10. Nadīsotasuttaṃ

Author： _System_Pali_VRI_ @ Administrator

10. Nadīsotasuttaṃ

109. VuttañhetaṃM0.271 bhagavatā , vuttamarahatāti me sutaṃ –

‘‘ SeyyathāpiT0.316 , bhikkhave , puriso nadiyā sotenaP0.114 ovuyheyya piyarūpasātarūpena .

Tamenaṃ cakkhumā puriso tīre ṭhito disvā evaṃ vadeyya –

‘ kiñcāpi kho tvaṃ , ambho purisa , nadiyā sotena ovuyhasi piyarūpasātarūpena , atthi cettha heṭṭhā rahado saūmi sāvaṭṭo sagaho sarakkhaso yaṃ tvaṃ , ambho purisa , rahadaṃ pāpuṇitvā maraṇaṃ vā nigacchasi maraṇamattaṃ vā dukkhan ’ ti .

Atha kho so , bhikkhave , puriso tassa purisassa saddaṃ sutvā hatthehi ca pādehi ca paṭisotaṃ vāyameyya .

‘‘ Upamā kho me ayaṃ , bhikkhave , katā atthassa viññāpanāya .

Ayaṃ cettha [ ayaṃ cevettha ( syā .)] attho –

‘ nadiyā soto ’ ti kho , bhikkhave , taṇhāyetaṃ adhivacanaṃ .

‘‘‘ Piyarūpaṃ sātarūpan ’ ti kho , bhikkhave , channetaṃ ajjhattikānaṃ āyatanānaṃ adhivacanaṃ .

‘‘‘ HeṭṭhāV0.81 rahado ’ ti kho , bhikkhave , pañcannaṃ orambhāgiyānaṃ saṃyojanānaṃ adhivacanaṃ ;

‘‘‘ Ūmibhayan ’ ti kho [ sañīmīti kho ( bahūsu )], bhikkhave , kodhupāyāsassetaṃ adhivacanaṃ ;

‘‘‘ Āvaṭṭan ’ ti kho [ sāvaṭṭoti kho ( bahūsu )], bhikkhave , pañcannetaṃ kāmaguṇānaṃ adhivacanaṃ ;

‘‘‘ Gaharakkhaso ’ ti kho [ sagaho sarakkhasoti kho ( bahūsu )], bhikkhave , mātugāmassetaṃ adhivacanaṃ ;

‘‘‘ Paṭisoto ’ tiP0.115 kho , bhikkhave , nekkhammassetaṃ adhivacanaṃ ;

‘‘‘ Hatthehi ca pādehi ca vāyāmo ’ ti kho , bhikkhave , vīriyārambhassetaṃ adhivacanaṃ ;

‘‘‘ Cakkhumā puriso tīre ṭhitoti kho , bhikkhave , tathāgatassetaṃ adhivacanaṃ arahato sammāsambuddhassā ’’ ti .

Etamatthaṃ bhagavā avoca .

Tatthetaṃ iti vuccati –

‘‘ SahāpiM0.272 dukkhena jaheyya kāme , yogakkhemaṃ āyatiṃ patthayāno ;

SammappajānoT0.317 suvimuttacitto , vimuttiyā phassaye tattha tattha ;

Sa vedagū vūsitabrahmacariyo , lokantagū pāragatoti vuccatī ’’ ti .

Ayampi attho vutto bhagavatā , iti me sutanti .

Dasamaṃ .

Issues

Select Version

Itivuttakapāḷi

Itivuttakapāḷi