Āsavagocchakaṃ
1465. Katame dhammā āsavā ?
Cattāro āsavā – kāmāsavo , bhavāsavo , diṭṭhāsavo , avijjāsavo .
Kāmāsavo aṭṭhasu lobhasahagatesu cittuppādesu uppajjati bhavāsavo catūsu diṭṭhigatavippayuttalobhasahagatesu cittuppādesu uppajjati diṭṭhāsavo catūsu diṭṭhigatasampayuttesu cittuppādesu uppajjati .
Avijjāsavo sabbākusalesu uppajjati – ime dhammā āsavā .
1466. Katame dhammā no āsavā ?
Ṭhapetvā āsave avasesaṃ akusalaṃ , catūsu bhūmīsu kusalaṃ
P0.246 , catūsu bhūmīsu vipāko , tīsu bhūmīsu kiriyābyākataṃ , rūpañca , nibbānañca – imeT0.356 dhammā no āsavā . 1467. Katame dhammā sāsavā ?
Tīsu bhūmīsu kusalaṃ , akusalaṃ , tīsu bhūmīsu vipāko , tīsu bhūmīsu kiriyābyākataṃ , sabbañca rūpaṃ – ime dhammā sāsavā .
1468. Katame dhammā anāsavā ?
Cattāro maggā apariyāpannā , cattāri ca sāmaññaphalāni , nibbānañca – ime dhammā anāsavā .
1469. Katame
V0.306 dhammā āsavasampayuttā ?Dve domanassasahagatacittuppādā etthuppannaṃ mohaṃ ṭhapetvā , vicikicchāsahagataṃ uddhaccasahagataṃ mohaṃ ṭhapetvā , avasesaṃ akusalaṃ – ime dhammā āsavasampayuttā .
1470. Katame
M0.279 dhammā āsavavippayuttā ?Dvīsu domanassasahagatesu cittuppādesu uppanno moho , vicikicchāsahagato moho , uddhaccasahagato moho , catūsu bhūmīsu kusalaṃ , catūsu bhūmīsu vipāko , tīsu bhūmīsu kiriyābyākataṃ , rūpañca , nibbānañca – ime dhammā āsavavippayuttā .
1471. Katame dhammā āsavā ceva sāsavā ca ?
Teva āsavā āsavā ceva sāsavā ca .
1472. Katame dhammā sāsavā ceva no ca āsavā ?
Ṭhapetvā āsave , avasesaṃ akusalaṃ , tīsu bhūmīsu kusalaṃ , tīsu bhūmīsu vipāko , tīsu bhūmīsu kiriyābyākataṃ , sabbañca rūpaṃ – ime dhammā sāsavā ceva no ca āsavā .
Anāsavā dhammā na vattabbā – āsavā ceva sāsavā cātipi , sāsavā ceva no ca āsavātipi .
1473. Katame
T0.357 dhammā āsavā ceva āsavasampayuttā ca ?Yattha dve tayo āsavā ekato uppajjanti – ime dhammā āsavā ceva āsavasampayuttā ca .
1474. Katame dhammā āsavasampayuttā ceva no ca āsavā ?
Ṭhapetvā āsave , avasesaṃ akusalaṃ – ime dhammā āsavasampayuttā ceva no ca āsavā .
Āsavavippayuttā dhammā na vattabbā – āsavā ceva āsavasampayuttā cātipi , āsavasampayuttā ceva no ca āsavātipi .
1475. Katame dhammā āsavavippayuttā sāsavā ?
Dvīsu domanassasahagatesu cittuppādesu uppanno moho , vicikicchāsahagato moho , uddhaccasahagato moho , tīsu bhūmīsu
V0.307P0.247 kusalaṃ , tīsu bhūmīsu vipāko , tīsu bhūmīsu kiriyābyākataṃ , sabbañca rūpaṃ – ime dhammā āsavavippayuttā sāsavā . 1476. Katame dhammā āsavavippayuttā anāsavā ?
Cattāro maggā apariyāpannā , cattāri ca sāmaññaphalāni , nibbānañca – ime dhammā āsavavippayuttā anāsavā .
Āsavasampayuttā dhammā na vattabbā – āsavavippayuttā sāsavātipi , āsavavippayuttā anāsavātipi .