10. Saṅkhārupapattisuttaṃ

160. EvaṃT3.217V3.142 me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme .

Tatra kho bhagavā bhikkhū āmantesi –

‘‘ bhikkhavo ’’ ti .

‘‘ Bhadante ’’ ti te bhikkhū bhagavato paccassosuṃ .

Bhagavā etadavoca –

‘‘ saṅkhārupapattiṃ [ saṅkhārūpapattiṃ ( syā . kaṃ .), saṅkhāruppattiṃ ( sī . pī .)] vo , bhikkhave , desessāmi , taṃ suṇātha , sādhukaṃ manasi karotha ;

bhāsissāmī ’’ ti .

‘‘ Evaṃ , bhante ’’ ti kho te bhikkhū bhagavato paccassosuṃ .

Bhagavā etadavoca –

161.‘‘ Idha , bhikkhave , bhikkhu saddhāya samannāgato hoti , sīlena samannāgato hoti , sutena samannāgato hoti , cāgena samannāgato hoti , paññāya samannāgato hoti .

Tassa evaṃ hoti –

‘ aho vatāhaṃ kāyassa bhedā paraṃ maraṇā khattiyamahāsālānaṃ [ khattiyamahāsālānaṃ vā ( syā . kaṃ . pī .)] sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāvetiP3.100 .

Tassa te saṅkhārā ca vihārā [ vihāro ( sī . pī .)] ca evaṃ bhāvitā evaṃ bahulīkatāM3.141 tatrupapattiyā [ tatrūpapattiyā ( syā . kaṃ .), tatruppattiyā ( sī . pī .)] saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

162.‘‘ Puna caparaṃ , bhikkhave , bhikkhu saddhāya samannāgato hoti , sīlena samannāgato hoti , sutena samannāgato hoti , cāgena samannāgato hoti , paññāya samannāgato hoti .

Tassa evaṃ hoti –

‘ aho vatāhaṃ kāyassa bhedā paraṃ maraṇā brāhmaṇamahāsālānaṃ … pe … gahapatimahāsālānaṃT3.218 [ brāhmaṇamahāsālānaṃ vā gahapatimahāsālānaṃ vā ( syā . kaṃ . pī .)] sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

163.‘‘ Puna caparaṃ , bhikkhave , bhikkhu saddhāya samannāgato hoti , sīlena samannāgato hoti , sutena samannāgato hoti , cāgena samannāgato hoti , paññāya samannāgato hoti .

Tassa sutaṃ hoti –

‘ cātumahārājikā [ cātummahārājikā ( sī . syā . kaṃ . pī .)] devā dīghāyukā vaṇṇavanto sukhabahulā ’ ti .

Tassa evaṃ hoti –

‘ aho vatāhaṃ kāyassa bhedā paraṃ maraṇā cātumahārājikānaṃ devānaṃ sahabyataṃ upapajjeyyan ’ tiV3.143 .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

164.‘‘ Puna caparaṃ , bhikkhave , bhikkhu saddhāya samannāgato hoti , sīlena samannāgato hoti , sutena samannāgato hoti , cāgena samannāgato hoti , paññāya samannāgato hoti .

Tassa sutaṃ hoti – tāvatiṃsā devā … pe … yāmā devā … tusitā devā … nimmānaratī devā … paranimmitavasavattī devā dīghāyukā vaṇṇavanto sukhabahulāti .

Tassa evaṃ hoti –

‘ aho vatāhaṃ kāyassa bhedā paraṃ maraṇā paranimmitavasavattīnaṃ devānaṃ sahabyataṃ upapajjeyyan ’ tiT3.219 .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃM3.142 bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

165.‘‘ Puna caparaṃ , bhikkhave , bhikkhu saddhāya samannāgatoP3.101 hoti , sīlena samannāgato hoti , sutena samannāgato hoti , cāgena samannāgato hoti , paññāya samannāgato hoti .

Tassa sutaṃ hoti –

‘ sahasso brahmā dīghāyuko vaṇṇavā sukhabahulo ’ ti .

Sahasso , bhikkhave , brahmā sahassilokadhātuṃ [ sahassiṃ lokadhātuṃ ( sī .)] pharitvā adhimuccitvā [ adhimuñcitvā ( ka .)] viharati .

Yepi tattha sattā upapannā tepi pharitvā adhimuccitvā viharati .

Seyyathāpi , bhikkhave , cakkhumā puriso ekaṃ āmaṇḍaṃ hatthe karitvā paccavekkheyya ;

evameva kho , bhikkhave , sahasso brahmā sahassilokadhātuṃ pharitvā adhimuccitvā viharati .

Yepi tattha sattā upapannā tepi pharitvā adhimuccitvā viharati .

Tassa evaṃ hoti –

‘ aho vatāhaṃ kāyassa bhedā paraṃ maraṇā sahassassa brahmuno sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

166.‘‘ PunaT3.220 caparaṃ , bhikkhave , bhikkhu saddhāya samannāgato hoti , sīlena samannāgato hoti , sutena … cāgena … paññāya samannāgato hoti .

Tassa sutaṃ hoti – dvisahasso brahmā … pe … tisahasso brahmā … catusahasso brahmā … pañcasahasso brahmā dīghāyuko vaṇṇavāV3.144 sukhabahuloti .

Pañcasahasso , bhikkhave , brahmā pañcasahassilokadhātuṃ pharitvā adhimuccitvā viharati .

Yepi tattha sattā upapannā tepi pharitvā adhimuccitvā viharati .

Seyyathāpi , bhikkhave , cakkhumā puriso pañca āmaṇḍāni hatthe karitvā paccavekkheyya ;

evameva kho , bhikkhave , pañcasahasso brahmā pañcasahassilokadhātuṃ pharitvā adhimuccitvā viharati .

Yepi tattha sattā upapannā tepi pharitvā adhimuccitvā viharati .

Tassa evaṃ hoti –

‘ aho vatāhaṃ kāyassa bhedā paraṃ maraṇā pañcasahassassa brahmuno sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

TassaM3.143 te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

167.‘‘ Puna caparaṃ , bhikkhave , bhikkhu saddhāya samannāgato hoti , sīlena samannāgato hoti , sutena … cāgena … paññāya samannāgato hoti .

Tassa sutaṃ hoti –

‘ dasasahassoT3.221 brahmā dīghāyuko vaṇṇavā sukhabahulo ’ ti .

Dasasahasso , bhikkhave , brahmā dasasahassilokadhātuṃ pharitvā adhimuccitvāP3.102 viharati .

Yepi tattha sattā upapannā tepi pharitvā adhimuccitvā viharati .

Seyyathāpi , bhikkhave , maṇi veḷuriyo subho jātimā aṭṭhaṃso suparikammakato paṇḍukambale nikkhitto bhāsate ca tapate ca [ bhāsati ca tapati ca ( sī . syā . kaṃ . pī .)] virocati ca ;

evameva kho , bhikkhave , dasasahasso brahmā dasasahassilokadhātuṃ pharitvā adhimuccitvā viharati .

Yepi tattha sattā upapannā tepi pharitvā adhimuccitvā viharati .

Tassa evaṃ hoti –

‘ aho vatāhaṃ kāyassa bhedā paraṃ maraṇā dasasahassassa brahmuno sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

168.‘‘ Puna caparaṃ , bhikkhave , bhikkhu saddhāya samannāgato hoti , sīlena … sutena … cāgena … paññāya samannāgato hoti .

Tassa sutaṃ hoti –

‘ satasahasso brahmā dīghāyuko vaṇṇavā sukhabahulo ’ ti .

Satasahasso , bhikkhave , brahmā satasahassilokadhātuṃ pharitvā adhimuccitvā viharati .

Yepi tattha sattā upapannā tepi pharitvā adhimuccitvā viharati .

Seyyathāpi , bhikkhave , nikkhaṃ jambonadaṃ [ nekkhaṃ ( sī . syā . kaṃ . pī .)] dakkhakammāraputtaukkāmukhasukusalasampahaṭṭhaṃT3.222 paṇḍukambaleV3.145 nikkhittaṃ bhāsate ca tapate ca virocati ca ;

evameva kho , bhikkhave , satasahasso brahmā satasahassilokadhātuṃ pharitvā adhimuccitvā viharati .

Yepi tattha sattā upapannā tepi pharitvā adhimuccitvā viharati .

Tassa evaṃ hoti –

‘ aho vatāhaṃ kāyassa bhedā paraṃ maraṇā satasahassassa brahmuno sahabyataṃ upapajjeyyan ’ tiM3.144 .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

169.‘‘ Puna caparaṃ , bhikkhave , bhikkhu saddhāya samannāgato hoti , sīlena … sutena … cāgena … paññāya samannāgato hoti .

Tassa sutaṃ hoti – ābhā devā … pe … parittābhā devā … appamāṇābhā devā … ābhassarā devā dīghāyukā vaṇṇavanto sukhabahulāti .

Tassa evaṃ hoti –

‘ aho vatāhaṃ kāyassa bhedā paraṃ maraṇā ābhassarānaṃ devānaṃ sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

170.‘‘ Puna caparaṃ , bhikkhave , bhikkhu saddhāya samannāgato hoti , sīlenaT3.223 … sutena … cāgena … paññāya samannāgato hoti .

Tassa sutaṃ hoti – parittasubhā devā … pe … appamāṇasubhā devā … subhakiṇhā devā dīghāyukā vaṇṇavanto sukhabahulāti .

Tassa evaṃ hoti –

‘ aho vatāhaṃ kāyassa bhedā paraṃ maraṇā subhakiṇhānaṃ devānaṃ sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

171.‘‘ Puna caparaṃ , bhikkhave , bhikkhu saddhāya samannāgato hoti , sīlena … sutena … cāgena … paññāya samannāgato hoti .

TassaP3.103 sutaṃ hoti – vehapphalā devā … pe … avihā devā … atappā devā … sudassā devā … sudassī devā … akaniṭṭhā devā dīghāyukā vaṇṇavanto sukhabahulāti .

Tassa evaṃ hoti –

‘ aho vatāhaṃ kāyassa bhedā paraṃ maraṇāV3.146 akaniṭṭhānaṃ devānaṃ sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārāM3.145 ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

172.‘‘ Puna caparaṃ , bhikkhave , bhikkhu saddhāya samannāgato hoti , sīlena … sutena … cāgena … paññāya samannāgato hoti .

Tassa sutaṃ hoti –

‘ ākāsānañcāyatanūpagā devā dīghāyukā ciraṭṭhitikā sukhabahulā ’ tiT3.224 .

Tassa evaṃ hoti –

‘ aho vatāhaṃ kāyassa bhedā paraṃ maraṇā ākāsānañcāyatanūpagānaṃ devānaṃ sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

173.‘‘ Puna caparaṃ , bhikkhave , bhikkhu saddhāya samannāgato hoti , sīlena … sutena … cāgena … paññāya samannāgato hoti .

Tassa sutaṃ hoti –

‘ viññāṇañcāyatanūpagā devā dīghāyukā ciraṭṭhitikā sukhabahulā ’ ti .

Tassa evaṃ hoti –

‘ aho vatāhaṃ kāyassa bhedā paraṃ maraṇā viññāṇañcāyatanūpagānaṃ devānaṃ sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

174.‘‘ Puna caparaṃ , bhikkhave , bhikkhu saddhāya samannāgato hoti , sīlena … sutena … cāgena … paññāya samannāgato hoti .

Tassa sutaṃ hoti – ākiñcaññāyatanūpagā devā … pe … nevasaññānāsaññāyatanūpagā devā dīghāyukā ciraṭṭhitikā sukhabahulāti .

Tassa evaṃ hoti –

‘ aho vatāhaṃ kāyassa bhedā paraṃ maraṇā nevasaññānāsaññāyatanūpagānaṃ devānaṃ sahabyataṃ upapajjeyyan ’ ti .

So taṃ cittaṃ dahati , taṃ cittaṃ adhiṭṭhāti , taṃ cittaṃ bhāveti .

Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti .

Ayaṃ , bhikkhave , maggo ayaṃ paṭipadā tatrupapattiyā saṃvattati .

175.‘‘ PunaT3.225 caparaṃ , bhikkhave , bhikkhu saddhāya samannāgato hoti , sīlena … sutena … cāgena …V3.147 paññāya samannāgato hoti .

Tassa evaṃ hotiM3.146 –

‘ aho vatāhaṃ āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja vihareyyan ’ ti .

So āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati .

Ayaṃ , bhikkhave , bhikkhu na katthaci upapajjatī ’’ ti [ na katthaci upapajjati , na kuhiñci upapajjatīti ( sī . pī .), na katthaci upapajjati , na kuhiñci upasampajja viharatīti .( ka .)].

Idamavoca bhagavā .

Attamanā te bhikkhū bhagavato bhāsitaṃ abhinandunti .

Saṅkhārupapattisuttaṃ niṭṭhitaṃ dasamaṃ .

Anupadavaggo niṭṭhito dutiyo .

Tassuddānaṃ –

Anupāda-sodhana-porisadhammo , sevitabba-bahudhātu-vibhatti ;

Buddhassa kittināma-cattārīsena , ānāpāno kāyagato upapatti [ ito paraṃ syā . kaṃ . ka . potthakesu evampi dissati –-§ candake vimale parisuddhe , puṇṇasammodinirodhaattano ;§ dandhā bahujanasevitaṃ dhammavaraṃ , yaṃ anupadaṃ vaggavaraṃ dutiyāti ].

Issues

Select Version

Uparipaṇṇāsapāḷi

Uparipaṇṇāsapāḷi