Āsavagocchakaṃ
1102. Katame
T0.281 dhammā āsavā ?Cattāro āsavā – kāmāsavo , bhavāsavo , diṭṭhāsavo , avijjāsavo .
1103. Tattha
M0.222 katamo kāmāsavo ?Yo kāmesu kāmacchando kāmarāgo kāmanandī kāmataṇhā kāmasineho kāmapariḷāho kāmamucchā kāmajjhosānaṃ – ayaṃ vuccati kāmāsavo .
1104. Tattha katamo bhavāsavo ?
Yo bhavesu bhavachando [ bhavacchando ( sī . syā .)] bhavarāgo bhavanandī bhavataṇhā bhavasineho bhavapariḷāho bhavamucchā bhavajjhosānaṃ – ayaṃ vuccati bhavāsavo .
1105. Tattha katamo diṭṭhāsavo ?
Sassato lokoti vā , asassato lokoti vā , antavā lokoti vā , anantavā lokoti vā , taṃ jīvaṃ taṃ sarīranti vā , aññaṃ jīvaṃ aññaṃ sarīranti vā , hoti tathāgato paraṃ maraṇāti vā , na hoti tathāgato paraṃ maraṇāti vā , hoti ca na ca hoti tathāgato paraṃ maraṇāti vā , neva hoti na na hoti tathāgato paraṃ maraṇāti vā ;
yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ diṭṭhivipphanditaṃ diṭṭhisaṃyojanaṃ gāho paṭiggāho abhiniveso parāmāso kummaggo micchāpatho micchattaṃ titthāyatanaṃ vipariyāsaggāho – ayaṃ vuccati diṭṭhāsavo .
Sabbāpi micchādiṭṭhi diṭṭhāsavo .
1106. Tattha katamo avijjāsavo ?
Dukkhe aññāṇaṃ , dukkhasamudaye aññāṇaṃ , dukkhanirodhe aññāṇaṃ , dukkhanirodhagāminiyā paṭipadāya aññāṇaṃ
T0.282 , pubbante aññāṇaṃ , aparante aññāṇaṃ , pubbantāparante aññāṇaṃ , idappaccayatā paṭiccasamuppannesu dhammesu aññāṇaṃ yaṃ evarūpaṃ aññāṇaṃ adassanaṃ anabhisamayo ananubodho asambodho appaṭivedho asaṃgāhanā apariyogāhanā asamapekkhanā apaccavekkhaṇā apaccakkhakammaṃ dummejjhaṃ bālyaṃ asampajaññaṃV0.246 moho pamoho sammoho avijjā avijjogho avijjāyogo avijjānusayoP0.196 avijjāpariyuṭṭhānaṃ avijjālaṅgī moho akusalamūlaṃ – ayaṃ vuccati avijjāsavo .Ime dhammā āsavā .
1107. Katame dhammā no āsavā ?
Te dhamme ṭhapetvā avasesā kusalākusalābyākatā dhammā kāmāvacarā , rūpāvacarā , arūpāvacarā , apariyāpannā
M0.223 vedanākkhandho … pe … viññāṇakkhandho ;sabbañca rūpaṃ asaṅkhatā ca dhātu – ime dhammā no āsavā .
1108. Katame dhammā sāsavā ?
Kusalākusalābyākatā dhammā kāmāvacarā , rūpāvacarā , arūpāvacarā ;
rūpakkhandho … pe … viññāṇakkhandho – ime dhammā sāsavā .
1109. Katame dhammā anāsavā ?
Apariyāpannā maggā ca maggaphalāni ca , asaṅkhatā ca dhātu – ime dhammā anāsavā .
1110. Katame dhammā āsavasampayuttā ?
Tehi dhammehi ye dhammā sampayuttā vedanākkhandho … pe … viññāṇakkhandho – ime dhammā
T0.283 āsavasampayuttā . 1111. Katame dhammā āsavavippayuttā ?
Tehi dhammehi ye dhammā vippayuttā vedanākkhandho … pe … viññāṇakkhandho ;
sabbañca rūpaṃ , asaṅkhatā ca dhātu – ime dhammā āsavavippayuttā .
1112. Katame dhammā āsavā ceva sāsavā ca ?
Teyeva āsavā āsavā ceva sāsavā ca .
1113. Katame dhammā sāsavā ceva no ca āsavā ?
Tehi dhammehi ye dhammā sāsavā , te dhamme ṭhapetvā avasesā sāsavā kusalākusalābyākatā dhammā kāmāvacarā , rūpāvacarā
V0.247 , arūpāvacarā ;rūpakkhandho … pe … viññāṇakkhandho – ime dhammā sāsavā ceva no ca āsavā .
1114. Katame dhammā āsavā ceva āsavasampayuttā ca ?
Kāmāsavo avijjāsavena āsavo ceva āsavasampayutto ca , avijjāsavo kāmāsavena āsavo ceva āsavasampayutto ca , bhavāsavo avijjāsavena āsavo ceva āsavasampayutto ca , avijjāsavo bhavāsavena āsavo ceva āsavasampayutto ca , diṭṭhāsavo avijjāsavena āsavo ceva āsavasampayutto ca , avijjāsavo
P0.197 diṭṭhāsavena āsavo ceva āsavasampayutto ca – ime dhammā āsavā ceva āsavasampayuttā ca . 1115. Katame
M0.224 dhammā āsavasampayuttā ceva no ca āsavā ?Tehi dhammehi ye dhammā sampayuttā , te dhamme ṭhapetvā vedanākkhandho … pe … viññāṇakkhandho – ime dhammā āsavasampayuttā ceva no ca āsavā .
1116. Katame
T0.284 dhammā āsavavippayuttā sāsavā ?Tehi dhammehi ye dhammā vippayuttā sāsavā kusalākusalābyākatā dhammā kāmāvacarā , rūpāvacarā , arūpāvacarā , rūpakkhandho … pe … viññāṇakkhandho – ime dhammā āsavavippayuttā sāsavā .
1117. Katame dhammā āsavavippayuttā anāsavā ?
Apariyāpannā maggā ca , maggaphalāni ca , asaṅkhatā ca dhātu – ime dhammā āsavavippayuttā anāsavā .
Nikkhepakaṇḍe paṭhamabhāṇavāro .