5. Uttiyasuttaṃ

Author： _System_Pali_VRI_ @ Administrator

No version selected — showing the Pali original by default.

5. Uttiyasuttaṃ

95. AthaP5.193 kho uttiyo paribbājako yena bhagavā tenupasaṅkami ;

upasaṅkamitvā bhagavatā saddhiṃ sammodi .

Sammodanīyaṃ kathaṃ sāraṇīyaṃ vītisāretvā ekamantaṃ nisīdi .

Ekamantaṃ nisinno kho uttiyo paribbājako bhagavantaṃ etadavoca –

‘‘ kiṃ nu kho , bho gotama , sassato loko , idamevaT5.207 saccaṃ moghamaññan ’’ ti ?

‘‘ Abyākataṃ kho etaṃ , uttiya , mayā –

‘ sassato loko , idameva saccaṃ moghamaññan ’’’ ti .

‘‘ Kiṃ pana , bho gotama , asassato loko , idameva saccaṃ moghamaññan ’’ ti ?

‘‘ Etampi kho , uttiya , abyākataṃ mayā –

‘ asassato loko , idameva saccaṃ moghamaññan ’’’ ti .

‘‘ Kiṃ nu kho , bho gotama , antavā loko … pe … anantavā loko … taṃ jīvaṃ taṃ sarīraṃ … aññaṃ jīvaṃ aññaṃ sarīraṃ … hoti tathāgato paraṃ maraṇāM3.413 … na hoti tathāgato paraṃ maraṇā … hoti ca na ca hoti tathāgato paraṃ maraṇā … neva hoti na na hoti tathāgato paraṃ maraṇā , idameva saccaṃ moghamaññan ’’ ti ?

‘‘ Etampi kho , uttiya , abyākataṃ mayā –

‘ neva hoti na na hoti tathāgato paraṃ maraṇā , idameva saccaṃ moghamaññan ’’’ ti .

‘‘‘ Kiṃ nu kho , bho gotama , sassato loko , idameva saccaṃ moghamaññan ’ ti , iti puṭṭho samāno ‘ abyākataṃ kho etaṃ , uttiya , mayā – sassato loko , idameva saccaṃ moghamaññan ’ ti vadesi .

‘‘‘ Kiṃ pana , bho gotama , asassato loko , idameva saccaṃ moghamaññan ’ ti , iti puṭṭho samāno –

‘ etampi kho , uttiya , abyākataṃ mayā asassato loko , idameva saccaṃ moghamaññan ’ ti vadesi .

‘‘‘ KiṃV3.165 nu kho , bho gotama , antavā loko … pe … anantavā loko … taṃ jīvaṃ taṃ sarīraṃ … aññaṃ jīvaṃ aññaṃ sarīraṃ … hoti tathāgato paraṃ maraṇā … na hoti tathāgato paraṃ maraṇā … hoti ca na ca hoti tathāgato paraṃ maraṇā … neva hoti na na hoti tathāgato paraṃ maraṇā , idamevaT5.208 saccaṃ moghamaññanti , iti puṭṭho samānoP5.194 –

‘ etampi kho , uttiya , abyākataṃ mayā –

‘ neva hoti na na hoti tathāgato paraṃ maraṇā , idameva saccaṃ moghamaññan ’ ti vadesi .

Atha kiñcarahi bhotā gotamena byākatan ’’ ti ?

‘‘ Abhiññāya kho ahaṃ , uttiya , sāvakānaṃ dhammaṃ desemi sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāyā ’’ ti .

‘‘ Yaṃ panetaṃ bhavaṃ gotamo abhiññāya sāvakānaṃ dhammaṃ desesi sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya , sabbo vā [ sabbo ca ( ka .)] tena loko nīyati [ nīyissati ( sī .), niyyāssati ( syā .), niyyaṃssati ( pī .)] upaḍḍho vā tibhāgo vā ’’ ti [ tibhāgo vāti padehi ( ka .)]?

Evaṃ vutte bhagavā tuṇhī ahosi .

AthaM3.414 kho āyasmato ānandassa etadahosi –

‘‘ mā hevaṃ kho uttiyo paribbājako pāpakaṃ diṭṭhigataṃ paṭilabhi –

‘ sabbasāmukkaṃsikaṃ vata me samaṇo gotamo pañhaṃ puṭṭho saṃsādeti , no vissajjeti , na nūna visahatī ’ ti .

Tadassa uttiyassa paribbājakassa dīgharattaṃ ahitāya dukkhāyā ’’ ti .

Atha kho āyasmā ānando uttiyaṃ paribbājakaṃ etadavoca –

‘‘ tenahāvuso uttiya , upamaṃ te karissāmi .

Upamāya midhekacce viññū purisā bhāsitassa atthaṃ ājānanti .

Seyyathāpi , āvuso uttiya , rañño paccantimaṃ nagaraṃ daḷhuddhāpaṃ [ daḷhuddāpaṃ ( sī . pī .)] daḷhapākāratoraṇaṃ ekadvāraṃ .

Tatrassa dovāriko paṇḍito byatto medhāvī aññātānaṃ nivāretā ñātānaṃP5.195 pavesetā .

So tassa nagarassa samantā anupariyāyapathaṃ anukkamati .

Anupariyāyapathaṃ anukkamamāno na passeyya pākārasandhiṃ vā pākāravivaraṃT5.209 vā , antamaso biḷāranikkhamanamattampi .

No ca khvassa evaṃ ñāṇaṃ hoti –

‘ ettakā pāṇā imaṃ nagaraṃ pavisanti vā nikkhamanti vā ’ ti .

AthaV3.166 khvassa evamettha hoti –

‘ ye kho keci oḷārikā pāṇā imaṃ nagaraṃ pavisanti vā nikkhamanti vā , sabbe te iminā dvārena pavisanti vā nikkhamanti vā ’ ti .

‘‘ Evamevaṃ kho , āvuso uttiya , na tathāgatassa evaṃ ussukkaṃ hoti –

‘ sabbo vā tena loko nīyati , upaḍḍho vā , tibhāgo vā ’ ti .

Atha kho evamettha tathāgatassa hoti –

‘ ye kho keci lokamhā nīyiṃsu vā nīyanti vā nīyissanti vā , sabbe te pañca nīvaraṇe pahāya cetaso upakkilese paññāya dubbalīkaraṇe , catūsu satipaṭṭhānesu suppatiṭṭhitacittā , satta bojjhaṅge yathābhūtaṃ bhāvetvā .

Evamete [ evametena ( ka .)] lokamhā nīyiṃsu vā nīyanti vā nīyissanti vā ’ ti .

Yadeva kho tvaṃ [ yadeva khvettha ( ka .)], āvuso uttiya , bhagavantaṃ pañhaṃ [ imaṃ pañhaṃ ( syā . ka .)] apucchi tadevetaṃ pañhaṃ bhagavantaṃ aññena pariyāyena apucchi .

Tasmā te taṃ bhagavā na byākāsī ’’ ti .

Pañcamaṃ .

Issues

Select Version

Dasakanipātapāḷi

Dasakanipātapāḷi