Sakkapabbaṃ
2267.
Tato ratyā vivasāne , sūriyassuggamanaṃ pati ;
Sakko brāhmaṇavaṇṇena , pāto tesaṃ adissatha .
2268.
‘‘ Kacci nu bhoto kusalaṃ , kacci bhoto anāmayaṃ ;
Kacci uñchena yāpetha , kacci mūlaphalā bahū .
2269.
‘‘ Kacci ḍaṃsā makasā ca , appameva sarīsapā ;
Vane vāḷamigākiṇṇe , kacci hiṃsā na vijjati ’’.
2270.
‘‘ Kusalañceva no brahme , atho brahme anāmayaṃ ;
Atho uñchena yāpema , atho mūlaphalā bahū .
2271.
‘‘ Atho ḍaṃsā makasā ca , appameva sarīsapā ;
Vane vāḷamigākiṇṇe , hiṃsā mayhaṃ na vijjati .
2272.
‘‘ Satta no māse vasataṃ , araññe jīvasokinaṃ ;
Idaṃ dutiyaṃ passāma , brāhmaṇaṃ devavaṇṇinaṃ ;
Ādāya veḷuvaṃ daṇḍaṃ , dhārentaṃ ajinakkhipaṃ .
2273.
‘‘ Svāgataṃ
M2.364 te mahābrahme , atho me adurāgataṃ ;Anto
T2.434 pavisa bhaddante , pāde pakkhālayassu te . 2274.
‘‘ Tindukāni piyālāni , madhuke kāsumāriyo ;
Phalāni khuddakappāni , bhuñja brahme varaṃ varaṃ .
2275.
‘‘ Idampi pānīyaṃ sītaṃ , ābhataṃ girigabbharā ;
Tato piva mahābrahme , sace tvaṃ abhikaṅkhasi .
2276.
‘‘ Atha tvaṃ kena vaṇṇena , kena vā pana hetunā ;
Anuppatto brahāraññaṃ , taṃ me akkhāhi pucchito ’’.
2277.
‘‘ Yathā vārivaho pūro , sabbakālaṃ na khīyati ;
Evaṃ taṃ yācitāgacchiṃ , bhariyaṃ me dehi yācito ’’.
2278.
‘‘ Dadāmi
V2.270 na vikampāmi , yaṃ maṃ yācasi brāhmaṇa ;Santaṃ nappaṭiguyhāmi , dāne me ramatī mano ’’.
2279.
‘‘ Maddiṃ hatthe gahetvāna , udakassa kamaṇḍaluṃ ;
Brāhmaṇassa adā dānaṃ , sivīnaṃ raṭṭhavaḍḍhano .
2280.
‘‘ Tadāsi yaṃ bhiṃsanakaṃ , tadāsi lomahaṃsanaṃ ;
Maddiṃ paricajantassa , medanī sampakampatha .
2281.
‘‘ Neva sā maddī bhākuṭi , na sandhīyati na rodati ;
Pekkhatevassa tuṇhī sā , eso jānāti yaṃ varaṃ ’’.
2282.
‘‘ Komārī
T2.435 yassāhaṃ bhariyā , sāmiko mama issaro ;Yassicche tassa maṃ dajjā , vikkiṇeyya haneyya vā ’’.
2283.
‘‘ Tesaṃ saṅkappamaññāya , devindo etadabravi ;
Sabbe jitā te paccūhā , ye dibbā ye ca mānusā .
2284.
‘‘ Ninnāditā te pathavī , saddo te tidivaṅgato ;
Samantā vijjutā āguṃ , girīnaṃva patissutā .
2285.
‘‘ Tassa te anumodanti , ubho nāradapabbatā ;
Indo ca brahmā pajāpati , somo yamo vessavaṇo ;
Sabbe devānumodanti , dukkarañhi karoti so .
2286.
‘‘ Duddadaṃ
M2.365 dadamānānaṃ , dukkaraṃ kamma kubbataṃ ;Asanto nānukubbanti , sataṃ dhammo durannayo .
2287.
‘‘ Tasmā satañca asataṃ , nānā hoti ito gati ;
Asanto nirayaṃ yanti , santo saggaparāyaṇā .
2288.
‘‘ Yametaṃ kumāre adā , bhariyaṃ adā vane vasaṃ ;
Brahmayānamanokkamma , sagge te taṃ vipaccatu ’’.
2289.
‘‘ Dadāmi bhoto bhariyaṃ , maddiṃ sabbaṅgasobhanaṃ ;
Tvañceva maddiyā channo , maddī ca patinā saha .
2290.
‘‘ Yathā
T2.436 payo ca saṅkho ca , ubho samānavaṇṇino ;Evaṃ tuvañca maddī ca , samānamanacetasā .
2291.
‘‘ Avaruddhettha araññasmiṃ , ubho sammatha assame ;
Khattiyā gottasampannā , sujātā mātupettito ;
Yathā puññāni kayirātha , dadantā aparāparaṃ ’’.
2292.
‘‘ Sakkohamasmi
V2.271 devindo , āgatosmi tavantike ;Varaṃ varassu rājisi , vare aṭṭha dadāmi te ’’.
2293.
‘‘ Varaṃ ce me ado sakka , sabbabhūtānamissara ;
Pitā maṃ anumodeyya , ito pattaṃ sakaṃ gharaṃ ;
Āsanena nimanteyya , paṭhametaṃ varaṃ vare .
2294.
‘‘ Purisassa vadhaṃ na roceyyaṃ , api kibbisakārakaṃ ;
Vajjhaṃ vadhamhā moceyyaṃ , dutiyetaṃ varaṃ vare .
2295.
‘‘ Ye vuḍḍhā ye ca daharā , ye ca majjhimaporisā ;
Mameva upajīveyyuṃ , tatiyetaṃ varaṃ vare .
2296.
‘‘ Paradāraṃ na gaccheyyaṃ , sadārapasuto siyaṃ ;
Thīnaṃ vasaṃ na gaccheyyaṃ , catutthetaṃ varaṃ vare .
2297.
‘‘ Putto me sakka jāyetha , so ca dīghāyuko siyā ;
Dhammena jine pathaviṃ , pañcametaṃ varaṃ vare .
2298.
‘‘ Tato ratyā vivasāne , sūriyassuggamanaṃ pati ;
Dibbā bhakkhā pātubhaveyyuṃ , chaṭṭhametaṃ varaṃ vare .
2299.
‘‘ Dadato
T2.437M2.366 me na khīyetha , datvā nānutapeyyahaṃ ;Dadaṃ cittaṃ pasādeyyaṃ , sattametaṃ varaṃ vare .
2300.
‘‘ Ito vimuccamānāhaṃ , saggagāmī visesagū ;
Anivatti tato assaṃ , aṭṭhametaṃ varaṃ vare ’’.
2301.
‘‘ Tassa taṃ vacanaṃ sutvā , devindo etadabravi ;
Aciraṃ vata te tato , pitā taṃ daṭṭhumessati ’’.
2302.
‘‘ Idaṃ vatvāna maghavā , devarājā sujampati ;
Vessantare varaṃ datvā , saggakāyaṃ apakkami ’’.
Sakkapabbaṃ nāma .