5. Akkosavaggo

1. Vivādasuttaṃ

41. AthaT5.81V3.64 kho āyasmā upāli yena bhagavā tenupasaṅkami ;

upasaṅkamitvā bhagavantaṃ abhivādetvā ekamantaṃ nisīdi .

Ekamantaṃ nisinno khoM3.317 āyasmā upāli bhagavantaṃ etadavoca –

‘‘ ko nu kho , bhante , hetu ko paccayo , yena saṅghe bhaṇḍanakalahaviggahavivādā uppajjanti , bhikkhū ca na phāsu [ phāsuṃ (?)] viharantī ’’ ti ?

‘‘ Idhupāli , bhikkhū adhammaṃ dhammoti dīpenti , dhammaṃ adhammoti dīpenti , avinayaṃ vinayoti dīpenti , vinayaṃ avinayoti dīpenti , abhāsitaṃ alapitaṃ tathāgatena bhāsitaṃ lapitaṃ tathāgatenāti dīpenti , bhāsitaṃ lapitaṃ tathāgatena abhāsitaṃ alapitaṃ tathāgatenāti dīpenti , anāciṇṇaṃ tathāgatena āciṇṇaṃ tathāgatenāti dīpenti , āciṇṇaṃ tathāgatena anāciṇṇaṃ tathāgatenāti dīpenti , apaññattaṃ tathāgatena paññattaṃ tathāgatenātiP5.78 dīpenti , paññattaṃ tathāgatena apaññattaṃ tathāgatenāti dīpenti .

Ayaṃ kho , upāli , hetu ayaṃ paccayo , yena saṅghe bhaṇḍanakalahaviggahavivādā uppajjanti , bhikkhū ca na phāsu viharantī ’’ ti .

Paṭhamaṃ .

2. Paṭhamavivādamūlasuttaṃ

42.‘‘ Kati nu kho , bhante , vivādamūlānī ’’ ti ?

‘‘ Dasa kho , upāli , vivādamūlāni .

Katamāni dasa ?

Idhupāli , bhikkhū adhammaṃ dhammoti dīpenti , dhammaṃ adhammoti dīpenti , avinayaṃ vinayoti dīpenti , vinayaṃ avinayoti dīpenti , abhāsitaṃ alapitaṃ tathāgatena bhāsitaṃ lapitaṃ tathāgatenāti dīpentiT5.82 , bhāsitaṃ lapitaṃ tathāgatena abhāsitaṃ alapitaṃ tathāgatenāti dīpenti , anāciṇṇaṃ tathāgatena āciṇṇaṃ tathāgatenāti dīpenti , āciṇṇaṃ tathāgatena anāciṇṇaṃ tathāgatenāti dīpenti , apaññattaṃ tathāgatena paññattaṃ tathāgatenāti dīpenti , paññattaṃ tathāgatena apaññattaṃ tathāgatenāti dīpenti .

Imāni kho , upāli , dasa vivādamūlānī ’’ ti .

Dutiyaṃ .

3. Dutiyavivādamūlasuttaṃ

43.‘‘ KatiV3.65 nu kho , bhante , vivādamūlānī ’’ ti ?

‘‘ Dasa kho , upāli , vivādamūlāni .

Katamāni dasa ?

Idhupāli , bhikkhū anāpattiṃ āpattīti dīpenti , āpattiṃ anāpattīti dīpenti , lahukaṃ āpattiṃ garukāpattīti dīpentiM3.318 , garukaṃ āpattiṃ lahukāpattīti dīpenti , duṭṭhullaṃ āpattiṃ aduṭṭhullāpattīti dīpenti , aduṭṭhullaṃ āpattiṃ duṭṭhullāpattīti dīpenti , sāvasesaṃ āpattiṃ anavasesāpattīti dīpenti , anavasesaṃ āpattiṃ sāvasesāpattīti dīpentiP5.79 , sappaṭikammaṃ āpattiṃ appaṭikammāpattīti dīpenti , appaṭikammaṃ āpattiṃ sappaṭikammāpattīti dīpenti .

Imāni kho , upāli , dasa vivādamūlānī ’’ ti .

Tatiyaṃ .

4. Kusinārasuttaṃ

44. Ekaṃ samayaṃ bhagavā kusinārāyaṃ viharati baliharaṇe vanasaṇḍe .

Tatra kho bhagavā bhikkhū āmantesi –

‘‘ bhikkhavo ’’ ti .

‘‘ Bhadante ’’ ti te bhikkhū bhagavato paccassosuṃ .

Bhagavā etadavoca –

[ cūḷava .399; pari .436]‘‘ Codakena , bhikkhave , bhikkhunā paraṃ codetukāmena pañca dhamme ajjhattaṃ paccavekkhitvā pañca dhamme ajjhattaṃ upaṭṭhāpetvā paro codetabbo .

Katame pañca dhammā ajjhattaṃT5.83 paccavekkhitabbā ?

Codakena , bhikkhave , bhikkhunā paraṃ codetukāmena evaṃ paccavekkhitabbaṃ –

‘ parisuddhakāyasamācāro nu khomhi , parisuddhenamhi kāyasamācārena samannāgato acchiddena appaṭimaṃsena .

Saṃvijjati nu kho me eso dhammo udāhu no ’ ti ?

No ce , bhikkhave , bhikkhu parisuddhakāyasamācāro hoti parisuddhena kāyasamācārena samannāgato acchiddena appaṭimaṃsena , tassa bhavanti vattāro –

‘ iṅgha tāva āyasmā kāyikaṃ sikkhassū ’ ti , itissa bhavanti vattāro .

‘‘ Puna caparaṃ , bhikkhave , codakena bhikkhunā paraṃ codetukāmena evaṃ paccavekkhitabbaṃ –

‘ parisuddhavacīsamācāro nu khomhi , parisuddhenamhi vacīsamācārena samannāgato acchiddena appaṭimaṃsena .

Saṃvijjati nu kho me eso dhammo udāhu no ’ ti ?

No ce , bhikkhave , bhikkhuV3.66 parisuddhavacīsamācāro hoti parisuddhena vacīsamācārena samannāgato acchiddena appaṭimaṃsena , tassa bhavanti vattāro –

‘ iṅgha tāva āyasmā vācasikaṃ sikkhassū ’ ti , itissa bhavanti vattāro .

‘‘ PunaP5.80 caparaṃ , bhikkhave , codakena bhikkhunā paraṃ codetukāmena evaṃ paccavekkhitabbaṃ –

‘ mettaṃ nu kho me cittaṃ paccupaṭṭhitaṃ sabrahmacārīsu anāghātaṃ .

Saṃvijjati nu kho me eso dhammo udāhu no ’ ti ?

No ce , bhikkhave , bhikkhunoM3.319 mettaṃ cittaṃ paccupaṭṭhitaṃ hoti sabrahmacārīsu anāghātaṃ , tassa bhavanti vattāro –

‘ iṅgha tāva āyasmā sabrahmacārīsu mettaṃ cittaṃ upaṭṭhāpehī ’ ti , itissa bhavanti vattāro .

‘‘ Puna caparaṃ , bhikkhave , codakena bhikkhunāT5.84 paraṃ codetukāmena evaṃ paccavekkhitabbaṃ –

‘ bahussuto nu khomhi sutadharo sutasannicayo , ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti , tathārūpā me dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā .

Saṃvijjati nu kho me eso dhammo udāhu no ’ ti ?

No ce , bhikkhave , bhikkhu bahussuto hoti sutadharo sutasannicayo , ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti , tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā , tassa bhavanti vattāro –

‘ iṅgha tāva āyasmā āgamaṃ pariyāpuṇassū ’ ti , itissa bhavanti vattāro .

‘‘ Puna caparaṃ , bhikkhave , codakena bhikkhunā paraṃ codetukāmena evaṃ paccavekkhitabbaṃ –

‘ ubhayāni kho pana me pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso .

Saṃvijjati nu kho me eso dhammo udāhu no ’ ti ?

No ce , bhikkhave , bhikkhuno ubhayāni pātimokkhāni vitthārenaP5.81 svāgatāni honti suvibhattāni suppavattīni suvinicchitāni suttaso anubyañjanaso ,‘ idaṃ panāyasmā , kattha vuttaṃ bhagavatā ’ ti , iti puṭṭho na sampāyissati .

Tassa bhavanti vattāro –

‘ iṅgha tāva āyasmāV3.67 vinayaṃ sikkhassū ’ ti , itissa bhavanti vattāro .

Ime pañca dhammā ajjhattaṃ paccavekkhitabbā .

‘‘ Katame pañcaT5.85 dhammā ajjhattaṃ upaṭṭhāpetabbā ?

‘ Kālena vakkhāmi , no akālena ;

bhūtena vakkhāmi , no abhūtena ;

saṇhena vakkhāmi , no pharusena ;

atthasaṃhitena vakkhāmi , no anatthasaṃhitena ;

mettacitto vakkhāmi , no dosantaro ’ ti – ime pañca dhammā ajjhattaṃ upaṭṭhāpetabbā .

Codakena , bhikkhave , bhikkhunā paraṃ codetukāmena ime pañca dhamme ajjhattaṃ paccavekkhitvā ime pañca dhamme ajjhattaṃ upaṭṭhāpetvā paro codetabbo ’’ ti .

Catutthaṃ .

5. Rājantepurappavesanasuttaṃ

45.[ pāci .497]‘‘ DasayimeM3.320 , bhikkhave , ādīnavā rājantepurappavesane .

Katame dasa ?

Idha , bhikkhave , rājā mahesiyā saddhiṃ nisinno hoti .

Tatra bhikkhu pavisati .

Mahesī vā bhikkhuṃ disvā sitaṃ pātukaroti , bhikkhu vā mahesiṃ disvā sitaṃ pātukaroti .

Tattha rañño evaṃ hoti –

‘ addhā imesaṃ kataṃ vā karissanti vā ’ ti !

Ayaṃ , bhikkhave , paṭhamo ādīnavo rājantepurappavesane .

‘‘ Puna caparaṃ , bhikkhave , rājā bahukicco bahukaraṇīyo aññataraṃ itthiṃ gantvā na sarati –

‘ sā tena gabbhaṃ gaṇhāti ’.

Tattha rañño evaṃ hoti –

‘ na kho idha aññoP5.82 koci pavisati , aññatra pabbajitena .