2. Dutiyanissaggiyapācittiyasikkhāpadaṃ
738. Dutiye
M0.156 ahatacoḷānampi sedamalādikilinne virūpattā ‘‘ jiṇṇacoḷā ’’ ti vuttaṃ .‘‘ Api ayyāhī ’’ tiiminā ‘‘ apa ayyāhī ’’ tipadavibhāgaṃ nivatteti .
740. Sabbampi etaṃ cīvaranti yojanā .
740. Dutiye ‘‘ ayyāya dammīti evaṃ paṭiladdhan ti nissaṭṭhapaṭiladdhaṃ .
Teneva mātikāṭṭhakathāya mpi ‘‘ nissaṭṭhaṃ paṭilabhitvāpi yathādāneyeva upanetabban ’’ ti vuttaṃ .
Yathādāneyeva upanetabban ti yathā dāyakena dinnaṃ , tathā upanetabbaṃ , akālacīvarapakkheyeva ṭhapetabbanti vuttaṃ hoti .
Ettha ca bhājāpitāya laddhacīvarameva nissaggiyaṃ hoti , taṃ vinayakammaṃ katvāpi attanā na labhati .
740. Vatthusampattattā vā na tassā anāpannakāmatāya vā anāṇattikatāya vā akālacīvaramadaṃsu .
740. Dutiye ayyāya dammīti evaṃ paṭiladdhan ti nissaṭṭhapaṭiladdhaṃ , nissaṭṭhaṃ paṭilabhitvāpi yaṃ uddissa dāyakehi dinnaṃ , tattheva dātabbaṃ .
Tenāha ‘‘ yathādāneyeva upanetabban ’’ ti .
Evaṃ paṭiladdhan ti evaṃ nissajjitvā laddhaṃ .
Yathādāneyevāti yathā dāyakehi dinnaṃ , tasmiṃ dāneyeva upanetabbaṃ , akālacīvareyeva pakkhipitabbanti atthoti .
Sesamettha uttānameva .
Akālacīvaratā , tathāsaññitā , kālacīvaranti adhiṭṭhāya lesena bhājāpanaṃ , paṭilābhoti imāni panettha cattāri aṅgāni .
Yathādāne eva upanetabbaṃ , na bhājetabbaṃ puggalikattāti adhippāyo .
Atthato hi itarampi yathādāne eva upanetabbameva .
Gaṇṭhipade pana ‘‘ ayyāya dammīti evaṃ paṭiladdhanti nissaṭṭhapaṭiladdhaṃ .
Yathādāneti dāyakehi pariccattavidhānena .
Upanetabban ti akālacīvarabhāvena bhājetabbanti adhippāyo .
Idha bhājāpitāya laddhacīvarameva nissaggiyaṃ hoti , taṃ vinayakammaṃ katvāpi attanā na labhatī ’’ ti likhitaṃ .
Yadi nissaṭṭhapaṭiladdhaṃ sandhāya idaṃ vuttaṃ siyā ,‘‘ nissajjitabbaṃ saṅghassa vā gaṇassa vā puggalassa vā dadeyya , dadeyyuṃ , ayyāya dammī ’’ ti vuttattā tīṇipetāni padāni vattabbāni siyuṃ , tasmā na kevalaṃ nissaṭṭhapaṭiladdhameva yathādāne upanetabbaṃ , aññāhi bhikkhunīhi laddhakoṭṭhāsampi yathādāneyeva upanetabbaṃ .
Akālacīvaratā , taṃ ñatvā kālacīvaranti lesena bhājāpanaṃ , paṭilābhoti tīṇi aṅgāni .
Dutiyaṃ .
3. Tatiyanissaggiyapācittiyasikkhāpadaṃ