522. Ettha bho gotamāti etasmiṃ maggāmagge .

Viggaho vivādotiādīsu pubbuppattiko viggaho . Aparabhāge vivādo . Duvidhopi eso nānāācariyānaṃ vādato nānāvādo .

523. Atha kismiṃ pana voti tvampi ayameva maggoti attano ācariyavādameva paggayha tiṭṭhasi , bhāradvājopi attano ācariyavādameva , ekassāpi ekasmiṃ saṃsayo natthi . Evaṃ sati kismiṃ vo viggahoti pucchati .

524. MaggāmaggeP2.401 , bho gotamāti magge bho gotama amagge ca , ujumagge ca anujumagge cāti attho . Esa kira ekabrāhmaṇassāpi maggaṃ ‘‘ na maggo ’’ ti na vadati . Yathā pana attano ācariyassa maggo ujumaggo , naM1.333 evaṃ aññesaṃ anujānāti , tasmā tamevatthaṃ dīpento ‘‘ kiñcāpi bho gotamā ’’ tiādimāha .

Sabbāni tānīti liṅgavipallāsena vadati , sabbe teti vuttaṃ hoti .

Bahūnīti aṭṭha vā dasaV1.302 vā . Nānāmaggānīti mahantāmahantajaṅghamaggasakaṭamaggādivasena nānāvidhāni sāmantā gāmanadītaḷākakhettādīhi āgantvā gāmaṃ pavisanamaggāni .