5. Tatiyaupanisasuttaṃ

Author： _System_Pali_VRI_ @ Administrator

No version selected — showing the Pali original by default.

5.[ a . ni .11.5] TatraT5.7P5.6 kho āyasmā ānando bhikkhū āmantesi –

‘‘ dussīlassa , āvuso , sīlavipannassa hatūpaniso hoti avippaṭisāro ;

avippaṭisāre asati avippaṭisāravipannassa hatūpanisaṃ hoti pāmojjaṃ ;

pāmojje asati pāmojjavipannassa hatūpanisā hoti pīti ;

pītiyā asati pītivipannassa hatūpanisā hoti passaddhi ;

passaddhiyā asati passaddhivipannassa hatūpanisaṃ hoti sukhaṃ ;

sukhe asati sukhavipannassa hatūpaniso hoti sammāsamādhi ;

sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ ;

yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo ;

nibbidāvirāge asati nibbidāvirāgavipannassa hatūpanisaṃ hoti vimuttiñāṇadassanaṃ .

Seyyathāpi , āvuso , rukkho sākhāpalāsavipanno .

Tassa papaṭikāpi na pāripūriṃ gacchati , tacopi … pheggupi … sāropi na pāripūriṃ gacchati .

Evamevaṃ kho , āvuso , dussīlassa sīlavipannassa hatūpaniso hoti avippaṭisāro ;

avippaṭisāre asati avippaṭisāravipannassa hatūpanisaṃ hoti … pe … vimuttiñāṇadassanaṃ .

‘‘ Sīlavato , āvuso , sīlasampannassa upanisasampanno hoti avippaṭisāro ;

avippaṭisāre sati avippaṭisārasampannassa upanisasampannaṃ hoti pāmojjaṃ ;

pāmojje sati pāmojjasampannassa upanisasampannā hoti pīti ;

pītiyā sati pītisampannassa upanisasampannā hoti passaddhi ;

passaddhiyā sati passaddhisampannassa upanisasampannaṃ hoti sukhaṃ ;

sukhe sati sukhasampannassa upanisasampanno hoti sammāsamādhiT5.8 ;

sammāsamādhimhi sati sammāsamādhisampannassa upanisasampannaṃ hoti yathābhūtañāṇadassanaṃV3.6 ;

yathābhūtañāṇadassaneM3.262 sati yathābhūtañāṇadassanasampannassa upanisasampanno hoti nibbidāvirāgo ;

nibbidāvirāge sati nibbidāvirāgasampannassa upanisasampannaṃ hoti vimuttiñāṇadassanaṃ .

Seyyathāpi , āvuso , rukkho sākhāpalāsasampannoP5.7 .

Tassa papaṭikāpi pāripūriṃ gacchati , tacopi … pheggupi … sāropi pāripūriṃ gacchati .

Evamevaṃ kho , āvuso , sīlavato sīlasampannassa upanisasampanno hoti avippaṭisāro ;

avippaṭisāre sati avippaṭisārasampannassa upanisasampannaṃ hoti … pe … vimuttiñāṇadassanan ’’ ti .

Pañcamaṃ .