8. Tikicchakasuttaṃ
108.‘‘ Tikicchakā
P5.218 , bhikkhave , virecanaṃ denti pittasamuṭṭhānānampi ābādhānaṃ paṭighātāya , semhasamuṭṭhānānampi ābādhānaṃ paṭighātāya , vātasamuṭṭhānānampi ābādhānaṃ paṭighātāya .Atthetaṃ , bhikkhave , virecanaṃ ;
‘ netaṃ natthī ’ ti vadāmi .
Tañca kho etaṃ , bhikkhave , virecanaṃ sampajjatipi vipajjatipi .
‘‘ Ahañca kho , bhikkhave , ariyaṃ virecanaṃ desessāmi , yaṃ virecanaṃ sampajjatiyeva no vipajjati , yaṃ virecanaṃ āgamma jātidhammā sattā jātiyā parimuccanti , jarādhammā sattā jarāya parimuccanti , maraṇadhammā sattā maraṇena parimuccanti , sokaparidevadukkhadomanassupāyāsadhammā
V3.186 sattā sokaparidevadukkhadomanassupāyāsehi parimuccanti .Taṃ suṇātha , sādhukaṃ manasi karotha ;
bhāsissāmī ’’ ti .
‘‘ Evaṃ , bhante ’’ ti kho te bhikkhū bhagavato paccassosuṃ .
Bhagavā etadavoca –
‘‘ Katamañca taṃ , bhikkhave , ariyaṃ virecanaṃ , yaṃ virecanaṃ sampajjatiyeva no vipajjati , yaṃ virecanaṃ āgamma jātidhammā sattā jātiyā parimuccanti , jarādhammā sattā jarāya parimuccanti , maraṇadhammā sattā maraṇena parimuccanti
T5.234 , sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti ?‘‘ Sammādiṭṭhikassa , bhikkhave , micchādiṭṭhi virittā hoti ;
ye ca micchādiṭṭhipaccayā aneke pāpakā akusalā dhammā sambhavanti te cassa virittā honti ;
sammādiṭṭhipaccayā ca aneke kusalā dhammā bhāvanāpāripūriṃ gacchanti .
‘‘ Sammāsaṅkappassa
M3.434 , bhikkhave , micchāsaṅkappo viritto hoti … pe … sammāvācassa , bhikkhave , micchāvācā virittā hoti … sammākammantassa , bhikkhave , micchākammanto viritto hoti … sammāājīvassa , bhikkhave , micchāājīvo viritto hoti … sammāvāyāmassa , bhikkhave , micchāvāyāmo viritto hoti … sammāsatissa , bhikkhave , micchāsati virittā hoti … sammāsamādhissaP5.219 , bhikkhave , micchāsamādhi viritto hoti … sammāñāṇissa , bhikkhave , micchāñāṇaṃ virittaṃ hoti … pe ….‘‘ Sammāvimuttissa , bhikkhave , micchāvimutti virittā hoti ;
ye ca micchāvimuttipaccayā aneke pāpakā akusalā dhammā sambhavanti te cassa virittā honti ;
sammāvimuttipaccayā ca aneke kusalā dhammā bhāvanāpāripūriṃ gacchanti .
Idaṃ kho taṃ , bhikkhave , ariyaṃ virecanaṃ yaṃ virecanaṃ sampajjatiyeva no vipajjati , yaṃ virecanaṃ āgamma jātidhammā sattā jātiyā parimuccanti … pe … sokaparidevadukkhadomanassupāyāsehi parimuccantī ’’ ti .
Aṭṭhamaṃ .