .)], attabhāvo gambhīre gādhaṃ vindati .

‘‘ Atha āgaccheyya saso vā biḷāro vā .

Tassa evamassa –

‘ koT5.217 cāhaṃ , ko ca hatthināgo !

Yaṃnūnāhaṃ imaṃ udakarahadaṃ ogāhetvā kaṇṇasaṃdhovikampi khiḍḍaṃ kīḷeyyaṃ piṭṭhisaṃdhovikampi khiḍḍaṃ kīḷeyyaṃP5.203 ;

kaṇṇasaṃdhovikampi khiḍḍaṃ kīḷitvā piṭṭhisaṃdhovikampi khiḍḍaṃ kīḷitvā nhatvā ca pivitvā ca paccuttaritvā yena kāmaṃ pakkameyyan ’ ti .

So taṃ udakarahadaṃ sahasā appaṭisaṅkhā pakkhandeyya .

Tassetaṃ pāṭikaṅkhaṃ –

‘ saṃsīdissati vā uplavissati vā ’ tiM3.421 .

Taṃ kissa hetu ?

Paritto , upāli , attabhāvo gambhīre gādhaṃ na vindati .

Evamevaṃ kho , upāli , yo evaṃ vadeyya –

‘ ahaṃ samādhiṃ alabhamāno araññavanapatthāni pantāni senāsanāni paṭisevissāmī ’ ti , tassetaṃ pāṭikaṅkhaṃ –

‘ saṃsīdissati vā uplavissati vā ’ ti .

‘‘ Seyyathāpi , upāli , daharo kumāro mando uttānaseyyako sakena muttakarīsena kīḷati .

Taṃ kiṃ maññasi , upāli , nanvāyaṃ kevalā paripūrā bālakhiḍḍā ’’ ti ?

‘‘ Evaṃ , bhante ’’.

‘‘ Sa kho so , upāli , kumāro aparena samayena vuddhimanvāya indriyānaṃ paripākamanvāya yāni kānici kumārakānaṃ kīḷāpanakāni bhavanti , seyyathidaṃ – vaṅkakaṃ [ vaṅkaṃ ( sī . pī .)] ghaṭikaṃ mokkhacikaṃ ciṅgulakaṃ [ piṅgulikaṃ ( syā .), ciṅkulakaṃ ( ka .)] pattāḷhakaṃ rathakaṃ dhanukaṃ , tehi kīḷati .

Taṃ kiṃ maññasi , upāli , nanvāyaṃ khiḍḍā purimāya khiḍḍāya abhikkantatarā ca paṇītatarā cā ’’ ti ?

‘‘ Evaṃ , bhante ’’.

‘‘ Sa kho so , upāli , kumāro aparena samayena vuddhimanvāya indriyānaṃ paripākamanvāya pañcahi kāmaguṇehi samappito samaṅgibhūto paricāreti cakkhuviññeyyehi rūpehi iṭṭhehi kantehi manāpehi piyarūpehi kāmūpasaṃhitehiT5.218 rajanīyehi , sotaviññeyyehi saddehi … ghānaviññeyyehi gandhehi … jivhāviññeyyehi rasehi … kāyaviññeyyehi phoṭṭhabbehiP5.204 iṭṭhehi kantehi manāpehi piyarūpehi kāmūpasaṃhitehi rajanīyehi .

Taṃ kiṃ maññasi , upāli , nanvāyaṃ khiḍḍā purimāhi khiḍḍāhi abhikkantatarā ca paṇītatarā cā ’’ ti ?

‘‘ Evaṃ , bhante ’’.

[ dī . ni .1.190; ma . ni .2.233]‘‘ IdhaV3.173 kho pana vo [ voti nipātamattaṃ ( aṭṭha .)], upāli , tathāgato loke uppajjati arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā .

So imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti .

So dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ , kevalaparipuṇṇaṃ parisuddhaṃ brahmacariyaṃ pakāseti .

‘‘ Taṃ dhammaṃ suṇāti gahapati vā gahapatiputto vā aññatarasmiṃ vā kule paccājāto .

So taṃ dhammaṃ sutvā tathāgate saddhaṃ paṭilabhati .

SoM3.422 tena saddhāpaṭilābhena samannāgato iti paṭisañcikkhati –

‘ sambādho gharāvāso rajāpatho , abbhokāso pabbajjā .

Nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ .

Yaṃnūnāhaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyyan ’ ti .

‘‘ So aparena samayena appaṃ vā bhogakkhandhaṃ pahāya mahantaṃ vā bhogakkhandhaṃ pahāya appaṃ vā ñātiparivaṭṭaṃ pahāya mahantaṃ vā ñātiparivaṭṭaṃ pahāya kesamassuṃ ohāretvā kāsāyāni vatthāniT5.219 acchādetvā agārasmā anagāriyaṃ pabbajati .

‘‘ So evaṃ pabbajito samāno bhikkhūnaṃ sikkhāsājīvasamāpanno pāṇātipātaṃ pahāya pāṇātipātā paṭivirato hoti nihitadaṇḍo nihitasattho lajjī dayāpanno sabbapāṇabhūtahitānukampī viharati .

‘‘ Adinnādānaṃ pahāya adinnādānā paṭivirato hoti dinnādāyī dinnapāṭikaṅkhī ;

athenena sucibhūtena attanā viharati .

‘‘ Abrahmacariyaṃ pahāya brahmacārī hoti ārācārīP5.205 virato methunā gāmadhammā .

‘‘ Musāvādaṃ pahāya musāvādā paṭivirato hoti saccavādī saccasandho theto paccayiko avisaṃvādako lokassa .

‘‘ PisuṇaṃV3.174 vācaṃ pahāya pisuṇāya vācāya paṭivirato hoti , ito sutvā na amutra akkhātā imesaṃ bhedāya , amutra vā sutvā na imesaṃ akkhātā amūsaṃ bhedāya .

Iti bhinnānaṃ vā sandhātā sahitānaṃ vā anuppadātā , samaggārāmo samaggarato samagganandī ;

samaggakaraṇiṃ vācaṃ bhāsitā hoti .

‘‘ Pharusaṃ vācaṃ pahāya pharusāya vācāya paṭivirato hoti .

Yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā , tathārūpiṃ vācaṃ bhāsitā hoti .

‘‘ Samphappalāpaṃ pahāya samphappalāpā paṭivirato hoti kālavādī bhūtavādī atthavādī dhammavādī vinayavādī , nidhānavatiṃ vācaṃ bhāsitā hoti kālena sāpadesaṃ pariyantavatiṃ atthasaṃhitaṃ .

‘‘ SoM3.423 bījagāmabhūtagāmasamārambhā paṭivirato hoti .

Ekabhattiko hoti rattūparato , virato vikālabhojanā .

Naccagītavāditavisūkadassanā paṭivirato hoti , mālāgandhavilepanadhāraṇamaṇḍanavibhūsanaṭṭhānā paṭivirato hoti , uccāsayanamahāsayanā paṭivirato hotiT5.220 , jātarūparajatapaṭiggahaṇā paṭivirato hoti , āmakadhaññapaṭiggahaṇā paṭivirato hoti , āmakamaṃsapaṭiggahaṇā paṭivirato hoti , itthikumārikapaṭiggahaṇā paṭivirato hoti , dāsidāsapaṭiggahaṇā paṭivirato hoti , ajeḷakapaṭiggahaṇā paṭivirato hoti , kukkuṭasūkarapaṭiggahaṇā paṭivirato hoti , hatthigavassavaḷavapaṭiggahaṇā paṭivirato hoti , khettavatthupaṭiggahaṇā paṭivirato hoti , dūteyyapahiṇagamanānuyogā paṭivirato hoti , kayavikkayā paṭivirato hoti , tulākūṭakaṃsakūṭamānakūṭā paṭivirato hotiP5.206 , ukkoṭanavañcananikatisāciyogā paṭivirato hoti , chedanavadhabandhanaviparāmosaālopasahasākārā paṭivirato hoti .

‘‘ So santuṭṭho hoti kāyaparihārikena cīvarena kucchiparihārikena piṇḍapātena .

Yena yeneva pakkamati samādāyeva pakkamati , seyyathāpi nāma pakkhī sakuṇo yena yeneva ḍeti sapattabhārova ḍeti .

Evamevaṃ bhikkhu santuṭṭho hoti kāyaparihārikena cīvarena kucchiparihārikenaV3.175 piṇḍapātena .

Yena yeneva pakkamati samādāyeva pakkamati .

So iminā ariyena sīlakkhandhena samannāgato ajjhattaṃ anavajjasukhaṃ paṭisaṃvedeti .

‘‘ So cakkhunā rūpaṃ disvā na nimittaggāhī hoti nānubyañjanaggāhī .

Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ , tassa saṃvarāya paṭipajjati ;

rakkhati cakkhundriyaṃ , cakkhundriye saṃvaraṃ āpajjati .

Sotena saddaṃ sutvā … ghānena gandhaṃ ghāyitvā … jivhāya rasaṃ sāyitvā … kāyena phoṭṭhabbaṃ phusitvā … manasā dhammaṃ viññāya na nimittaggāhī hoti nānubyañjanaggāhīT5.221 .

Yatvādhikaraṇamenaṃ manindriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ , tassa saṃvarāya paṭipajjati ;

rakkhati manindriyaṃ , manindriye saṃvaraṃ āpajjati .

So iminā ariyena indriyasaṃvarena samannāgato ajjhattaṃ abyāsekasukhaṃ paṭisaṃvedeti .

‘‘ SoM3.424 abhikkante paṭikkante sampajānakārī hoti , ālokite vilokite sampajānakārī hoti , samiñjite pasārite sampajānakārī hoti , saṅghāṭipattacīvaradhāraṇe sampajānakārī hoti , asite pīte khāyite sāyite sampajānakārī hoti , uccārapassāvakamme sampajānakārī hoti , gate ṭhite nisinne sutte jāgarite bhāsite tuṇhībhāve sampajānakārī hoti .

‘‘ So iminā ca ariyena sīlakkhandhena samannāgato , iminā ca ariyenaP5.207 indriyasaṃvarena samannāgato , iminā ca ariyena satisampajaññe samannāgato vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ .

So araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā .

‘‘ So abhijjhaṃ loke pahāya vigatābhijjhena cetasā viharati , abhijjhāya cittaṃ parisodheti .

Byāpādapadosaṃ pahāya abyāpannacitto viharati sabbapāṇabhūtahitānukampī , byāpādapadosā cittaṃ parisodheti .

Thinamiddhaṃ pahāya vigatathinamiddho viharati ālokasaññī satoV3.176 sampajāno , thinamiddhā cittaṃ parisodheti .

Uddhaccakukkuccaṃ pahāya anuddhato viharati ajjhattaṃ vūpasantacittoT5.222 , uddhaccakukkuccā cittaṃ parisodheti .

Vicikicchaṃ pahāya tiṇṇavicikiccho viharati akathaṃkathī kusalesu dhammesu , vicikicchāya cittaṃ parisodheti .

‘‘ So ime pañca nīvaraṇe pahāya cetaso upakkilese paññāya dubbalīkaraṇe , vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati .