Dutiyacittaṃ
146. Idāni dutiyacittādīni dassetuṃ puna ‘‘ katame dhammā ’’ tiādi āraddhaṃ .
Tesu sabbesupi paṭhamacitte vuttanayeneva
P0.156 tayo tayo mahāvārā veditabbā .Na kevalañca mahāvārā eva , paṭhamacitte vuttasadisānaṃ sabbapadānaṃ atthopi vuttanayeneva veditabbo .
Ito parampi apubbapadavaṇṇanaṃyeva karissāma .
Imasmiṃ tāva dutiyacittaniddese sasaṅkhārenāti idameva apubbaṃ .
Tassattho – saha saṅkhārenāti sasaṅkhāro .
Tena sasaṅkhārena
M0.200 sappayogena saupāyena paccayagaṇenāti attho .Yena hi ārammaṇādinā paccayagaṇena paṭhamaṃ mahācittaṃ uppajjati , teneva sappayogena saupāyena idaṃ uppajjati .
Tassevaṃ
V0.200 uppatti veditabbā – idhekacco bhikkhu vihārapaccante vasamāno cetiyaṅgaṇasammajjanavelāya vā therupaṭṭhānavelāya vā sampattāya , dhammasavanadivase vā sampatte ‘ mayhaṃ gantvā paccāgacchato atidūraṃ bhavissati , na gamissāmī ’ ti cintetvā puna cinteti –‘ bhikkhussa nāma cetiyaṅgaṇaṃ vā therupaṭṭhānaṃ vā dhammasavanaṃ vā agantuṃ asāruppaṃ , gamissāmī ’ ti gacchati .
Tassevaṃ attano payogena vā , parena vā vattādīnaṃ akaraṇe ca ādīnavaṃ karaṇe ca ānisaṃsaṃ dassetvā ovadiyamānassa , niggahavaseneva vā ‘ ehi , idaṃ karohī ’ ti kāriyamānassa uppannaṃ kusalacittaṃ sasaṅkhārena paccayagaṇena uppannaṃ nāma hotīti .
Dutiyacittaṃ .