Maṇikaṇḍaṃ
1393.
‘‘ Idañca me maṇiratanaṃ , passa tvaṃ dvipaduttama ;
Itthīnaṃ viggahā cettha , purisānañca viggahā .
1394.
‘‘ Migānaṃ viggahā cettha , sakuṇānañca viggahā ;
Nāgarājā supaṇṇā ca [ nāgarāje supaṇṇe ca ( sī . syā . pī .)], maṇimhi passa nimmitaṃ .
1395.
‘‘ Hatthānīkaṃ
M2.282 rathānīkaṃ , asse pattī ca vammine [ dhajāni ca ( pī .)];Caturaṅginimaṃ senaṃ , maṇimhi passa nimmitaṃ .
1396.
‘‘ Hatthārohe anīkaṭṭhe , rathike pattikārake ;
Balaggāni viyūḷhāni [ viyūhāni ( syā . ka .)], maṇimhi passa nimmitaṃ .
1397.
‘‘ Puraṃ uddhāpasampannaṃ [ uddāpasampannaṃ ( sī . pī .), aṭṭālasampannaṃ ( syā .)], bahupākāratoraṇaṃ ;
Siṅghāṭakesu bhūmiyo , maṇimhi passa nimmitaṃ .
1398.
‘‘ Esikā
T2.325 parikhāyo ca , palikhaṃ aggaḷāni ca ;Aṭṭālake ca dvāre ca , maṇimhi passa nimmitaṃ .
1399.
‘‘ Passa toraṇamaggesu , nānādijā gaṇā bahū ;
Haṃsā koñcā mayūrā ca , cakkavākā ca kukkuhā .
1400.
‘‘ Kuṇālakā bahū citrā , sikhaṇḍī jīvajīvakā ;
Nānādijagaṇākiṇṇaṃ , maṇimhi passa nimmitaṃ .
1401.
‘‘ Passa nagaraṃ supākāraṃ , abbhutaṃ lomahaṃsanaṃ ;
Samussitadhajaṃ rammaṃ , soṇṇavālukasanthataṃ .
1402.
‘‘ Passettha [ passa tvaṃ ( sī . pī .)] paṇṇasālāyo , vibhattā bhāgaso mitā ;
Nivesane nivese ca , sandhibyūhe pathaddhiyo .
1403.
‘‘ Pānāgāre
V2.204 ca soṇḍe ca , sūnā [ sūṇā ( sī . pī .), suddā ( syā . ka .)] odaniyā gharā ;Vesī ca gaṇikāyo ca , maṇimhi passa nimmitaṃ .
1404.
‘‘ Mālākāre ca rajake , gandhike atha dussike ;
Suvaṇṇakāre maṇikāre , maṇimhi passa nimmitaṃ .
1405.
‘‘ Āḷārike ca sūde ca , naṭanāṭakagāyino ;
Pāṇissare kumbhathūnike , maṇimhi passa nimmitaṃ .
1406.
‘‘ Passa bherī mudiṅgā ca , saṅkhā paṇavadindimā ;
Sabbañca tāḷāvacaraṃ , maṇimhi passa nimmitaṃ .
1407.
‘‘ Sammatālañca
M2.283 vīṇañca , naccagītaṃ suvāditaṃ ;Tūriyatāḷitasaṅghuṭṭhaṃ
T2.326 , maṇimhi passa nimmitaṃ . 1408.
‘‘ Laṅghikā muṭṭhikā cettha , māyākārā ca sobhiyā ;
Vetālike [ vettalike ( ka .)] ca jalle ca , maṇimhi passa nimmitaṃ .
1409.
‘‘ Samajjā cettha vattanti , ākiṇṇā naranāribhi ;
Mañcātimañce bhūmiyo , maṇimhi passa nimmitaṃ .
1410.
‘‘ Passa malle samajjasmiṃ , phoṭente [ pāṭhente ( sī . syā . pī .)] diguṇaṃ bhujaṃ ;
Nihate nihatamāne ca , maṇimhi passa nimmitaṃ .
1411.
‘‘ Passa pabbatapādesu , nānāmigagaṇā bahū ;
Sīhā byagghā varāhā ca , acchakokataracchayo .
1412.
‘‘ Palāsādā gavajā ca , mahiṃsā rohitā rurū ;
Eṇeyyā ca varāhā [ sarabhā ( syā .)] ca , gaṇino nīka [ niṅka ( sī . syā . pī .)] sūkarā .
1413.
‘‘ Kadalimigā bahū citrā , biḷārā sasakaṇṭakā ;
Nānāmigagaṇākiṇṇaṃ , maṇimhi passa nimmitaṃ .
1414.
‘‘ Najjāyo supatitthāyo , soṇṇavālukasanthatā ;
Acchā savanti ambūni , macchagumbanisevitā .
1415.
‘‘ Kumbhīlā makarā cettha , susumārā ca kacchapā ;
Pāṭhīnā pāvusā macchā , balajā [ valajā ( sī .), vālajā ( pī .)] muñjarohitā .
1416.
‘‘ Nānādijagaṇākiṇṇā , nānādumagaṇāyutā ;
Veḷuriyaka-rodāyo [ veḷuriyaphalakarodāyo ( sī .)], maṇimhi passa nimmitaṃ .
1417.
‘‘ Passettha
T2.327 pokkharaṇiyo , suvibhattā catuddisā ;Nānādijagaṇākiṇṇā , puthulomanisevitā .
1418.
‘‘ Samantodakasampannaṃ
V2.205 , mahiṃ sāgarakuṇḍalaṃ ;Upetaṃ vanarājehi , maṇimhi passa nimmitaṃ .
1419.
‘‘ Purato videhe passa , goyāniye ca pacchato ;
Kuruyo jambudīpañca , maṇimhi passa nimmitaṃ .
1420.
‘‘ Passa
M2.284 candaṃ sūriyañca , obhāsante catuddisā ;Sineruṃ anupariyante , maṇimhi passa nimmitaṃ .
1421.
‘‘ Sineruṃ himavantañca , sāgarañca mahītalaṃ [ mahiddhikaṃ ( sī . pī .), mahiddhiyaṃ ( syā .)];
Cattāro ca mahārāje , maṇimhi passa nimmitaṃ .
1422.
‘‘ Ārāme vanagumbe ca , pāṭiye [ piṭṭhiye ( ka .)] ca siluccaye ;
Ramme kimpurisākiṇṇe , maṇimhi passa nimmitaṃ .
1423.
‘‘ Phārusakaṃ cittalataṃ , missakaṃ nandanaṃ vanaṃ ;
Vejayantañca pāsādaṃ , maṇimhi passa nimmitaṃ .
1424.
‘‘ Sudhammaṃ tāvatiṃsañca , pārichattañca pupphitaṃ ;
Erāvaṇaṃ nāgarājaṃ , maṇimhi passa nimmitaṃ .
1425.
‘‘ Passettha devakaññāyo , nabhā vijjurivuggatā ;
Nandane vicarantiyo , maṇimhi passa nimmitaṃ .
1426.
‘‘ Passettha devakaññāyo , devaputtapalobhinī ;
Devaputte
T2.328 ramamāne [ caramāne ( sī . pī .)], maṇimhi passa nimmitaṃ . 1427.
‘‘ Parosahassapāsāde , veḷuriyaphalasanthate ;
Pajjalante ca [ pajjalantena ( sī . syā . pī .)] vaṇṇena , maṇimhi passa nimmitaṃ .
1428.
‘‘ Tāvatiṃse ca yāme ca , tusite cāpi nimmite ;
Paranimmitavasavattino [ paranimmitābhiratino ( sī . pī .)], maṇimhi passa nimmitaṃ .
1429.
‘‘ Passettha pokkharaṇiyo , vippasannodikā sucī ;
Mandālakehi sañchannā , padumuppalakehi ca .
1430.
‘‘ Dasettha rājiyo setā , dasanīlā [ dassanīyā ( ka .)] manoramā ;
Cha piṅgalā pannarasa , haliddā ca catuddasa .
1431.
‘‘ Vīsati tattha sovaṇṇā , vīsati rajatāmayā ;
Indagopakavaṇṇābhā , tāva dissanti tiṃsati .
1432.
‘‘ Dasettha kāḷiyo chacca , mañjeṭṭhā pannavīsati ;
Missā bandhukapupphehi , nīluppalavicittikā .
1433.
‘‘ Evaṃ
V2.206M2.285 sabbaṅgasampannaṃ , accimantaṃ pabhassaraṃ ;Odhisuṅkaṃ mahārāja , passa tvaṃ dvipaduttama ’’.
Maṇikaṇḍaṃ nāma .