Kalyāṇasīlasuttaṃ

Author： _System_Pali_VRI_ @ Administrator

Kalyāṇasīlasuttaṃ

97. Vuttañhetaṃ bhagavatā , vuttamarahatāti me sutaṃ –

‘‘ Kalyāṇasīlo , bhikkhave , bhikkhu kalyāṇadhammo kalyāṇapañño imasmiṃ dhammavinaye ‘ kevalī vusitavā uttamapuriso ’ ti vuccati –

‘‘ KathañcaT0.304 , bhikkhave , bhikkhu kalyāṇasīlo hoti ?

Idha , bhikkhave , bhikkhu sīlavā hoti , pātimokkhasaṃvarasaṃvuto viharati , ācāragocarasampanno aṇumattesu vajjesu bhayadassāvī , samādāya sikkhati sikkhāpadesu .

Evaṃ kho , bhikkhave , bhikkhu kalyāṇasīlo hoti .

Iti kalyāṇasīlo .

‘‘ KalyāṇadhammoM0.260 ca kathaṃ hoti ?

Idha , bhikkhave , bhikkhu sattannaṃ bodhipakkhiyānaṃ dhammānaṃ bhāvanānuyogamanuyutto viharati .

Evaṃ kho , bhikkhave , bhikkhu kalyāṇadhammo hoti .

Iti kalyāṇasīlo , kalyāṇadhammo .

‘‘ Kalyāṇapañño ca kathaṃ hotiP0.97 ?

Idha , bhikkhave , bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati .

Evaṃ kho , bhikkhave , bhikkhu kalyāṇapañño hoti .

‘‘ Iti kalyāṇasīlo kalyāṇadhammo kalyāṇapañño imasmiṃ dhammavinaye ‘ kevalī vusitavā uttamapuriso ’ ti vuccatī ’’ ti .

Etamatthaṃ bhagavā avoca .

Tatthetaṃ iti vuccati –

‘‘ YassaV0.70 kāyena vācāya , manasā natthi dukkaṭaṃ ;

Taṃ ve kalyāṇasīloti , āhu bhikkhuṃ hirīmanaṃ [ hirīmataṃ ( syā . ka .)].

‘‘ Yassa dhammā subhāvitā , satta [ patta ( sabbattha )] sambodhigāmino ;

Taṃ ve kalyāṇadhammoti , āhu bhikkhuṃ anussadaṃ .

‘‘ Yo dukkhassa pajānāti , idheva khayamattano ;

Taṃ ve kalyāṇapaññoti , āhu bhikkhuṃ anāsavaṃ .

‘‘ Tehi dhammehi sampannaṃ , anīghaṃ chinnasaṃsayaṃ ;

AsitaṃT0.305 sabbalokassa , āhu sabbapahāyinan ’’ ti .

Ayampi attho vutto bhagavatā , iti me sutanti .

Aṭṭhamaṃ .

Issues

Select Version

Itivuttakapāḷi

Itivuttakapāḷi