Brāhmaṇadūtavatthuvaṇṇanā
359. Evaṃ
P1.309V1.249M1.276 me sutaṃ – ekaṃ samayaṃ bhagavā vesāliyan ti mahālisuttaṃ .
Tatrāyaṃ apubbapadavaṇṇanā .
Vesāliyan ti punappunaṃ visālabhāvūpagamanato vesālīti laddhanāmake nagare .
Mahāvaneti bahinagare himavantena saddhiṃ ekābaddhaṃ hutvā ṭhitaṃ sayaṃ jātavanaṃ atthi , yaṃ mahantabhāveneva mahāvananti vuccati , tasmiṃ mahāvane .
Kūṭāgārasālāyan ti tasmiṃ vanasaṇḍe saṅghārāmaṃ patiṭṭhapesuṃ .
Tattha kaṇṇikaṃ yojetvā thambhānaṃ upari kūṭāgārasālāsaṅkhepena devavimānasadisaṃ pāsādaṃ akaṃsu , taṃ upādāya sakalopi saṅghārāmo ‘‘ kūṭāgārasālā ’’ ti paññāyittha .
Bhagavā taṃ vesāliṃ upanissāya tasmiṃ saṅghārāme viharati .
Tena vuttaṃ –
‘‘ vesāliyaṃ viharati mahāvane kūṭāgārasālāyan ’’ ti .Kosalakāti kosalaraṭṭhavāsino .
Māgadhakāti magadharaṭṭhavāsino .
Karaṇīyenāti avassaṃ kattabbakammena .
Yañhi akātumpi vaṭṭati , taṃ kiccanti vuccati , yaṃ avassaṃ kātabbameva , taṃ karaṇīyaṃ nāma .
360. Paṭisallīno bhagavāti nānārammaṇacārato paṭikkamma sallīno nilīno , ekībhāvaṃ upagamma ekattārammaṇe jhānaratiṃ anubhavatīti attho .
Tatthevāti tasmiññeva vihāre .
Ekamantan ti
P1.310 tasmā ṭhānā apakkamma tāsu tāsu rukkhacchāyāsu nisīdiṃsu .