Gharāvāsapañhā

1449.

‘‘ Vidhura vasamānāssa , gahaṭṭhassa sakaṃ gharaṃ ;

Khemā vutti kathaṃ assa , kathannu assa saṅgaho .

1450.

‘‘ Abyābajjhaṃ [ abyāpajjhaṃ ( sī . syā . pī .)] kathaṃ assa , saccavādī ca māṇavo ;

AsmāT2.332 lokā paraṃ lokaṃ , kathaṃ pecca na socati ’’.

1451.

Taṃ tattha gatimā dhitimā , matimā atthadassimā ;

Saṅkhātā [ saṅkhāto ( ka .)] sabbadhammānaṃ , vidhuro etadabravi .

1452.

‘‘ Na sādhāraṇadārassa , na bhuñje sādumekako ;

Na seve lokāyatikaṃ , netaṃ paññāya vaḍḍhanaṃ .

1453.

‘‘ Sīlavā vattasampanno , appamatto vicakkhaṇo ;

Nivātavutti atthaddho , surato sakhilo mudu .

1454.

‘‘ SaṅgahetāM2.288 ca mittānaṃ , saṃvibhāgī vidhānavā ;

Tappeyya annapānena , sadā samaṇabrāhmaṇe .

1455.

‘‘ Dhammakāmo sutādhāro , bhaveyya paripucchako ;

Sakkaccaṃ payirupāseyya , sīlavante bahussute .

1456.

‘‘ Gharamāvasamānassa , gahaṭṭhassa sakaṃ gharaṃ ;

Khemā vutti siyā evaṃ , evaṃ nu assa saṅgaho .

1457.

‘‘ AbyābajjhaṃV2.208 siyā evaṃ , saccavādī ca māṇavo ;

Asmā lokā paraṃ lokaṃ , evaṃ pecca na socati ’’.

Gharāvāsapañhā nāma .

Lakkhaṇakaṇḍaṃ

1458.

‘‘ Ehi dāni gamissāma , dinno no issarena me ;

Mamevatthaṃ [ tamevatthaṃ ( pī .)] paṭipajja , esa dhammo sanantano ’’.

1459.

‘‘ Jānāmi māṇava tayāhamasmi , dinnohamasmi tava issarena ;

TīhañcaT2.333 taṃ vāsayemu agāre , yenaddhunā anusāsemu putte ’’.

1460.

‘‘ Taṃ me tathā hotu vasemu tīhaṃ , kurutaṃ bhavajja gharesu kiccaṃ ;

Anusāsataṃ puttadāre bhavajja , yathā tayī pecca [ pacchā ( sī . pī .)] sukhī bhaveyya ’’.

1461.

‘‘ Sādhūti vatvāna pahūtakāmo , pakkāmi yakkho vidhurena saddhiṃ ;

Taṃ kuñjarājaññahayānuciṇṇaṃ , pāvekkhi antepuramariyaseṭṭho ’’.

1462.

‘‘ Koñcaṃ mayūrañca piyañca ketaṃ , upāgami tattha surammarūpaṃ ;

Pahūtabhakkhaṃ bahuannapānaṃ , masakkasāraṃ viya vāsavassa ’’.

1463.

‘‘ TatthaM2.289 naccanti gāyanti , avhāyanti varāvaraṃ ;

Accharā viya devesu , nāriyo samalaṅkatā .

1464.

‘‘ Samaṅgikatvā pamadāhi yakkhaṃ , annena pānena ca dhammapālo ;

Atthattha [ aggattha ( syā . aṭṭha .)] mevānuvicintayanto , pāvekkhi bhariyāya tadā sakāse .

1465.

‘‘ TaṃT2.334 candanagandharasānulittaṃ , suvaṇṇajambonadanikkhasādisaṃ ;

Bhariyaṃvacā ehi suṇohi bhoti , puttāni āmantaya tambanette .

1466.

‘‘ Sutvāna vākyaṃ patino anujjā [ anojā ( syā . ka .)], suṇisaṃvaca tambanakhiṃ sunettaṃ ;

Āmantaya vammadharāni cete , puttāni indīvarapupphasāme ’’.

1467.

‘‘ Te āgate muddhani dhammapālo , cumbitvā putte avikampamāno ;

Āmantayitvāna avoca vākyaṃ , dinnāhaṃ raññā idha māṇavassa .

1468.

‘‘ Tassajjahaṃ attasukhī vidheyyo , ādāya yenicchati tena gacchati ;

Ahañca vo sāsitumāgatosmi [ anusāsituṃ āgatosmi ( syā . ka .)], kathaṃ ahaṃ aparittāya gacche .

1469.

‘‘ SaceV2.209M2.290 vo rājā kururaṭṭhavāsī [ kurukhettavāsī ( sī . pī .)], janasandho puccheyya pahūtakāmo ;

Kimābhijānātha pure purāṇaṃ , kiṃ vo pitā anusāse puratthā .

1470.

‘‘ SamāsanāT2.335 hotha mayāva sabbe , konīdha rañño abbhatiko manusso ;

Tamañjaliṃ kariya vadetha evaṃ , mā hevaṃ deva na hi esa dhammo ;

Viyaggharājassa nihīnajacco , samāsano deva kathaṃ bhaveyya ’’.

Lakkhaṇakaṇḍaṃ [ pekkhaṇakaṇḍaṃ ( sī . ka .)] nāma .

Issues

Jātakapāḷi

Jātakapāḷi