Jūjakapabbaṃ

1914.

‘‘ Ahu vāsī kaliṅgesu , jūjako nāma brāhmaṇo ;

Tassāsi daharā bhariyā , nāmenāmittatāpanā .

1915.

‘‘ Tā naṃ tattha gatāvocuṃ , nadiṃ udakahāriyā ;

ThiyoT2.395 naṃ paribhāsiṃsu , samāgantvā kutūhalā .

1916.

‘‘ AmittāV2.243 nūna te mātā , amitto nūna te pitā ;

Ye taṃ jiṇṇassa pādaṃsu , evaṃ dahariyaṃ satiṃ .

1917.

‘‘ AhitaṃM2.334 vata te ñātī , mantayiṃsu rahogatā ;

Ye taṃ jiṇṇassa pādaṃsu , evaṃ dahariyaṃ satiṃ .

1918.

‘‘ Amittā vata te ñātī , mantayiṃsu rahogatā ;

Ye taṃ jiṇṇassa pādaṃsu , evaṃ dahariyaṃ satiṃ .

1919.

‘‘ Dukkaṭaṃ vata te ñātī , mantayiṃsu rahogatā ;

Ye taṃ jiṇṇassa pādaṃsu , evaṃ dahariyaṃ satiṃ .

1920.

‘‘ Pāpakaṃ vata te ñātī , mantayiṃsu rahogatā ;

Ye taṃ jiṇṇassa pādaṃsu , evaṃ dahariyaṃ satiṃ .

1921.

‘‘ Amanāpaṃ vata te ñātī , mantayiṃsu rahogatā ;

Ye taṃ jiṇṇassa pādaṃsu , evaṃ dahariyaṃ satiṃ .

1922.

‘‘ Amanāpavāsaṃ vasi , jiṇṇena patinā saha [ evaṃ dahariyā satī ( sī . pī .)];

Yā tvaṃ vasasi jiṇṇassa , mataṃ te jīvitā varaṃ .

1923.

‘‘ Na hi nūna tuyhaṃ kalyāṇi , pitā mātā ca sobhane ;

Aññaṃ bhattāraṃ vindiṃsu , ye taṃ jiṇṇassa pādaṃsu ;

Evaṃ dahariyaṃ satiṃ .

1924.

‘‘ Duyiṭṭhaṃ te navamiyaṃ , akataṃ aggihuttakaṃ ;

Ye taṃ jiṇṇassa pādaṃsu , evaṃ dahariyaṃ satiṃ .

1925.

‘‘ Samaṇe brāhmaṇe nūna , brāhmaṇacariyaparāyaṇe ;

SāT2.396 tvaṃ loke abhisapi , sīlavante bahussute ;

Yā tvaṃ vasasi jiṇṇassa , evaṃ dahariyā satī .

1926.

‘‘ Na dukkhaṃ ahinā daṭṭhaṃ , na dukkhaṃ sattiyā hataṃ ;

Tañca dukkhañca tibbañca , yaṃ passe jiṇṇakaṃ patiṃ .

1927.

‘‘ Natthi khiḍḍā natthi rati , jiṇṇena patinā saha ;

Natthi allāpasallāpo , jagghitumpi [ jagghitampi ( sī . pī .)] na sobhati .

1928.

‘‘ Yadā ca daharo daharā , mantayanti [ mantayiṃsu ( syā . ka .)] rahogatā ;

Sabbesaṃ sokā nassanti , ye keci hadayassitā .

1929.

‘‘ DaharāM2.335 tvaṃ rūpavatī , purisānaṃbhipatthitā ;

Gaccha ñātikule accha , kiṃ jiṇṇo ramayissati ’’.

1930.

‘‘ NaV2.244 te brāhmaṇa gacchāmi , nadiṃ udakahāriyā ;

Thiyo maṃ paribhāsanti , tayā jiṇṇena brāhmaṇa ’’.

1931.

‘‘ Mā me tvaṃ akarā kammaṃ , mā me udakamāhari ;

Ahaṃ udakamāhissaṃ , mā bhoti kupitā ahu ’’.

1932.

‘‘ Nāhaṃ tamhi kule jātā , yaṃ tvaṃ udakamāhare ;

Evaṃ brāhmaṇa jānāhi , na te vacchāmahaṃ ghare .

1933.

‘‘ Sace me dāsaṃ dāsiṃ vā , nānayissasi brāhmaṇa ;

Evaṃ brāhmaṇa jānāhi , na te vacchāmi santike ’’.

1934.

‘‘ Natthi me sippaṭhānaṃ vā , dhanaṃ dhaññañca brāhmaṇi ;

KutohaṃT2.397 dāsaṃ dāsiṃ vā , ānayissāmi bhotiyā ;

Ahaṃ bhotiṃ upaṭṭhissaṃ , mā bhoti kupitā ahu ’’.

1935.

‘‘ Ehi te ahamakkhissaṃ , yathā me vacanaṃ sutaṃ ;

Esa vessantaro rājā , vaṅke vasati pabbate .

1936.

‘‘ Taṃ tvaṃ gantvāna yācassu , dāsaṃ dāsiñca brāhmaṇa ;

So te dassati yācito , dāsaṃ dāsiñca khattiyo ’’.

1937.

‘‘ Jiṇṇohamasmi dubbalo [ abalo ( sī . pī . ka .)], dīgho caddhā suduggamo ;

Mā bhoti paṭidevesi , mā ca tvaṃ [ mā bhoti ( syā . ka .)] vimanā ahu ;

Ahaṃ bhotiṃ upaṭṭhissaṃ , mā bhoti kupitā ahu ’’.

1938.

‘‘ Yathā agantvā saṅgāmaṃ , ayuddhova parājito ;

Evameva tuvaṃ brahme , agantvāva parājito .

1939.

‘‘ Sace me dāsaṃ dāsiṃ vā , nānayissasi brāhmaṇa ;

Evaṃ brāhmaṇa jānāhi , na te vacchāmahaṃ ghare ;

Amanāpaṃ te karissāmi , taṃ te dukkhaṃ bhavissati .

1940.

‘‘ Nakkhatte utupubbesu , yadā maṃ dakkhisilaṅkataṃ ;

Aññehi saddhiṃ ramamānaṃ , taṃ te dukkhaṃ bhavissati .

1941.

‘‘ AdassanenaM2.336 mayhaṃ te , jiṇṇassa paridevato ;

Bhiyyo vaṅkā ca palitā , bahū hessanti brāhmaṇa ’’.

1942.

‘‘ Tato so brāhmaṇo bhīto , brāhmaṇiyā vasānugo ;

Aṭṭito kāmarāgena , brāhmaṇiṃ etadabravi ’’.

1943.

‘‘ PātheyyaṃT2.398V2.245 me karohi tvaṃ , saṃkulyā saguḷāni ca [ saṅkulā saṅguḷāni ca ( syā .), aṅguḷā sakalāni ca ( ka .)];

Madhupiṇḍikā ca sukatāyo , sattubhattañca brāhmaṇi .

1944.

‘‘ Ānayissaṃ methunake , ubho dāsakumārake ;

Te taṃ paricarissanti , rattindivamatanditā ’’.

1945.

‘‘ Idaṃ vatvā brahmabandhu , paṭimuñci upāhanā ;

Tato so mantayitvāna , bhariyaṃ katvā padakkhiṇaṃ .

1946.

‘‘ Pakkāmi so ruṇṇamukho , brāhmaṇo sahitabbato ;

Sivīnaṃ nagaraṃ phītaṃ , dāsapariyesanaṃ caraṃ ’’.

1947.

‘‘ So tattha gantvā avaca [ avacāsi ( syā . ka .)], ye tatthāsuṃ samāgatā ;

Kuhiṃ vessantaro rājā , kattha passemu khattiyaṃ ’’.

1948.

‘‘ Te janā taṃ avaciṃsu , ye tatthāsuṃ samāgatā ;

Tumhehi brahme pakato , atidānena khattiyo ;

Pabbājito sakā raṭṭhā , vaṅke vasati pabbate .

1949.

‘‘ Tumhehi brahme pakato , atidānena khattiyo ;

Ādāya puttadārañca , vaṅke vasati pabbate ’’.

1950.

‘‘ So codito brāhmaṇiyā , brāhmaṇo kāmagiddhimā ;

Aghaṃ taṃ paṭisevittha , vane vāḷamigākiṇṇe ;

Khaggadīpinisevite .

1951.

‘‘ Ādāya beḷuvaṃ daṇḍaṃ , aggihuttaṃ kamaṇḍaluṃ ;

So pāvisi brahāraññaṃ , yattha assosi kāmadaṃ .

1952.

‘‘ TaṃT2.399 paviṭṭhaṃ brahāraññaṃ , kokā naṃ parivārayuṃ ;

Vikkandi so vippanaṭṭho , dūre panthā apakkami .

1953.

‘‘ TatoM2.337 so brāhmaṇo gantvā , bhogaluddho asaññato ;

Vaṅkassorohaṇe naṭṭhe , imā gāthā abhāsatha ’’.

1954.

‘‘ Ko rājaputtaṃ nisabhaṃ , jayantamaparājitaṃ ;

Bhaye khemassa dātāraṃ , ko me vessantaraṃ vidū .

1955.

‘‘ Yo yācataṃ patiṭṭhāsi , bhūtānaṃ dharaṇīriva ;

Dharaṇūpamaṃ mahārājaṃ , ko me vessantaraṃ vidū .

1956.

‘‘ Yo yācataṃ gatī āsi , savantīnaṃva sāgaro ;

Sāgarūpamaṃ [ udadhūpamaṃ ( sī . syā . pī .), tathūpamaṃ ( ka .)] mahārājaṃ , ko me vessantaraṃ vidū .

1957.

‘‘ KalyāṇatitthaṃV2.246 sucimaṃ , sītūdakaṃ manoramaṃ ;

Puṇḍarīkehi sañchannaṃ , yuttaṃ kiñjakkhareṇunā ;

Rahadūpamaṃ [ sarūpamaṃ ( ka .)] mahārājaṃ , ko me vessantaraṃ vidū .

1958.

‘‘ Assatthaṃva pathe jātaṃ , sītacchāyaṃ manoramaṃ ;

Santānaṃ visametāraṃ , kilantānaṃ paṭiggahaṃ ;

Tathūpamaṃ mahārājaṃ , ko me vessantaraṃ vidū .

1959.

‘‘ Nigrodhaṃva pathe jātaṃ , sītacchāyaṃ manoramaṃ ;

Santānaṃ visametāraṃ , kilantānaṃ paṭiggahaṃ ;

Tathūpamaṃ mahārājaṃ , ko me vessantaraṃ vidū .

1960.

‘‘ Ambaṃ iva pathe jātaṃ , sītacchāyaṃ manoramaṃ ;

SantānaṃT2.400 visametāraṃ , kilantānaṃ paṭiggahaṃ ;

Tathūpamaṃ mahārājaṃ , ko me vessantaraṃ vidū .

1961.

‘‘ Sālaṃ iva pathe jātaṃ , sītacchāyaṃ manoramaṃ ;

Santānaṃ visametāraṃ , kilantānaṃ paṭiggahaṃ ;

Tathūpamaṃ mahārājaṃ , ko me vessantaraṃ vidū .

1962.

‘‘ Dumaṃ iva pathe jātaṃ , sītacchāyaṃ manoramaṃ ;

Santānaṃ visametāraṃ , kilantānaṃ paṭiggahaṃ ;

Tathūpamaṃ mahārājaṃ , ko me vessantaraṃ vidū .

1963.

‘‘ EvañcaM2.338 me vilapato , paviṭṭhassa brahāvane ;

Ahaṃ jānanti yo vajjā , nandiṃ so janaye mama .

1964.

‘‘ Evañca me vilapato , paviṭṭhassa brahāvane ;

Ahaṃ jānanti yo vajjā , tāya so ekavācāya ;

Pasave puññaṃ anappakaṃ ’’.

1965.

‘‘ Tassa ceto paṭissosi , araññe luddako caraṃ ;

Tumhehi brahme pakato , atidānena khattiyo ;

Pabbājito sakā raṭṭhā , vaṅke vasati pabbate .

1966.

‘‘ Tumhehi brahme pakato , atidānena khattiyo ;

ĀdāyaT2.401 puttadārañca , vaṅke vasati pabbate .

1967.

‘‘ Akiccakārī dummedho , raṭṭhā pavanamāgato ;

Rājaputtaṃ gavesanto , bako macchamivodake .

1968.

‘‘ TassaV2.247 tyāhaṃ na dassāmi , jīvitaṃ idha brāhmaṇa ;

Ayañhi te mayā nunno [ mayā ’ ruḷho ( ka .)], saro pissati lohitaṃ .

1969.

‘‘ Siro te vajjhayitvāna , hadayaṃ chetvā sabandhanaṃ ;

Panthasakuṇaṃ [ bandhasakuṇaṃ ( ka .)] yajissāmi , tuyhaṃ maṃsena brāhmaṇa .

1970.

‘‘ Tuyhaṃ maṃsena medena , matthakena ca brāhmaṇa ;

Āhutiṃ paggahessāmi , chetvāna hadayaṃ tava .

1971.

‘‘ Taṃ me suyiṭṭhaṃ suhutaṃ , tuyhaṃ maṃsena brāhmaṇa ;

Na ca tvaṃ rājaputtassa , bhariyaṃ putte ca nessasi ’’.

1972.

‘‘ Avajjho brāhmaṇo dūto , cetaputta suṇohi me ;

Tasmā hi dūtaṃ na hanti , esa dhammo sanantano .

1973.

‘‘ Nijjhattā sivayo sabbe , pitā naṃ daṭṭhumicchati ;

Mātā ca dubbalā tassa , acirā cakkhūni jīyare .

1974.

‘‘ Tesāhaṃ pahito dūto , cetaputta suṇohi me ;

Rājaputtaṃ nayissāmi , yadi jānāsi saṃsa me .

‘‘ Piyassa me piyo dūto , puṇṇapattaṃ dadāmi te ’’;

1975.

‘‘ ImañcaM2.339 madhuno tumbaṃ , migasatthiñca brāhmaṇa ;

TañcaT2.402 te desamakkhissaṃ , yattha sammati kāmado ’’.

Jūjakapabbaṃ nāma .

Issues

Jātakapāḷi

Jātakapāḷi