10. Parihānasuttaṃ
79. Vuttañhetaṃ bhagavatā , vuttamarahatāti me sutaṃ –
‘‘ Tayome , bhikkhave , dhammā sekhassa bhikkhuno parihānāya saṃvattanti .
Katame tayo ?
Idha , bhikkhave , sekho bhikkhu kammārāmo hoti , kammarato , kammārāmatamanuyutto ;
bhassārāmo hoti , bhassarato , bhassārāmatamanuyutto ;
niddārāmo hoti , niddārato , niddārāmatamanuyutto .
Ime kho , bhikkhave , tayo dhammā sekhassa bhikkhuno parihānāya saṃvattanti .
‘‘ Tayome , bhikkhave , dhammā sekhassa bhikkhuno aparihānāya saṃvattanti .
Katame tayo ?
Idha , bhikkhave , sekho bhikkhu na kammārāmo hoti , na kammarato , na kammārāmatamanuyutto ;
na bhassārāmo hoti , na bhassarato , na bhassārāmatamanuyutto ;
na niddārāmo hoti , na niddārato
M0.244P0.72 , na niddārāmatamanuyutto .Ime kho , bhikkhave , tayo dhammā sekhassa bhikkhuno aparihānāya saṃvattantī ’’ ti .
Etamatthaṃ bhagavā avoca .
Tatthetaṃ iti vuccati –
‘‘ Kammārāmo bhassārāmo [ bhassarato ( sabbatha )], niddārāmo ca uddhato ;
Abhabbo
T0.286 tādiso bhikkhu , phuṭṭhuṃ sambodhimuttamaṃ .‘‘ Tasmā hi appakiccassa , appamiddho anuddhato ;
Bhabbo so tādiso bhikkhu , phuṭṭhuṃ sambodhimuttaman ’’ ti .
Ayampi
V0.53 attho vutto bhagavatā , iti me sutanti .Dasamaṃ .
Tatiyo vaggo niṭṭhito .
Tassuddānaṃ –
Dve diṭṭhī nissaraṇaṃ rūpaṃ , putto avuṭṭhikena ca ;
Sukhā ca bhiduro [ bhindanā ( sabbattha )] dhātu , parihānena te dasāti .