Chakhattiyakammaṃ

2368.

‘‘ Tesaṃ sutvāna nigghosaṃ , bhīto vessantaro ahu ;

Pabbataṃ abhiruhitvā , bhīto senaṃ udikkhati .

2369.

‘‘ IṅghaT2.445 maddi nisāmehi , nigghoso yādiso vane ;

Ājānīyā hasiyanti , dhajaggāni ca dissare .

2370.

‘‘ ImeV2.277M2.372 nūna araññasmiṃ , migasaṅghāni luddakā ;

Vāgurāhi parikkhippa , sobbhaṃ pātetvā tāvade ;

Vikkosamānā tibbāhi , hanti nesaṃ varaṃ varaṃ .

2371.

‘‘ Yathā mayaṃ adūsakā , araññe avaruddhakā ;

Amittahatthattaṃ gatā , passa dubbalaghātakaṃ ’’.

2372.

‘‘ Amittā nappasāheyyuṃ , aggīva udakaṇṇave ;

Tadeva tvaṃ vicintehi , api sotthi ito siyā ’’.

2373.

‘‘ Tato vessantaro rājā , orohitvāna pabbatā ;

Nisīdi paṇṇasālāyaṃ , daḷhaṃ katvāna mānasaṃ ’’.

2374.

‘‘ Nivattayitvāna rathaṃ , vuṭṭhapetvāna seniyo ;

Ekaṃ araññe viharantaṃ , pitā puttaṃ upāgami .

2375.

‘‘ Hatthikkhandhato oruyha , ekaṃso pañjalīkato ;

Parikiṇṇo [ parikkhitto ( sī . pī .)] amaccehi , puttaṃ siñcitumāgami .

2376.

‘‘ Tatthaddasa kumāraṃ so , rammarūpaṃ samāhitaṃ ;

Nisinnaṃ paṇṇasālāyaṃ , jhāyantaṃ akutobhayaṃ .

2377.

‘‘ Tañca disvāna āyantaṃ , pitaraṃ puttagiddhinaṃ ;

Vessantaro ca maddī ca , paccuggantvā avandisuṃ .

2378.

‘‘ Maddī ca sirasā pāde , sasurassābhivādayi ;

‘ MaddīT2.446 ahañhi te deva , pāde vandāmi te suṇhā ’[ husā ( sī . syā . pī .)];

Tesu tattha palisajja , pāṇinā parimajjatha ’’.

2379.

‘‘ Kacci vo kusalaṃ putta , kacci putta anāmayaṃ ;

Kacci uñchena yāpetha , kacci mūlaphalā bahū .

2380.

‘‘ Kacci ḍaṃsā makasā ca , appameva sarīsapā ;

Vane vāḷamigākiṇṇe , kacci hiṃsā na vijjati ’’.

2381.

‘‘ Atthi no jīvikā deva , sā ca yādisakīdisā ;

Kasirā jīvikā homa [ ahosi (?)], uñchācariyāya jīvitaṃ .

2382.

‘‘ AniddhinaṃM2.373 mahārāja , dametassaṃva sārathi ;

Tyamhā aniddhikā dantā , asamiddhi dameti no .

2383.

‘‘ Api no kisāni maṃsāni , pitu mātu adassanā ;

Avaruddhānaṃ mahārāja , araññe jīvasokinaṃ ’’.

2384.

‘‘ YepiV2.278 te siviseṭṭhassa , dāyādāpattamānasā ;

Jālī kaṇhājinā cubho , brāhmaṇassa vasānugā ;

Accāyikassa luddassa , yo ne gāvova sumbhati .

2385.

‘‘ Te rājaputtiyā putte , yadi jānātha saṃsatha ;

Pariyāpuṇātha no khippaṃ , sappadaṭṭhaṃva māṇavaṃ ’’.

2386.

‘‘ Ubho kumārā nikkītā , jālī kaṇhājinā cubho ;

Brāhmaṇassa dhanaṃ datvā , putta mā bhāyi assasa ’’.

2387.

‘‘ KacciT2.447 nu tāta kusalaṃ , kacci tāta anāmayaṃ ;

Kacci nu tāta me mātu , cakkhu na parihāyati ’’.

2388.

‘‘ Kusalañceva me putta , atho putta anāmayaṃ ;

Atho ca putta te mātu , cakkhu na parihāyati ’’.

2389.

‘‘ Kacci arogaṃ yoggaṃ te , kacci vahati vāhanaṃ ;

Kacci phīto janapado , kacci vuṭṭhi na chijjati ’’.

2390.

‘‘ Atho arogaṃ yoggaṃ me , atho vahati vāhanaṃ ;

Atho phīto janapado , atho vuṭṭhi na chijjati ’’.

2391.

‘‘ Iccevaṃ mantayantānaṃ , mātā nesaṃ adissatha ;

Rājaputtī giridvāre , pattikā anupāhanā .

2392.

‘‘ Tañca disvāna āyantaṃ , mātaraṃ puttagiddhiniṃ ;

Vessantaro ca maddī ca , paccuggantvā avandisuṃ .

2393.

‘‘ Maddī ca sirasā pāde , sassuyā abhivādayi ;

Maddī ahañhi te ayye , pāde vandāmi te suṇhā ’’.

2394.

‘‘ Maddiñca puttakā disvā , dūrato sotthimāgatā ;

Kandantā mabhidhāviṃsu , vacchabālāva mātaraṃ .

2395.

‘‘ MaddīM2.374 ca puttake disvā , dūrato sotthimāgate ;

Vāruṇīva pavedhentī , thanadhārābhisiñcatha ’’.

2396.

‘‘ Samāgatānaṃ ñātīnaṃ , mahāghoso ajāyatha ;

Pabbatā samanādiṃsu , mahī pakampitā ahu .

2397.

‘‘ Vuṭṭhidhāraṃ pavattento , devo pāvassi tāvade ;

AthaT2.448 vessantaro rājā , ñātīhi samagacchatha .

2398.

‘‘ NattāroV2.279 suṇisā putto , rājā devī ca ekato ;

Yadā samāgatā āsuṃ , tadāsi lomahaṃsanaṃ .

2399.

‘‘ Pañjalikā tassa yācanti , rodantā bherave vane ;

Vessantarañca maddiñca , sabbe raṭṭhā samāgatā ;

Tvaṃ nosi issaro rājā , rajjaṃ kāretha no ubho ’’.

Chakhattiyakammaṃ nāma .

2400.

‘‘ Dhammena rajjaṃ kārentaṃ , raṭṭhā pabbājayittha maṃ ;

Tvañca jānapadā ceva , negamā ca samāgatā ’’.

2401.

‘‘ Dukkaṭañca hi no putta , bhūnahaccaṃ kataṃ mayā ;

Yohaṃ sivīnaṃ vacanā , pabbājesimadūsakaṃ ’’.

2402.

‘‘ Yena kenaci vaṇṇena , pitu dukkhaṃ udabbahe ;

Mātu bhaginiyā cāpi , api pāṇehi attano ’’.

2403.

‘‘ Tato vessantaro rājā , rajojallaṃ pavāhayi ;

Rajojallaṃ pavāhetvā , saṅkhavaṇṇaṃ [ saccavaṇṇaṃ ( sī . syā .)] adhārayi ’’.

2404.

‘‘ Sīsaṃ nhāto sucivattho , sabbābharaṇabhūsito ;

Paccayaṃ nāgamāruyha , khaggaṃ bandhi parantapaṃ .

2405.

‘‘ TatoT2.449 saṭṭhisahassāni , yodhino cārudassanā ;

Sahajātā pakiriṃsu , nandayantā rathesabhaṃ .

2406.

‘‘ TatoM2.375 maddimpi nhāpesuṃ , sivikaññā samāgatā ;

Vessantaro taṃ pāletu , jālī kaṇhājinā cubho ;

Athopi taṃ mahārājā , sañjayo abhirakkhatu ’’.

2407.

‘‘ Idañca paccayaṃ laddhā , pubbe saṃklesamattano ;

Ānandiyaṃ ācariṃsu , ramaṇīye giribbaje .

2408.

‘‘ Idañca paccayaṃ laddhā , pubbe saṃklesamattano ;

Ānandi vittā sumanā , putte saṅgamma lakkhaṇā .

2409.

‘‘ Idañca paccayaṃ laddhā , pubbe saṃklesamattano ;

Ānandi vittā patītā , saha puttehi lakkhaṇā ’’.

2410.

‘‘ EkabhattāV2.280 pure āsiṃ , niccaṃ thaṇḍilasāyinī ;

Iti metaṃ vataṃ āsi , tumhaṃ kāmā hi puttakā .

2411.

‘‘ Taṃ me vataṃ samiddhajja , tumhe saṅgamma puttakā ;

Mātujampi taṃ pāletu , pitujampi ca puttaka ;

Athopi taṃ mahārājā , sañjayo abhirakkhatu .

2412.

‘‘ Yaṃ kiñcitthi kataṃ puññaṃ , mayhañceva pitucca te ;

Sabbena tena kusalena , ajaro amaro bhava ’’.

2413.

‘‘ Kappāsikañca koseyyaṃ , khomakoṭumbarāni ca ;

SassuT2.450 suṇhāya pāhesi , yehi maddī asobhatha .

2414.

‘‘ Tato hemañca kāyūraṃ , gīveyyaṃ ratanāmayaṃ ;

Sassu suṇhāya pāhesi , yehi maddī asobhatha .

2415.

‘‘ Tato hemañca kāyūraṃ , aṅgadaṃ maṇimekhalaṃ ;

Sassu suṇhāya pāhesi , yehi maddī asobhatha .

2416.

‘‘ Uṇṇataṃ mukhaphullañca , nānāratte ca māṇike [ māṇiye ( sī . pī .)];

Sassu suṇhāya pāhesi , yehi maddī asobhatha .

2417.

‘‘ Uggatthanaṃ giṅgamakaṃ , mekhalaṃ pāṭipādakaṃ [ paṭipādukaṃ ( sī . syā .), pālipādakaṃ ( pī .)];

Sassu suṇhāya pāhesi , yehi maddī asobhatha .

2418.

‘‘ SuttañcaM2.376 suttavajjañca , upanijjhāya seyyasi ;

Asobhatha rājaputtī , devakaññāva nandane .

2419.

‘‘ Sīsaṃ nhātā sucivatthā , sabbālaṅkārabhūsitā ;

Asobhatha rājaputtī , tāvatiṃseva accharā .

2420.

‘‘ Kadalīva vātacchupitā , jātā cittalatāvane ;

Dantāvaraṇasampannā , rājaputtī asobhatha .

2421.

‘‘ Sakuṇī mānusinīva , jātā cittapattā patī ;

Nigrodhapakkabimboṭṭhī , rājaputtī asobhatha .

2422.

‘‘ Tassā ca nāgamānesuṃ , nātibaddhaṃva kuñjaraṃ ;

Sattikkhamaṃ sarakkhamaṃ , īsādantaṃ urūḷhavaṃ .

2423.

‘‘ Sā maddī nāgamāruhi , nātibaddhaṃva kuñjaraṃ ;

SattikkhamaṃT2.451 sarakkhamaṃ , īsādantaṃ urūḷhavaṃ ’’.

2424.

‘‘ SabbamhiV2.281 taṃaraññamhi , yāvantettha migā ahuṃ ;

Vessantarassa tejena , naññamaññaṃ viheṭhayuṃ .

2425.

‘‘ Sabbamhi taṃaraññamhi , yāvantettha dijā ahuṃ ;

Vessantarassa tejena , naññamaññaṃ viheṭhayuṃ .

2426.

‘‘ Sabbamhi taṃaraññamhi , yāvantettha migā ahuṃ ;

Ekajjhaṃ sannipātiṃsu , vessantare payātamhi ;

Sivīnaṃ raṭṭhavaḍḍhane .

2427.

‘‘ Sabbamhi taṃaraññamhi , yāvantettha dijā ahuṃ ;

Ekajjhaṃ sannipātiṃsu , vessantare payātamhi ;

Sivīnaṃ raṭṭhavaḍḍhane .

2428.

‘‘ Sabbamhi taṃaraññamhi , yāvantettha migā ahuṃ ;

Nāssu mañjū nikūjiṃsu , vessantare payātamhi ;

Sivīnaṃ raṭṭhavaḍḍhane .

2429.

‘‘ Sabbamhi taṃaraññamhi , yāvantettha dijā ahuṃ ;

Nāssu mañjū nikūjiṃsu , vessantare payātamhi ;

Sivīnaṃ raṭṭhavaḍḍhane .

2430.

‘‘ PaṭiyattoM2.377 rājamaggo , vicitto pupphasanthato ;

Vasi vessantaro yattha , yāvatāva jetuttarā .

2431.

‘‘ Tato saṭṭhisahassāni , yodhino cārudassanā ;

Samantā parikiriṃsu , vessantareT2.452 payātamhi ;

Sivīnaṃ raṭṭhavaḍḍhane .

2432.

‘‘ Orodhā ca kumārā ca , vesiyānā ca brāhmaṇā ;

Samantā parikiriṃsu , vessantare payātamhi ;

Sivīnaṃ raṭṭhavaḍḍhane .

2433.

‘‘ Hatthārohā anīkaṭṭhā , rathikā pattikārakā ;

Samantā parikiriṃsu , vessantare payātamhi ;

Sivīnaṃ raṭṭhavaḍḍhane .

2434.

‘‘ Samāgatā jānapadā , negamā ca samāgatā ;

Samantā parikiriṃsu , vessantare payātamhi ;

Sivīnaṃ raṭṭhavaḍḍhane .

2435.

‘‘ KaroṭiyāV2.282 cammadharā , illīhatthā [ indihatthā ( syā . ka .), khaggahatthā ( sī . pī .)] suvammino ;

Purato paṭipajjiṃsu , vessantare payātamhi ;

Sivīnaṃ raṭṭhavaḍḍhane .

2436.

‘‘ Te pāvisuṃ puraṃ rammaṃ , mahāpākāratoraṇaṃ ;

Upetaṃ annapānehi , naccagītehi cūbhayaṃ .

2437.

‘‘ Vittā jānapadā āsuṃ , negamā ca samāgatā ;

Anuppatte kumāramhi , sivīnaṃ raṭṭhavaḍḍhane .

2438.

‘‘ Celukkhepo avattittha , āgate dhanadāyake ;

Nandiṃ pavesi [ nandi-ppavesi ( sī . syā . pī .)] nagare , bandhanā mokkho aghosatha .

2439.

‘‘ JātarūpamayaṃT2.453M2.378 vassaṃ , devo pāvassi tāvade ;

Vessantare paviṭṭhamhi , sivīnaṃ raṭṭhavaḍḍhane .

2440.

‘‘ Tato vessantaro rājā , dānaṃ datvāna khattiyo ;

Kāyassa bhedā sappañño , saggaṃ so upapajjathā ’’ ti .

Vessantarajātakaṃ dasamaṃ .

Mahānipāta niṭṭhitā .

Jātakapāḷi niṭṭhitā .

Issues

Jātakapāḷi

Jātakapāḷi

Chakhattiyakammaṃ

Chakhattiyakammaṃ

Reading Settings