1. Paṭhamavaggo

1. Mūlasuttaṃ

50. VuttañhetaṃM0.226V0.33 bhagavatā , vuttamarahatāti me sutaṃ –

‘‘ Tīṇimāni , bhikkhave , akusalamūlāni .

Katamāni tīṇi ?

Lobho akusalamūlaṃ , doso akusalamūlaṃ , moho akusalamūlaṃ – imāni kho , bhikkhave , tīṇi akusalamūlānī ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Lobho doso ca moho ca , purisaṃ pāpacetasaṃ ;

Hiṃsanti attasambhūtā , tacasāraṃva samphalan ’’ ti .

Ayampi attho vutto bhagavatā , iti me sutanti .

Paṭhamaṃ .

2. Dhātusuttaṃ

51. VuttañhetaṃT0.265 bhagavatā , vuttamarahatāti me sutaṃ –

‘‘ Tisso imā , bhikkhave , dhātuyo .

Katamā tisso ?

Rūpadhātu , arūpadhātu , nirodhadhātu – imā kho , bhikkhave , tisso dhātuyo ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Rūpadhātuṃ [ rūpadhātu ( sabbattha )] pariññāya , arūpesu asaṇṭhitā ;

NirodheP0.46 ye vimuccanti , te janā maccuhāyino .

‘‘ KāyenaV0.34 amataṃ dhātuṃ , phusayitvā [ phussayitvā ( syā .), phassayitvā ( pī .)] nirūpadhiṃ ;

Upadhippaṭinissaggaṃ , sacchikatvā anāsavo ;

Deseti sammāsambuddho , asokaṃ virajaṃ padan ’’ ti .

Ayampi attho vutto bhagavatā , iti me sutanti .

dutiyaṃ .

3. Paṭhamavedanāsuttaṃ

52. VuttañhetaṃM0.227 bhagavatā , vuttamarahatāti me sutaṃ –

‘‘ Tisso imā , bhikkhave , vedanā .

Katamā tisso ?

Sukhā vedanā , dukkhā vedanā , adukkhamasukhā vedanā –

Imā kho , bhikkhave , tisso vedanā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Samāhito sampajāno , sato buddhassa sāvako ;

Vedanā ca pajānāti , vedanānañca sambhavaṃ .

‘‘ Yattha cetā nirujjhanti , maggañca khayagāminaṃ ;

Vedanānaṃ khayā bhikkhu , nicchāto parinibbuto ’’ ti .

Ayampi attho vutto bhagavatā , iti me sutanti .

Tatiyaṃ .

4. Dutiyavedanāsuttaṃ

53. VuttañhetaṃP0.47 bhagavatā , vuttamarahatāti me sutaṃ –

‘‘ Tisso imāT0.266 , bhikkhave , vedanā .

Katamā tisso ?

Sukhā vedanā , dukkhā vedanā , adukkhamasukhā vedanā .

Sukhā , bhikkhave , vedanā dukkhato daṭṭhabbā ;

dukkhā vedanā sallato daṭṭhabbā ;

adukkhamasukhā vedanā aniccato daṭṭhabbā .

Yato kho , bhikkhave , bhikkhuno sukhā vedanā dukkhato diṭṭhā hoti , dukkhā vedanā sallato diṭṭhā hoti , adukkhamasukhā vedanā aniccato diṭṭhā hoti ;

ayaṃ vuccati , bhikkhave ,‘ bhikkhu ariyo sammaddaso acchecchi [ acchejji ( sī . pī .), acchijji ( ka .)], taṇhaṃ , vivattayiV0.35 [ vāvattayi ( sī . aṭṭha .)] saṃyojanaṃ , sammā mānābhisamayā antamakāsi dukkhassā ’’’ ti .

Etamatthaṃ bhagavā avoca .

Tatthetaṃ iti vuccati –

‘‘ Yo sukhaṃ dukkhato adda [ dakkhi ( sī . pī . ka .), adakkhi ( syā .)], dukkhamaddakkhi sallato ;

Adukkhamasukhaṃ santaṃ , adakkhi naṃ aniccato .

‘‘ Sa ve sammaddaso bhikkhu , yato tattha vimuccati ;

Abhiññāvosito santo , sa ve yogātigo munī ’’ ti .

Ayampi attho vutto bhagavatā , iti me sutanti .

Catutthaṃ .

5. Paṭhamaesanāsuttaṃ

54. VuttañhetaṃM0.228P0.48 bhagavatā , vuttamarahatāti me sutaṃ –

‘‘ Tisso imā , bhikkhave , esanā .

Katamā tisso ?

Kāmesanā , bhavesanā , brahmacariyesanā – imā kho , bhikkhave , tisso esanā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Samāhito sampajāno , sato buddhassa sāvako ;

EsanāT0.267 ca pajānāti , esanānañca sambhavaṃ .

‘‘ Yattha cetā nirujjhanti , maggañca khayagāminaṃ ;

Esanānaṃ khayā bhikkhu , nicchāto parinibbuto ’’ ti .

Ayampi attho vutto bhagavatā , iti me sutanti .

Pañcamaṃ .

6. Dutiyaesanāsuttaṃ

55. Vuttañhetaṃ bhagavatā , vuttamarahatāti me sutaṃ –

‘‘ Tisso imā , bhikkhave , esanā .

Katamā tisso ?

Kāmesanā , bhavesanā , brahmacariyesanāV0.36 – imā kho , bhikkhave , tisso esanā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Kāmesanā bhavesanā , brahmacariyesanā saha ;

Iti saccaparāmāso , diṭṭhiṭṭhānā samussayā .

‘‘ Sabbarāgavirattassa , taṇhakkhayavimuttino ;

EsanāP0.49 paṭinissaṭṭhā , diṭṭhiṭṭhānā samūhatā ;

Esanānaṃ khayā bhikkhu , nirāso akathaṃkathī ’’ ti .

Ayampi attho vutto bhagavatā , iti me sutanti .

Chaṭṭhaṃ .

7. Paṭhamaāsavasuttaṃ

56. Vuttañhetaṃ bhagavatā , vuttamarahatāti me sutaṃ –

‘‘ Tayome , bhikkhave , āsavā .

Katame tayo ?

Kāmāsavo , bhavāsavo , avijjāsavo – ime kho , bhikkhave , tayo āsavā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ SamāhitoM0.229 sampajāno , sato buddhassa sāvako ;

Āsave ca pajānāti , āsavānañca sambhavaṃ .

‘‘ YatthaT0.268 cetā nirujjhanti , maggañca khayagāminaṃ ;

Āsavānaṃ khayā bhikkhu , nicchāto parinibbuto ’’ ti .

Ayampi attho vutto bhagavatā , iti me sutanti .

Sattamaṃ .

8. Dutiyaāsavasuttaṃ

57. Vuttañhetaṃ bhagavatā , vuttamarahatāti me sutaṃ –

‘‘ Tayome , bhikkhave , āsavā .

Katame tayo ?

Kāmāsavo , bhavāsavo , avijjāsavo – ime kho , bhikkhave , tayo āsavā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ YassaV0.37 kāmāsavo khīṇo , avijjāP0.50 ca virājitā ;

Bhavāsavo parikkhīṇo , vippamutto nirūpadhi ;

Dhāreti antimaṃ dehaṃ , jetvā māraṃ savāhinin ’’ ti [ savāhananti ( bahūsu )].

Ayampi attho vutto bhagavatā , iti me sutanti .

Aṭṭhamaṃ .

9. Taṇhāsuttaṃ

58. Vuttañhetaṃ bhagavatā , vuttamarahatāti me sutaṃ –

‘‘ Tisso imā , bhikkhave , taṇhā .

Katamā tisso ?

Kāmataṇhā , bhavataṇhā , vibhavataṇhā – imā kho , bhikkhave , tisso taṇhā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ Taṇhāyogena saṃyuttā , rattacittā bhavābhave ;

Te yogayuttā mārassa , ayogakkhemino janā ;

Sattā gacchanti saṃsāraṃ , jātīmaraṇagāmino .

‘‘ Ye ca taṇhaṃ pahantvāna , vītataṇhā [ nikkaṇhā ca ( sī . ka .)] bhavābhave ;

Te ve [ te ca ( sī . pī . ka .)] pāraṅgatā [ pāragatā ( ka . sī . syā .)] loke , ye pattā āsavakkhayan ’’ ti .

AyampiT0.269 attho vutto bhagavatā , iti me sutanti .

Navamaṃ .

10. Māradheyyasuttaṃ

59. VuttañhetaṃM0.230 bhagavatā , vuttamarahatāti me sutaṃ –

‘‘ Tīhi , bhikkhave , dhammehi samannāgato bhikkhuP0.51 atikkamma māradheyyaṃ ādiccova virocati .

Katamehi tīhi ?

Idha , bhikkhave , bhikkhu asekhena sīlakkhandhena samannāgato hoti , asekhena samādhikkhandhena samannāgato hoti , asekhena paññākkhandhena samannāgato hoti – imehi kho , bhikkhave , tīhi dhammehi samannāgato bhikkhu atikkamma māradheyyaṃ ādiccova virocatī ’’ ti .

Etamatthaṃ bhagavā avoca .

Tatthetaṃ iti vuccati –

‘‘ SīlaṃV0.38 samādhi paññā ca , yassa ete subhāvitā ;

Atikkamma māradheyyaṃ , ādiccova virocatī ’’ ti .

Ayampi attho vutto bhagavatā , iti me sutanti .

Dasamaṃ .

Paṭhamo vaggo niṭṭhito .

Tassuddānaṃ –

Mūladhātu atha vedanā duve , esanā ca duve āsavā duve ;

Taṇhāto ca atha [ taṇhāto atha ( syā .)] māradheyyato , vaggamāhu paṭhamanti muttamanti .

Issues

Select Version

Itivuttakapāḷi

Itivuttakapāḷi