1. Paṭhamavaggo

1. Lobhasuttaṃ

1. VuttañhetaṃM0.195V0.1P0.1T0.229 bhagavatā , vuttamarahatāti me sutaṃ –

‘‘ Ekadhammaṃ , bhikkhave , pajahatha ;

ahaṃ vo pāṭibhogo anāgāmitāya .

Katamaṃ ekadhammaṃ ?

Lobhaṃ , bhikkhave , ekadhammaṃ pajahatha ;

ahaṃ vo pāṭibhogo anāgāmitāyā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ YenaV0.2 lobhena luddhāse , sattā gacchanti duggatiṃ ;

Taṃ lobhaṃ sammadaññāya , pajahanti vipassino ;

Pahāya na punāyanti , imaṃ lokaṃ kudācanan ’’ ti .

Ayampi attho vutto bhagavatā , iti me sutanti .

Paṭhamaṃ .

2. Dosasuttaṃ

2. Vuttañhetaṃ bhagavatā , vuttamarahatāti me sutaṃ –

‘‘ Ekadhammaṃ , bhikkhave , pajahatha ;

ahaṃ vo pāṭibhogoT0.230 anāgāmitāya .

Katamaṃ ekadhammaṃ ?

Dosaṃ , bhikkhave , ekadhammaṃ pajahatha ;

ahaṃ voP0.2 pāṭibhogo anāgāmitāyā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ YenaM0.196 dosena duṭṭhāse , sattā gacchanti duggatiṃ ;

Taṃ dosaṃ sammadaññāya , pajahanti vipassino ;

Pahāya na punāyanti , imaṃ lokaṃ kudācanan ’’ ti .

Ayampi attho vutto bhagavatā , iti me sutanti .

Dutiyaṃ .

3. Mohasuttaṃ

3. Vuttañhetaṃ bhagavatā , vuttamarahatāti me sutaṃ –

‘‘ Ekadhammaṃ , bhikkhave , pajahatha ;

ahaṃ vo pāṭibhogo anāgāmitāya .

Katamaṃ ekadhammaṃ ?

Mohaṃ , bhikkhave , ekadhammaṃ pajahatha ;

ahaṃ vo pāṭibhogo anāgāmitāyā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Yena mohena mūḷhāse , sattā gacchanti duggatiṃ ;

Taṃ mohaṃ sammadaññāya , pajahanti vipassino ;

Pahāya na punāyanti , imaṃ lokaṃ kudācanan ’’ ti .

AyampiV0.3 attho vutto bhagavatā , iti me sutanti .

Tatiyaṃ .

4. Kodhasuttaṃ

4. Vuttañhetaṃ bhagavatā , vuttamarahatāti me sutaṃ –

‘‘ Ekadhammaṃ , bhikkhave , pajahatha ;

ahaṃ vo pāṭibhogo anāgāmitāya .

Katamaṃ ekadhammaṃ ?

Kodhaṃ , bhikkhave , ekadhammaṃ pajahatha ;

ahaṃ vo pāṭibhogo anāgāmitāyā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ YenaT0.231 kodhena kuddhāse , sattā gacchanti duggatiṃ ;

Taṃ kodhaṃ sammadaññāya , pajahanti vipassino ;

Pahāya na punāyanti , imaṃ lokaṃ kudācanan ’’ ti .

Ayampi attho vutto bhagavatā , iti me sutanti .

Catutthaṃ .

5. Makkhasuttaṃ

5. VuttañhetaṃM0.197P0.3 bhagavatā , vuttamarahatāti me sutaṃ –

‘‘ Ekadhammaṃ , bhikkhave , pajahatha ;

ahaṃ vo pāṭibhogo anāgāmitāya .

Katamaṃ ekadhammaṃ ?

Makkhaṃ , bhikkhave , ekadhammaṃ pajahatha ;

ahaṃ vo pāṭibhogo anāgāmitāyā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Yena makkhena makkhāse [ makkhitāse ( syā .)], sattā gacchanti duggatiṃ ;

Taṃ makkhaṃ sammadaññāya , pajahanti vipassino ;

Pahāya na punāyanti , imaṃ lokaṃ kudācanan ’’ ti .

Ayampi attho vutto bhagavatā , iti me sutanti .

Pañcamaṃ .

6. Mānasuttaṃ

6. VuttañhetaṃV0.4 bhagavatā , vuttamarahatāti me sutaṃ –

‘‘ Ekadhammaṃ , bhikkhave , pajahatha ;

ahaṃ vo pāṭibhogo anāgāmitāya .

Katamaṃ ekadhammaṃ ?

Mānaṃ , bhikkhave , ekadhammaṃ pajahatha ;

ahaṃ vo pāṭibhogo anāgāmitāyā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Yena mānena mattāse , sattā gacchanti duggatiṃ ;

Taṃ mānaṃ sammadaññāya , pajahanti vipassino ;

Pahāya na punāyanti , imaṃ lokaṃ kudācanan ’’ ti .

AyampiT0.232 attho vutto bhagavatā , iti me sutanti .

Chaṭṭhaṃ .

7. Sabbapariññāsuttaṃ

7. Vuttañhetaṃ bhagavatā , vuttamarahatāti me sutaṃ –

‘‘ Sabbaṃ , bhikkhave , anabhijānaṃ aparijānaṃ tattha cittaṃ avirājayaṃ appajahaṃ abhabbo dukkhakkhayāya .

Sabbañca kho , bhikkhave , abhijānaṃ parijānaṃP0.4 tattha cittaṃ virājayaṃ pajahaṃ bhabbo dukkhakkhayāyā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ YoM0.198 sabbaṃ sabbato ñatvā , sabbatthesu na rajjati ;

Sa ve sabbapariññā [ sabbaṃ pariññā ( syā . pī .)] so , sabbadukkhamupaccagā ’’ ti [ sabbaṃ dukkhaṃ upaccagāti ( syā .), sabbadukkhaṃ upaccagāti ( pī . aṭṭha .)].

Ayampi attho vutto bhagavatā , iti me sutanti .

Sattamaṃ .

8. Mānapariññāsuttaṃ

8. Vuttañhetaṃ bhagavatā , vuttamarahatāti me sutaṃ –

‘‘ Mānaṃ , bhikkhave , anabhijānaṃ aparijānaṃ tattha cittaṃ avirājayaṃ appajahaṃ abhabbo dukkhakkhayāyaV0.5 .

Mānañca kho , bhikkhave , abhijānaṃ parijānaṃ tattha cittaṃ virājayaṃ pajahaṃ bhabbo dukkhakkhayāyā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Mānupetā ayaṃ pajā , mānaganthā bhave ratā ;

Mānaṃ aparijānantā , āgantāro punabbhavaṃ .

‘‘ YeP0.5 ca mānaṃ pahantvāna , vimuttā mānasaṅkhaye ;

Te mānaganthābhibhuno , sabbadukkhamupaccagun ’’ ti [ sabbadukkhaṃ upaccagunti ( pī .), sabbaṃ dukkhaṃ upaccagunti ( aṭṭhakathā )].

Ayampi attho vutto bhagavatā , iti me sutanti .

Aṭṭhamaṃ .

9. Lobhapariññāsuttaṃ

9. Vuttañhetaṃ bhagavatā , vuttamarahatāti me sutaṃ –

‘‘ Lobhaṃ , bhikkhaveT0.233 , anabhijānaṃ aparijānaṃ tattha cittaṃ avirājayaṃ appajahaṃ abhabbo dukkhakkhayāya .

Lobhañca kho , bhikkhave , abhijānaṃ parijānaṃ tattha cittaṃ virājayaṃ pajahaṃ bhabbo dukkhakkhayāyā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Yena lobhena luddhāse , sattā gacchanti duggatiṃ ;

Taṃ lobhaṃ sammadaññāya , pajahanti vipassino ;

Pahāya na punāyanti , imaṃ lokaṃ kudācanan ’’ ti .

Ayampi attho vutto bhagavatā , iti me sutanti .

Navamaṃ .

10. Dosapariññāsuttaṃ

10. VuttañhetaṃM0.199 bhagavatā , vuttamarahatāti me sutaṃ –

‘‘ Dosaṃ , bhikkhave , anabhijānaṃ aparijānaṃ tattha cittaṃ avirājayaṃ appajahaṃ abhabbo dukkhakkhayāya .

Dosañca kho , bhikkhave , abhijānaṃ parijānaṃ tattha cittaṃ virājayaṃ pajahaṃ bhabbo dukkhakkhayāyā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ YenaV0.6P0.6 dosena duṭṭhāse , sattā gacchanti duggatiṃ ;

Taṃ dosaṃ sammadaññāya , pajahanti vipassino ;

Pahāya na punāyanti , imaṃ lokaṃ kudācanan ’’ ti .

Ayampi attho vutto bhagavatā , iti me sutanti .

Dasamaṃ .

Paṭhamo vaggo niṭṭhito .

Tassuddānaṃ –

Rāgadosā atha moho , kodhamakkhāT0.234 mānaṃ sabbaṃ ;

Mānato rāgadosā puna dve , pakāsitā vaggamāhu paṭhamanti .

Issues

Select Version

Itivuttakapāḷi

Itivuttakapāḷi